समृद्धी महामार्गावर भिंतींना भगदाडे, नेटवर्क नसलेल्या भागांचा गुन्हेगारांना फायदा

छत्रपती संभाजीनगरातील समृद्धी महामार्गावर प्रवाशांना लक्ष्य करण्याचे प्रकार वाढल्याचे समोर आले आहे. महामार्गाच्या संरक्षण भिंतींना पडलेली भगदाडे आणि मोबाइल नेटवर्क नसलेले भाग यांचा गुन्हेगार फायदा घेत आहेत. भिंत तोडून महामार्गावर यायचे, लुटमार करायची आणि त्याच मार्गाने पसार व्हायचे, असा प्रकार घडत असल्याचे सांगितले जात आहे. या उणिवा दूर करण्यासाठी आता पोलीस प्रशासनाने पुढाकार घेतला आहे.

पोलीस उपायुक्त पंकज अतुलकर यांनी याबाबत माहिती दिली. तुटलेल्या भिंतींची दुरुस्ती केली जाईल, नो नेटवर्क झोनमध्ये मोबाइल टॉवर उभारले जातील आणि आपत्कालीन संपर्कासाठी एसओएस सुविधा उपलब्ध करून दिली जाईल, असे त्यांनी सांगितले.

अतुलकर यांनी समृद्धी महामार्गावरील सावंगी इंटरचेंज येथील नियंत्रण कक्षाला भेट दिली. तिथे एमएसआरडीसी, महामार्ग सुरक्षा यंत्रणा आणि टोल प्रशासनाच्या अधिकाऱ्यांशी त्यांनी चर्चा केली. प्रत्यक्ष काम करणारे अधिकारी आणि कर्मचारी यांच्याकडून त्यांच्या अडचणीही त्यांनी जाणून घेतल्या.

महामार्गावरील काही भागांत मोबाइल नेटवर्क नाही. त्यामुळे आपत्कालीन परिस्थितीत कोणाशीही संपर्क साधता येत नाही. अशा ठिकाणी मोबाइल कंपन्यांचे टॉवर उभारण्यासाठी तसेच एसओएस लँडलाइन सुविधा सुरू करण्यासाठी प्रयत्न केले जाणार आहेत.

महामार्गाच्या काही ठिकाणी संरक्षण भिंती तोडलेल्या आहेत, त्यामुळे गुन्हेगारांना आत येण्याचा आणि बाहेर जाण्याचा मार्ग मिळत आहे. अशा जागांची दुरुस्ती व्हावी म्हणून संबंधित विभागाला पत्र पाठवले जाणार आहे.

टोलनाक्यावरील आणखी एक त्रुटीही समोर आली आहे. फास्टॅगवर नोंद असलेला वाहन क्रमांक आणि प्रत्यक्ष वाहनाचा क्रमांक जुळत नसतानाही ते वाहन सोडले जात आहे. सॉफ्टवेअरमधील हा दोष दूर करण्यासाठी संबंधित अधिकाऱ्यांना सूचना दिल्या जाणार आहेत.

वेगवेगळ्या यंत्रणांमध्ये संपर्कासाठी समान प्रोटोकॉल नाही. म्हणून वायरलेस यंत्रणेतही सुधारणा करण्यावर भर राहणार आहे.

महामार्गावर एखादी घटना घडल्यानंतर पोलीस ठाण्यांच्या हद्दीवरून वाद होऊ नयेत, यासाठी अतुलकर यांनी एक गोष्ट स्पष्ट केली. पीडितांनी आधी जवळच्या पोलीस ठाण्यात तक्रार नोंदवावी. त्यानंतर संबंधित हद्द निश्चित करून गुन्हा त्या ठाण्याकडे वर्ग केला जाईल.

समृद्धी महामार्गावर अपघात झाला, लुटमार झाली, संशयास्पद हालचाली दिसल्या किंवा वाहनातील इंधन संपल्याने कोणी अडचणीत असल्याचे दिसले, तर तातडीने ११२ वर संपर्क साधावा, असे आवाहन अतुलकर यांनी केले. जवळचे पोलीस वाहन मदतीसाठी पोहोचेल, असे त्यांनी सांगितले. तसेच प्रवासादरम्यान आपले लोकेशन कुटुंबीयांना पाठवून ठेवावे, असेही ते म्हणाले.