गडचिरोलीत शहीद पोलीस जवानांच्या घरी जाऊन अधिकाऱ्यांनी वाहिली आदरांजली

गडचिरोली : कर्तव्य बजावताना वीरगती मिळालेल्या पोलीस जवानांची आठवण म्हणून देशभर पोलीस प्रशासनातर्फे 21 ऑक्टोबर हा दिवस हुतात्मा दिन म्हणून पाळला जातो. याच निमित्ताने गडचिरोलीत पोलीस स्मृती दिन साजरा झाला. शहीदांच्या कुटुंबीयांचा सन्मान करण्यासाठी खास सोहळाही ठेवण्यात आला होता. याशिवाय पोलीस अधीक्षक एम. रमेश यांच्यासह वरिष्ठ अधिकाऱ्यांनी शहीदांच्या घरी जाऊन कुटुंबीयांशी संवाद साधला आणि त्यांच्या त्यागाबद्दल कृतज्ञता व्यक्त केली.

देशाच्या अंतर्गत सुरक्षेसाठी आणि नागरिकांच्या संरक्षणासाठी प्राणांची आहुती देणाऱ्या शूर पोलीस अधिकारी आणि अंमलदारांच्या शौर्याची आठवण ठेवण्यासाठी पोलीस अधीक्षक कार्यालयात पोलीस स्मृती दिनाचा कार्यक्रम झाला. त्याचबरोबर पोलीस महासंचालक सदानंद दाते यांच्या संकल्पनेतून मुख्यालयातील एकलव्य हॉल आणि उपमुख्यालय प्राणहिता येथे शहीद कुटुंब सन्मान सोहळा घेण्यात आला.

माओवाद्यांच्या हल्ल्यात शहीद झालेल्या जवानांचे कुटुंबीय या कार्यक्रमाला हजर होते. वरिष्ठ पोलीस अधिकाऱ्यांनी त्यांच्याशी बोलून त्यांच्या भावना समजून घेतल्या. आस्थेने विचारपूस करून त्यांच्या अडचणी आणि समस्याही जाणून घेतल्या. सोहळ्यात शहीद कुटुंबांतील सर्व सदस्यांना स्मृतिचिन्ह, सन्मानपत्र आणि भेटवस्तू देण्यात आल्या.

पोलीस अधीक्षक एम. रमेश यांच्यासह वरिष्ठ अधिकाऱ्यांनी जिल्ह्यातील पोस्टे, उपपोस्टे आणि पोमकें हद्दीत राहणाऱ्या सर्व शहीद कुटुंबांच्या घरी प्रत्यक्ष जाऊन कृतज्ञता व्यक्त केली. म्हणजेच सोहळ्यात आलेल्या कुटुंबांसोबतच जिल्ह्यातील इतर शहीद कुटुंबांपर्यंतही अधिकारी स्वतः पोहोचले.

मार्गदर्शन करताना एम. रमेश म्हणाले की, शहीदांचे स्मरण करणे, त्यांच्या कुटुंबीयांबद्दल आदर व्यक्त करणे आणि त्यांच्या त्यागाची जाणीव समाजात कायम ठेवणे हाच पोलीस स्मृती दिनाचा खरा संदेश आहे. कर्तव्य बजावताना सर्वोच्च बलिदान देणाऱ्या पोलीस अधिकारी आणि अंमलदारांचे योगदान नेहमीच प्रेरणादायी राहिले आहे, असेही त्यांनी सांगितले.

त्यांच्या म्हणण्यानुसार, या जवानांच्या शौर्यामुळे आणि समर्पणामुळे आज गडचिरोली जिल्हा माओवादापासून मुक्त झाला असून जिल्हा विकासाच्या दिशेने वाटचाल करत आहे. शहीद जवानांचे बलिदान फक्त पोलीस दलासाठीच नाही, तर संपूर्ण समाजासाठी अभिमानाची गोष्ट आहे, असे ते म्हणाले.

शहीद कुटुंबांच्या पाठीशी गडचिरोली पोलीस दल नेहमी खंबीरपणे उभे आहे, असे सांगून एम. रमेश यांनी स्पष्ट केले की, त्यांच्या सुख-दुःखात सहभागी होणे आणि त्यांना आवश्यक ते सहकार्य करणे ही पोलीस दलाची जबाबदारी आहे.

कार्यक्रमाला अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकुल राज जी, अपर पोलीस अधीक्षक (अहेरी) हर्षवर्धन बी.जे., प्रभारी सहा. पोलीस अधीक्षक (गडचिरोली) सुयशकुमार सिंग आणि पोलीस उपअधीक्षक (अभियान) सुनील ऊईके हे प्रामुख्याने उपस्थित होते.