गोंदियात शालीमार हॉटेलवर कारवाई; स्वच्छतेतील त्रुटी कायम राहिल्याने परवाना निलंबित

गोंदियातील कुडवा नाका, रिंग रोड परिसरात असलेल्या मे. शालीमार हॉटेलचा अन्न व्यवसाय परवाना १३ ऑक्टोबर २०२६ पासून पुढील आदेशापर्यंत निलंबित करण्यात आला आहे. अन्न सुरक्षा व स्वच्छतेचे नियम मोडल्याने आणि तपासणीत सापडलेल्या त्रुटी दूर न केल्याने अन्न व औषध प्रशासनाने ही कारवाई केली. सार्वजनिक आरोग्याच्या हिताच्या दृष्टीने ही कारवाई केल्याचे प्रशासनाने म्हटले आहे.

अन्न व औषध प्रशासन जिल्ह्यातील अन्न आस्थापनांमध्ये अन्न सुरक्षा व स्वच्छतेचे नियम पाळले जातात की नाही, याची नियमित तपासणी करते. त्यानुसार ३ सप्टेंबर २०२६ रोजी FoSCoS प्रणालीद्वारे शालीमार हॉटेलची तपासणी झाली. तपासणीत त्रुटी आढळल्याने परवानाधारकाला त्या दुरुस्त करण्यासाठी सुधारणा नोटीस बजावण्यात आली होती. मात्र नोटिशीनुसार आवश्यक सुधारणा करून पूर्तता अहवाल सादर करण्यात आला नाही.

त्यानंतर १२ ऑक्टोबर २०२६ रोजी हॉटेलची पुन्हा तपासणी करण्यात आली. आधी दाखवून दिलेल्या त्रुटी तशाच असल्याचे यावेळी दिसून आले. त्यात अन्नपदार्थ साठवण्यासाठी अपुऱ्या सुविधा, घसरडी फरशी, कर्मचाऱ्यांसाठी हात धुण्याच्या सुविधेचा अभाव, भिंतींचा रंग व प्लास्टर निघालेली अवस्था, वायुवीजन व एक्झॉस्ट यंत्रणेतील अस्वच्छता, उघडी गटारे आणि गटारांमध्ये साचलेला अन्नकचरा यांचा समावेश होता.

शिवाय अन्नपदार्थ हाताळताना आवश्यक स्वच्छता राखली जात नव्हती, तसेच अन्न हाताळणारे कर्मचारी वैयक्तिक स्वच्छतेचे नियम पाळत नव्हते, असेही तपासणीत निदर्शनास आले. अन्नपदार्थांची सुरक्षित साठवण, स्वच्छ परिसर आणि अन्न हाताळणाऱ्या कर्मचाऱ्यांची वैयक्तिक स्वच्छता या गोष्टी अन्न सुरक्षा सुनिश्चित करण्यासाठी महत्त्वाच्या आहेत, असे प्रशासनाने नमूद केले आहे.

अन्न सुरक्षा व मानके कायदा, २००६ आणि त्याअंतर्गत लागू असलेल्या नियम व विनियमांतील तरतुदींनुसार या त्रुटींची दखल घेण्यात आली. त्यानुसार अन्न व औषध प्रशासनाच्या गोंदिया कार्यालयातील सहायक आयुक्त (अत्र) तथा पदनिर्देशित अधिकारी अमृता शिर्के यांनी या आस्थापनेचा अन्न व्यवसाय परवाना निलंबित करण्याचे आदेश काढले आहेत. निलंबनाच्या काळात या आस्थापनेत कोणत्याही प्रकारचा अन्न व्यवसाय करू नये, असे निर्देशही देण्यात आले आहेत.

नागरिकांना सुरक्षित, स्वच्छ व गुणवत्तापूर्ण अन्नपदार्थ मिळावेत, यासाठी अन्न व औषध प्रशासन आस्थापनांची तपासणी करून कायद्यानुसार आवश्यक कार्यवाही करते. सर्व अन्न व्यावसायिकांनी अन्न सुरक्षा, परिसरातील स्वच्छता आणि वैयक्तिक स्वच्छतेसंदर्भातील नियम काटेकोरपणे पाळावेत, असे प्रशासनाने सांगितले आहे. नागरिकांनी अन्नपदार्थांच्या गुणवत्ता व सुरक्षिततेबाबत जागरूक राहावे आणि कोणतीही अनियमितता आढळल्यास अन्न व औषध प्रशासनाकडे तक्रार नोंदवावी, असे आवाहनही प्रशासनाच्या वतीने करण्यात आले आहे.