गुगलमध्ये नोकरीसाठी गुगलच्या रिक्रूटरने सांगितल्या निवडीच्या पाच टिप्स

आयटी असो वा नॉन-आयटी, प्रत्येक प्रोफेशनलला कधी ना कधी गुगलमध्ये नोकरी करायचे स्वप्न पडतेच. पण गुगलमध्ये निवड होण्यासाठी फक्त चांगला रेझ्युमे पुरेसा नसतो. योग्य रणनीती हवी, मुलाखतीची नीट तयारी हवी आणि कंपनी कसा विचार करते हेही समजून घ्यावे लागते. गुगलचे टेक्निकल रिक्रूटर बेन मीड यांनी अर्ज करणाऱ्या उमेदवारांसाठी पाच टिप्स शेअर केल्या आहेत.

बेन मीड हे फ्रँकलिन पियर्स युनिव्हर्सिटीमधून सायकोलॉजीमध्ये ग्रॅज्युएट झाले आहेत. त्यांच्या मते, गुगलमध्ये निवड व्हायची असेल तर आपली स्किल्स (कौशल्ये) नीट मांडता आली पाहिजेत. गूगल किंवा इतर कुठल्याही मोठ्या टेक कंपनीत ड्रीम जॉब मिळवायचा असेल, तर या टिप्स वापरून तुम्ही तुमचा रेझ्युमे अधिक चांगला करू शकता. गुगलमधील नोकरीची प्रक्रिया बरीच लांब आणि किचकट असते.

पहिली टिप म्हणजे AI टूल्स हुशारीने वापरणे. मीड सांगतात की आधी एक मास्टर रेझ्युमे तयार करा. तो ३ ते ४ पानांचा असू शकतो. त्यात तुमचे सगळे अनुभव, प्रोजेक्ट्स आणि अचिव्हमेंट्स लिहा. ज्या पदासाठी अर्ज करायचा, त्याचे जॉब डिस्क्रिप्शन गुगलच्या Gemini AI मध्ये टाका आणि मास्टर रेझ्युमे त्या रोलनुसार कस्टमाइज करा. त्यामुळे वेळ वाचतो आणि योग्य अनुभव ठळकपणे दिसतो.

दुसरी टिप म्हणजे फोकस ठेवून अर्ज करणे. अनेक जण एकाच कंपनीतल्या १५-२० वेगवेगळ्या नोकऱ्यांसाठी अर्ज करतात. ही मोठी चूक आहे आणि कंपनीच्या नजरेत ती 'रेड फ्लॅग' ठरते. गूगल रिक्रूटरच्या म्हणण्यानुसार २० पदांवर अर्ज करण्यापेक्षा आपल्या अनुभवाशी सर्वात जास्त जुळणाऱ्या २ ते ३ रोलवर लक्ष द्या. अर्ज भरण्याआधी त्या नोकरीची किमान आणि पसंतीची पात्रता नीट तपासा.

तिसरी टिप STAR पद्धतीची आहे. मुलाखतीतल्या प्रश्नांची उत्तरे देताना बेन मीड यांनी STAR फ्रेमवर्क वापरायला सांगितले आहे. यात Situation (स्थिती) म्हणजे समस्या किंवा परिस्थिती काय होती. Task (कार्य) म्हणजे तुमची जबाबदारी काय होती. Action (कृती) म्हणजे तुम्ही कोणती पावले उचलली. आणि Result (निकाल) म्हणजे त्याचा काय परिणाम झाला. अशा पद्धतीने दिलेले उत्तर नीट मांडलेले आणि प्रभावी वाटते.

चौथी टिप प्रॉब्लेम-सॉल्व्हिंग अप्रोच दाखवण्याची आहे. गुगलमधले मुलाखतकार तुम्हाला काय येते एवढेच बघत नाहीत, तर तुम्ही कसा विचार करता हेही तपासतात. एखादा ओपन किंवा अवघड प्रश्न आला, तर लगेच उत्तर देऊ नका. आधी तुमची गृहीतके स्पष्ट करा आणि मग मुलाखतकाराला प्रश्न विचारून गोष्टी स्पष्ट करून घ्या. विचार लॉजिकल पद्धतीने मांडता येणे हीच तुमची खरी क्षमता दाखवते.

पाचवी टिप म्हणजे गुगलच्या व्हॅल्यूज आणि टीम वर्कवर भर देणे. अनिश्चितता हाताळू शकणाऱ्या लोकांना गूगल जास्त प्राधान्य देते. युजर्सच्या गरजांची काळजी घेणारे आणि नैतिक निर्णय घेऊ शकणारे लोक कंपनीला हवे असतात. त्यामुळे मुलाखतीत अशी उदाहरणे सांगा, ज्यातून तुम्ही संकटाच्या वेळी कसे काम केले आणि तुमच्यामुळे टीमला काय यश मिळाले, हे स्पष्ट होईल.