गडचांदुरात वाढदिवसाचा खर्च टाळून औद्योगिक क्षेत्रातील सुपरवायझर्सचा सत्कार

गडचांदूर येथे औद्योगिक क्षेत्रातील सुपरवायझर्सचा सन्मान सोहळा उत्साहात पार पडला. उद्योगांच्या प्रगतीला हातभार लावणाऱ्या आणि या क्षेत्राच्या विकासात महत्त्वाचे योगदान देणाऱ्या सुपरवायझर्सचा यावेळी सत्कार करण्यात आला.

स्थानिक उद्योजक आणि नैसर्गिक पर्यावरण संवर्धन व मानवता विकास संस्थेचे नागपूर विभाग सचिव पंडित काळे यांचा वाढदिवस होता. या निमित्ताने वाढदिवसाचा खर्च अनावश्यक गोष्टींवर न करता, औद्योगिक क्षेत्रात सतत मेहनत घेणाऱ्या सुपरवायझर्सचा सत्कार करण्याचा स्तुत्य उपक्रम राबवण्यात आला. हा कार्यक्रम गडचांदूर येथील ज्येष्ठ नागरिक भवनात झाला आणि त्याला विविध क्षेत्रांतील मान्यवर उपस्थित होते.

कार्यक्रमाची सुरुवात मान्यवरांच्या हस्ते छ. शिवाजी महाराज यांच्या प्रतिमेचे पूजन करून झाली. स्मिता विरूटकर यांनी प्रास्ताविकात कार्यक्रमामागची भूमिका स्पष्ट केली. मयुरी मालेकर यांनी उपस्थित मान्यवरांचे स्वागत केले, पंडित काळे यांना वाढदिवसाच्या शुभेच्छा दिल्या आणि आपले मनोगतही मांडले.

औद्योगिक क्षेत्राचे काम सुरळीत चालण्यासाठी सुपरवायझर्सची भूमिका अत्यंत महत्त्वाची असते. कामगार आणि व्यवस्थापन यांच्यात समन्वय साधण्यासोबतच उत्पादन प्रक्रिया, कामाची गुणवत्ता आणि वेळेचे नियोजन या जबाबदाऱ्या ते समर्थपणे सांभाळतात. त्यांच्या या योगदानाची दखल घेऊन त्यांना सन्मानित करण्यात आले.

या सोहळ्यात अतुल मत्ते, मनोज थेरे, गौतम झाडे, स्वप्नील जीवतोडे, सचिन तिवारी, विनोद पटले, नितीन सोनटक्के, नंदू वडस्कर, कुणाल देवगडे, योगेश क्षीरसागर, अमित झाडे, ज्ञानेश्वर बोबडे, विजय क्षीरसागर, श्रीनु दसापुरे, महादेव वाटेकर, विनय वासेकर, कुंदन पुणेकर, अमोल लांडे, रब्बे अलाम, सचिन गिरडकर, देवेंद्र पारखी, हेमंत बाविस्कर, आकाश टिपले, निर्हाल खेडेकर आणि ऋषी चौथाले या सुपरवायझर्सचा गौरव झाला. याशिवाय आदिव स्नेहल विकास डोके या मुलाचाही गिनिज बुक ऑफ वर्ल्डमध्ये नोंद झाल्याबद्दल विशेष सन्मान करण्यात आला.

कार्यक्रमाच्या अध्यक्षस्थानी माजी प्राचार्य बी. एन. मोहितकर होते. प्रमुख पाहुण्यांमध्ये गडचांदूरचे नगराध्यक्ष निलेश ताजने, सभापती रामसेवक मोरे, नगरसेवक महेश आवारी, विठ्ठल थिपे, पवन राजुरकर आणि बादल बेले यांचा समावेश होता. महाराष्ट्र राज्य अध्यक्ष नैसर्गिक पर्यावरण संवर्धन व मानवता विकास संस्था, उद्योजक तथा नागपूर विभाग सचिव पंडित काळे, आशिष देरकर, नरेंद्र देशकर, अविनाश दोरखंडे, श्रीरंग ढोबळे, मनोज तेलीवार, रवी बुटले आदीही उपस्थित होते. मान्यवरांनी पंडित काळे यांना वाढदिवसाच्या आणि पुढील वाटचालीसाठी शुभेच्छा दिल्या.

कार्यक्रमाचे सूत्रसंचालन विशाल शेंडे यांनी केले, तर संघमित्रा ताकसांडे यांनी उपस्थितांचे आभार मानले. प्रत्यक्ष काम करणाऱ्या कर्मचाऱ्यांच्या योगदानाचा वाढदिवसाच्या निमित्ताने केलेला हा गौरव सामाजिक बांधिलकी आणि सहकाऱ्यांप्रती कृतज्ञता दाखवणारा ठरला. सुपरवायझर्सच्या कामाचा सन्मान झाल्यामुळे उपस्थितांमध्ये उत्साहाचे वातावरण होते.