ट्रम्प यांनी केटी झकेरिया यांना केले व्हाईट हाऊसचे नवे प्रेस सेक्रेटरी
कॅरोलिन लेविट यांच्या राजीनाम्यानंतर वकील आणि संवाद सल्लागार केटी झकेरिया यांच्याकडे व्हाईट हाऊसच्या प्रेस सेक्रेटरीपदाची जबाबदारी देण्यात आली आहे.
छायाचित्रे सत्यापित केलेली नाहीत
अमेरिकेचे राष्ट्राध्यक्ष डोनाल्ड ट्रम्प यांनी आपल्या दुसऱ्या कार्यकाळात व्हाईट हाऊसच्या प्रेस सेक्रेटरीपदी केटी झकेरिया (Katie Zacharia) यांची नियुक्ती केली आहे. ट्रम्प यांनी ट्रुथ सोशल या आपल्या सोशल मीडिया प्लॅटफॉर्मवर पोस्ट करून ही घोषणा केली. झकेरिया वकील, मीडिया सल्लागार आणि पुराणमतवादी विचारवंत म्हणून ओळखल्या जातात.
या पोस्टमध्ये ट्रम्प यांनी झकेरिया यांचे कौतुक केले. त्या सुरुवातीपासून अत्यंत निष्ठावान आणि प्रामाणिक असून "मेक अमेरिका ग्रेट अगेन" (MAGA) चळवळीच्या खऱ्या पाठीराख्या आहेत, असे ट्रम्प यांनी म्हटले. त्यांची आतापर्यंतची कामगिरी निर्दोष राहिली आहे आणि त्या व्हाईट हाऊसच्या पत्रकार समूहाशी अत्यंत प्रभावीपणे संवाद साधतील, असा विश्वासही त्यांनी व्यक्त केला.
झकेरिया या व्यवसायाने अनुभवी वकील असून राजकीय विश्लेषकही आहेत. ट्रम्प यांच्या राष्ट्राध्यक्षीय निवडणूक मोहिमेत तसेच त्यांच्या मीडिया कंपनीत त्यांनी कायदेशीर आणि संवाद सल्लागार म्हणून महत्त्वाचे योगदान दिले आहे. नियुक्तीपूर्वी त्या ट्रम्प मीडिया अँड टेक्नॉलॉजी ग्रुपमध्ये (TMTG) वरिष्ठ संवाद सल्लागार म्हणून काम करत होत्या. ट्रुथ सोशल प्लॅटफॉर्मचे नियंत्रण हीच कंपनी करते.
याआधी झकेरिया यांनी अमेरिकेच्या डिपार्टमेंट ऑफ होमलँड सिक्युरिटीमध्ये (DHS) प्रवक्त्या म्हणून काम केले होते. इमिग्रेशन अंमलबजावणीवर लक्ष ठेवणाऱ्या या विभागात त्यांनी सचिव क्रिस्टी नोएम यांच्या नेतृत्वाखाली काम केले. याशिवाय त्या "फिक्स कॅलिफोर्निया" या पुराणमतवादी गटासोबतही काम केले आहे. रिपब्लिकन पक्षात त्या खंबीर आणि आक्रमक वक्त्या म्हणून ओळखल्या जातात.
झकेरिया या कॅरोलिन लेविट (Karoline Leavitt) यांची जागा घेणार आहेत. लेविट यांनी ट्रम्प प्रशासनात महत्त्वाची भूमिका बजावली होती आणि वैयक्तिक कारणांमुळे ऑगस्ट महिन्यात पदाचा राजीनामा दिला होता. ट्रम्प यांनी लेविट यांच्या कामाची नेहमी प्रशंसा केली होती. एका पत्रकार परिषदेत ट्रम्प यांनी लेविट यांच्या बोलण्याच्या वेगाचा उल्लेख करून, "जेव्हा त्या बोलतात तेव्हा त्यांचे ओठ मशीनगनसारखे वेगाने चालतात" असे म्हटले होते. या विधानाची सोशल मीडियावर जोरदार चर्चा झाली होती.
नियुक्तीनंतर झकेरिया यांनी सोशल मीडियावर आनंद व्यक्त करून ट्रम्प यांचे आभार मानले. ट्रम्प यांनी दाखवलेला विश्वास हा आपल्यासाठी मोठा सन्मान आहे, असे त्यांनी म्हटले. व्हाईट हाऊसचे प्रतिनिधित्व करणे आणि ट्रम्प प्रशासनाचे ऐतिहासिक निर्णय व विजय अमेरिकन जनतेपर्यंत पोहोचवणे हे आपले मुख्य ध्येय असेल, असेही त्यांनी स्पष्ट केले.
आपल्या पोस्टमध्ये झकेरिया यांनी लिहिले, "अमेरिकेच्या 250 वर्षांच्या या महत्त्वाच्या टप्प्यावर राष्ट्राध्यक्ष ट्रम्प आणि अमेरिकन जनतेची सेवा करणे हा आयुष्यातला सर्वात मोठा सन्मान आहे." लेविट यांचा उल्लेख करताना त्यांनी म्हटले की, "अद्भुत कॅरोलिन लेविट यांच्यानंतर हे पद सांभाळणे हा उच्च दर्जा आहे आणि तो गाठण्यासारखा आहे." व्हाईट हाऊसचा पत्रकार समूह आणि देशभरातील पत्रकार यांच्यासोबत काम करण्यासाठी आपण उत्सुक आहोत, असेही त्यांनी म्हटले.
