गोंदिया-वडसा आणि वडसा-चांदाफोर्ट मेमू आता आरमोरीपर्यंत धावणार

गोंदिया ते वडसा आणि वडसा ते चांदाफोर्ट (चंद्रपूर) या दोन मेमू रेल्वेगाड्या आता आरमोरी रेल्वेस्थानकापर्यंत धावणार आहेत. रेल्वे मंत्रालयाने या विस्ताराला मंजुरी दिली असून रेल्वे बोर्डाने 10 ऑक्टोबर 2026 रोजी त्यासंबंधीचे अधिकृत पत्र जारी केले आहे. देसाईगंज येथून मिळालेल्या माहितीनुसार, यामुळे आरमोरीतील लोकांची रेल्वेसेवेची जुनी मागणी पूर्ण होण्याच्या दिशेने महत्त्वाचे पाऊल पडले आहे.

आरमोरी परिसरातील नागरिकांना रेल्वेची सोय मिळावी, ही मागणी अनेक दिवसांपासून वेगवेगळ्या पातळ्यांवर मांडली जात होती. वडसा ते आरमोरीपर्यंत रेल्वेमार्गाचे काम पूर्ण झाल्यानंतर माजी आमदार कृष्णा गजबे यांनी मुख्यमंत्री, केंद्रीय मंत्री आणि रेल्वेमंत्र्यांकडे पत्रव्यवहार करून ही सेवा सुरू करण्याची मागणी केली होती. विद्यार्थी, व्यापारी, नोकरदार, शेतकरी आणि सर्वसामान्य प्रवाशांना आर्थिकदृष्ट्या दिलासा देणारी ही सेवा महत्त्वाची होती. आता दोन मेमू गाड्यांच्या विस्ताराला मंजुरी मिळाल्याने आरमोरीकरांच्या स्वप्नाला बळ मिळाले आहे.

माजी खासदार अशोक नेते यांनी वडसा ते गडचिरोली या प्रस्तावित रेल्वेमार्गासाठी पाठपुरावा केला होता. त्यानंतर या कामाला प्रत्यक्ष सुरुवात झाली. वनविभागाचे अडथळे पार करत हा मार्ग आरमोरीपर्यंत पूर्ण झाला आहे, तर गडचिरोलीपर्यंतच्या पुढच्या मार्गाचे काम सुरू आहे.

आरमोरीपर्यंत रेल्वे धावण्यास मंजुरी मिळाल्याबद्दल माजी आमदार गजबे यांनी पंतप्रधान नरेंद्र मोदी, केंद्रीय रेल्वेमंत्री अश्विनी वैष्णव, महाराष्ट्राचे मुख्यमंत्री आणि गडचिरोली जिल्ह्याचे पालकमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांचे आभार मानले. केंद्र आणि राज्य सरकारच्या सहकार्यामुळे आरमोरीच्या रेल्वे कनेक्टिव्हिटीच्या दृष्टीने महत्त्वपूर्ण प्रगती झाली, अशी भावना त्यांनी व्यक्त केली.

रेल्वे बोर्डाच्या मंजुरीनुसार गाडी क्रमांक 68806 गोंदिया-वडसा मेमू आरमोरीपर्यंत वाढवली जाईल. ही गाडी गोंदियाहून सायंकाळी 7.10 वाजता सुटेल आणि रात्री 9.30 वाजता वडसा येथे पोहोचेल. तेथून रात्री 9.35 वाजता निघून रात्री 10 वाजता आरमोरी रेल्वेस्थानकावर येईल.

तसेच गाडी क्रमांक 68808 वडसा-चांदाफोर्ट मेमू आरमोरीपासून सुरू करण्यास मंजुरी देण्यात आली आहे. ही गाडी सकाळी 6.30 वाजता आरमोरीहून सुटेल, सकाळी 7.05 वाजता वडसा येथे पोहोचेल आणि 7.15 वाजता चांदाफोर्टच्या दिशेने निघेल. चांदाफोर्ट येथे ती सकाळी 9.55 वाजता पोहोचेल.

दोन्ही गाड्यांच्या विस्तारास मंजुरी देताना रेल्वे बोर्डाने शक्य तितक्या लवकर सोयीस्कर तारखेपासून सेवा सुरू करण्याचे निर्देश दिले आहेत. मात्र प्रत्यक्ष सेवा कोणत्या तारखेला सुरू होणार, ते अद्याप जाहीर झालेले नाही.