ऑक्टोबर हीटच्या उन्हात कोकण, मध्य महाराष्ट्र आणि मराठवाड्यातील काही जिल्ह्यांत पावसाचा इशारा

महाराष्ट्रातून मान्सूनने माघार घेतल्यानंतर आता तीव्र 'ऑक्टोबर हीट' जाणवत असून संपूर्ण राज्य उन्हाच्या चटक्याने आणि असह्य उकाड्याने तापले आहे. या वातावरणात हवामानात मोठा बदल दिसत आहे. आज, 14 ऑक्टोबर रोजीही उन्हाचा तडाखा आणि उकाडा कायम राहणार आहे, पण हवामान विभागाच्या अंदाजानुसार कोकण, मध्य महाराष्ट्र आणि मराठवाड्यातील काही निवडक जिल्ह्यांत विजांच्या कडकडाटासह पाऊस पडण्याची शक्यता आहे. कोकणातील काही भागांत उष्ण व दमट हवामानाचा इशाराही देण्यात आला आहे.

आजचा अंदाज पाहिला तर दिवसभर राज्यात कडक ऊन आणि प्रचंड उकाडा राहील. तरीही हवामान विभागाने काही भागांसाठी महत्त्वाचे इशारे दिले आहेत. कोकणातील ठाणे, मुंबई आणि रायगड या जिल्ह्यांत उन्हाचा चटका वाढून हवामान अत्यंत दमट राहण्याची शक्यता आहे. त्यामुळे प्रशासनाने या तिन्ही जिल्ह्यांसाठी सतर्कतेचा इशारा म्हणजेच येलो अलर्ट जारी केला आहे.

पावसाबद्दल बोलायचे तर, हवामान विभागाच्या अंदाजानुसार आज रत्नागिरी, पुणे, सातारा, बीड आणि जालना या जिल्ह्यांत तुरळक ठिकाणी विजांच्या कडकडाटासह पाऊस पडू शकतो. उर्वरित महाराष्ट्रात मुख्यत्वे कोरडे हवामान राहण्याची शक्यता आहे.

सध्या राज्याच्या कमाल तापमानात मोठी वाढ झाली आहे. त्यामुळे बहुतांश ठिकाणचा पारा सातत्याने 37 अंश सेल्सिअसच्या वरच स्थिरावला आहे. सकाळपासूनच उन्हाचे चटके बसत असून दुपारी घराबाहेर पडणाऱ्या नागरिकांना घामाच्या धारा लागत आहेत.

मंगळवारी सकाळपर्यंतच्या 24 तासांत रत्नागिरी येथे 39.2 अंश सेल्सिअस इतक्या तापमानाची नोंद झाली, जे राज्यातील सर्वाधिक तापमान ठरले. मालेगाव आणि सांताक्रूझ येथे तापमान 38 अंशांपेक्षा अधिक होते, तर जळगाव, सोलापूर, अकोला, यवतमाळ, अमरावती आणि वाशीम येथे 37 अंशांपेक्षा जास्त तापमान नोंदवले गेले. दुसरीकडे, निफाड येथील गहू संशोधन केंद्रात राज्यातील सर्वात कमी, म्हणजे 16.2 अंश सेल्सिअस तापमानाची नोंद झाली.

मान्सूनची परतीची वाटचाल आता अंतिम टप्प्यात आली आहे. मान्सूनच्या परतीच्या प्रवासाबाबत सांगायचे तर, सोमवारी संपूर्ण सिक्कीम, झारखंड, छत्तीसगडसह आसाम, मेघालय, पश्चिम बंगाल, आंध्र प्रदेश, ओडिशा, तेलंगणा आणि कर्नाटकाच्या काही भागांतून मान्सूनने पूर्णपणे एक्झिट घेतली आहे. पुढील 2 ते 3 दिवसांत संपूर्ण देशातून मान्सून माघारी फिरेल आणि दक्षिण भारतात ईशान्य मोसमी वारे म्हणजेच ईशान्य मान्सून सक्रिय होण्यासाठी अनुकूल वातावरण तयार होण्याची दाट शक्यता आहे.