दिवाळीत नागपूर स्टेशनवर प्रवाशांचे हाल: उत्तर भारताच्या गाड्यांत क्षमतेपेक्षा जास्त गर्दी, सुरक्षारक्षक

दिवाळीच्या सणानिमित्त गावी निघालेल्या प्रवाशांची संख्या वाढल्यामुळे नागपूर रेल्वे स्टेशनवर प्रचंड गर्दी उसळली आहे. उत्तर भारताकडे जाणाऱ्या नियमित रेल्वेगाड्यांमध्ये क्षमतेपेक्षा जास्त प्रवासी प्रवास करत असल्याचे चित्र आहे.

रेल्वे प्रशासन विशेष गाड्या सुरू केल्याचे सांगत आहे. तरीही प्रत्यक्षात प्रवाशांची गैरसोय कमी झालेली नाही. फलाटांवरील गर्दी, डब्यात चढताना होणारी धक्काबुक्की आणि सुरक्षारक्षकांची अपुरी उपस्थिती यामुळे प्रवाशांना मोठा त्रास सहन करावा लागत आहे.

दिवाळीनिमित्त गोरखपूर, दिल्ली, लखनऊ आणि पाटणा या शहरांकडे जाणाऱ्या गाड्यांमध्ये प्रचंड गर्दी होत आहे. त्यातही जनरल आणि स्लीपर डब्यांची अवस्था सर्वात बिकट आहे. डब्यात शिरण्यासाठी झटापट करावी लागते आणि श्वास घेणेदेखील कठीण झाले आहे. फलाटावर गाडी येताच डब्यात शिरण्यासाठी प्रवाशांची एकच धावपळ सुरू होते.

हातातले सामान आणि मोठ्या बॅगा सांभाळत प्रवाशांना दरवाजातून आत जाण्यासाठी झुंज द्यावी लागत आहे. डब्यांत आधीच क्षमतेपेक्षा जास्त प्रवासी असल्याने उभे राहायलाही जागा मिळत नाही. विशेष गाड्यांची घोषणा झाल्यानंतरही परिस्थितीत फारसा फरक पडलेला नसल्याने रेल्वेच्या नियोजनावर प्रश्नचिन्ह उभे राहिले आहे.

स्टेशनवर एवढी मोठी गर्दी असूनही सुरक्षेची जबाबदारी असलेल्या कर्मचाऱ्यांची उपस्थिती प्रभावीपणे जाणवत नाही. उत्तर भारताकडे जाणाऱ्या गाड्यांजवळ गर्दी आवरण्यासाठी पुरेसे सुरक्षारक्षक दिसत नसल्याने प्रवाशांच्या सुरक्षिततेचा प्रश्न ऐरणीवर आला आहे.

गाडीत चढताना होणारी धक्काबुक्की आणि दरवाजाजवळची गर्दी पाहता अपघाताची शक्यता नाकारता येत नाही. अशा वेळी एखादी दुर्घटना घडली तर जबाबदारी कोणाची, असा सवाल विचारला जात आहे. गर्दीच्या काळात फलाटांवर जादा सुरक्षारक्षक तैनात करणे आणि प्रवाशांना शिस्तीने डब्यात सोडणे गरजेचे असताना त्याकडे दुर्लक्ष होत असल्याची भावना प्रवाशांमध्ये आहे.

अनेक दिवस आधी आरक्षित तिकीट काढूनही प्रवाशांना आपल्या बर्थपर्यंत पोहोचण्यासाठी मोठी कसरत करावी लागत आहे. स्लीपर डब्यांत अनारक्षित प्रवाशांची गर्दी झाल्याने आरक्षित प्रवाशांनाही अडचणी येत आहेत. वातानुकूलित डब्यांतही परिस्थिती फारशी वेगळी नाही. काही प्रवाशांना शौचालयाजवळच्या जागेत जमिनीवर बसून प्रवास करावा लागत आहे.

डब्यांमधील मार्गिका आणि शौचालयांकडे जाणारे रस्तेही प्रवाशांनी भरून गेले आहेत. याचा सर्वाधिक त्रास महिला, लहान मुले आणि ज्येष्ठ नागरिकांना होत आहे. गर्दीमुळे महिलांच्या सुरक्षिततेचा आणि वैयक्तिक गोपनीयतेचाही प्रश्न निर्माण झाला आहे. घरी पोहोचण्याच्या आनंदात निघालेल्या प्रवाशांचा प्रवास मात्र गैरसोय, अस्वस्थता आणि धक्काबुक्कीमुळे त्रासदायक ठरत आहे.