वर्धा पोलीस अधीक्षकांचे आवाहन: दिवाळीत फटाके नियमाने फोडा, शांतता आणि सुरक्षा राखा

दिवाळी आणि त्यानंतर येणारे इतर सण शांततेत, सुरक्षितपणे आणि प्रदूषणाशिवाय साजरे व्हावेत, यासाठी वर्धा जिल्हा पोलीस प्रशासनाने उपाययोजना सुरू केल्या आहेत. जिल्ह्यात कायदा व सुव्यवस्था टिकवणे, नागरिकांची सुरक्षितता पाहणे आणि ध्वनी तसेच वायुप्रदूषण आटोक्यात ठेवणे, हा यामागचा उद्देश आहे.

वर्धा जिल्ह्याचे पोलीस अधीक्षक सौरभ कुमार अग्रवाल यांनी जिल्ह्यातील सर्व नागरिक, व्यापारी, फटाके विक्रेते आणि व्यावसायिकांनी प्रशासनाच्या सूचना व नियमांचे काटेकोरपणे पालन करावे, असे आवाहन वर्धा पोलीस दलाच्या वतीने केले आहे. दिवाळी हा आनंद, उत्साह आणि प्रकाशाचा सण आहे आणि तो सर्वांनी सुरक्षित वातावरणात साजरा करणे गरजेचे आहे, असे त्यात म्हटले आहे.

सणांच्या काळात फटाक्यांची आतिषबाजी, गर्दी, वाहतुकीची वर्दळ आणि सार्वजनिक ठिकाणचे कार्यक्रम यांमुळे अपघात, आग, ध्वनीप्रदूषण आणि कायदा व सुव्यवस्थेचे प्रश्न निर्माण होण्याची शक्यता असते. त्यामुळे प्रत्येकाने सामाजिक जबाबदारीचे भान ठेवून प्रशासनाला सहकार्य करावे, असेही पोलिसांनी सांगितले.

फटाके फोडण्याबाबत सर्वोच्च न्यायालय आणि शासनाच्या निर्देशांनुसार रात्री १०.०० ते सकाळी ६.०० या वेळेत फटाके फोडण्यास मनाई आहे. ही वेळ सर्वांनी पाळावी. फक्त अधिकृत आणि मान्यताप्राप्त फटाक्यांचीच खरेदी-विक्री करावी, प्रतिबंधित किंवा नियमबाह्य फटाक्यांची विक्री अथवा वापर करू नये.

लहान मुले, ज्येष्ठ नागरिक, गर्भवती महिला, रुग्ण आणि श्वसनाचा त्रास असलेल्या व्यक्तींना फटाक्यांचा त्रास होणार नाही, याची काळजी घ्यावी. रुग्णालये, शैक्षणिक संस्था, न्यायालये आणि इतर शांतता क्षेत्रांच्या परिसरात ध्वनीप्रदूषणाचे नियम पाळावेत.

फटाके मोकळ्या जागेत फोडावेत. घराच्या आत, बंदिस्त जागेत, वाहनांजवळ किंवा ज्वलनशील पदार्थांच्या आसपास फटाके फोडू नयेत. जवळ पाणी आणि आग विझवण्यासाठी लागणारे साहित्य ठेवावे. लहान मुलांनी मोठ्यांच्या देखरेखीखालीच फटाके फोडावेत. फटाके फोडून झाल्यावर उरलेला कचरा सुरक्षितपणे लावावा आणि न फुटलेला फटाका पुन्हा पेटवण्याचा प्रयत्न करू नये.

फटाके विक्रेते आणि व्यावसायिकांसाठीही सूचना आहेत. विक्री फक्त सक्षम प्राधिकरणाने दिलेल्या वैध परवान्याच्या आधारेच करावी. विक्रीच्या जागी अग्निसुरक्षेची साधने ठेवावीत, अग्निशामक यंत्र, पाण्याची व्यवस्था आणि आपत्कालीन बाहेर पडण्याचा मार्ग व्यवस्थित ठेवावा. दुकानांमध्ये विद्युत उपकरणे, ज्वलनशील पदार्थ आणि आग लागण्याची शक्यता असलेल्या वस्तूंबाबत विशेष दक्षता घ्यावी. परवानाधारक विक्रेत्यांनी नियमबाह्य, प्रतिबंधित किंवा विनापरवाना फटाके विकू नयेत.

कायदा व सुव्यवस्थेबाबत नागरिकांना असे आवाहन आहे: सणांच्या काळात अफवा, आक्षेपार्ह संदेश किंवा समाजात तेढ निर्माण करणाऱ्या पोस्ट सोशल मीडियावर पसरवू नयेत. धार्मिक भावना दुखावतील किंवा दोन समाजांत तेढ निर्माण होईल, असे कृत्य करू नये. सार्वजनिक ठिकाणी परवानगीशिवाय मिरवणुका, ध्वनिक्षेपक किंवा इतर कार्यक्रम घेऊ नयेत.

दारू पिऊन वाहन चालवू नये, वाहतुकीचे नियम पाळावेत आणि स्वतःसह इतरांच्या सुरक्षिततेची काळजी घ्यावी. बाजारपेठा, गर्दीची ठिकाणे आणि सार्वजनिक परिसरात संशयास्पद व्यक्ती किंवा वस्तू दिसल्यास लगेच जवळच्या पोलीस ठाण्याशी संपर्क साधावा. कोणतीही अनुचित घटना घडली किंवा कायदा व सुव्यवस्थेला बाधा येण्याची शक्यता वाटली, तर पोलिसांना तात्काळ कळवावे.

पोलिसांच्या तयारीबद्दल सांगण्यात आले की, जिल्ह्यातील सर्व पोलीस ठाण्यांच्या हद्दीत आवश्यक बंदोबस्त, नियमित गस्त, संवेदनशील ठिकाणी विशेष लक्ष आणि बाजारपेठांमध्ये पेट्रोलिंग सुरू आहे. प्रतिबंधात्मक उपाययोजनाही केल्या जात आहेत. नागरिकांच्या सुरक्षिततेसाठी पोलीस यंत्रणा सतर्क असून नियम मोडणाऱ्यांवर प्रचलित कायद्यानुसार योग्य ती कायदेशीर कारवाई केली जाईल.

सण हे आनंद, बंधुभाव आणि सामाजिक सलोखा वाढवणारे असावेत, असे सांगत पोलीस अधीक्षक सौरभ कुमार अग्रवाल यांनी नागरिकांनी प्रशासन आणि पोलीस दलाला सहकार्य करून दिवाळी व पुढील सर्व सण शांततेत, सुरक्षितपणे आणि पर्यावरणपूरक पद्धतीने साजरे करावेत, असे आवाहन केले आहे.

वर्धा जिल्हा पोलीस प्रशासनाचा संदेश: "सण आनंदाचा, संकल्प सुरक्षिततेचा, दिवाळी प्रदूषणमुक्त आणि वर्धा जिल्हा शांततापूर्ण!"