दिवाळीसाठी घरीच बनवा दुकानासारखे मऊ बुंदीचे लाडू, फ्रिजमध्ये ७ दिवस टिकतात

दिवाळी म्हटलं की मिठाई आलीच, आणि मिठाईत बुंदीचा लाडू सगळ्यांचा आवडता. दुकानातून आणलेले लाडू खायला छान लागतात, पण घरी बनवलेल्या लाडूची चवच वेगळी असते. घरी बनवताना गोड किती ठेवायचं हे आपल्या हातात असतं. खर्च कमी होतो आणि लाडूही जास्त बनतात. सणाच्या दिवशी घरी मिठाई बनवण्याचा आनंद वेगळाच असतो. दुकानासारखे मऊ, रसाळ बुंदीचे लाडू घरी कसे करायचे, ते पाहूया.

बुंदीसाठी साहित्य असं लागेल: बेसन 2 कप, चिमूटभर केशरी खाद्य रंग, लागेल तसं पाणी, पाव चमचा खायचा सोडा आणि तळण्यासाठी तेल.

पाकासाठी साहित्य असं: दीड कप साखर, एक कप पाणी, पाव चमचा केशरी खाद्य रंग, अर्धा चमचा वेलची पूड, एक चमचा लिंबाचा रस आणि 2 चमचे पिस्ता.

सुरुवात बुंदीपासून करा. एका मोठ्या भांड्यात 2 कप बेसन घ्या. त्यात चिमूटभर केशरी रंग टाका आणि थोडं थोडं पाणी घालून पीठ कालवा. पिठात गुठळ्या राहता कामा नयेत, हे लक्षात ठेवा.

पीठ कसं असावं हे खूप महत्त्वाचं आहे. ते जास्त घट्ट असेल तर बुंदीला शेपटी येते आणि जास्त पातळ असेल तर बुंदी चपटी होते. म्हणून पीठ मध्यम ठेवा. पीठ तयार झालं की शेवटी त्यात पाव चमचा खायचा सोडा घालून हलकं हलवा.

आता कढईत तेल गरम करायला ठेवा. तेल चांगलं तापलं की हातात चाळणी घ्या, तिच्यावर थोडं पीठ टाका आणि ते हळूहळू गरम तेलात सोडा. पीठ चाळणीतून थेंब थेंब पडलं पाहिजे, तरच गोल गोल बुंदी तयार होते. एकाच वेळी खूप बुंदी टाकू नका, नाहीतर त्या एकमेकांना चिकटतात. बुंदी कुरकुरीत झाली की बाहेर काढा आणि किचन पेपरवर ठेवा, म्हणजे जास्तीचं तेल निघून जाईल.

आता पाक करायचा. एका पातेल्यात दीड कप साखर आणि एक कप पाणी घ्या आणि हे 2 मिनिटं उकळू द्या. पाक चिकट करायचा नाही, तो पातळच ठेवायचा आहे. पाक झाला की गॅस बंद करा. मग या गरम पाकात केशरी रंग, एक चमचा लिंबाचा रस आणि अर्धा चमचा वेलची पूड घाला. लिंबाचा रस घातल्यामुळे पाकात गोळे होत नाहीत, हे लक्षात ठेवा.

आता लाडू वळायची वेळ आली. तयार पाकात तळलेली बुंदी, कापलेले पिस्ते आणि काजू घाला आणि सगळं नीट मिसळा. पाक प्रत्येक बुंदीला लागला पाहिजे.

मिश्रण थोडं कोमट झालं की लाडू वळायला घ्या. ते जास्त गरम असेल तर हात भाजेल आणि जास्त थंड झालं तर लाडू वळले जाणार नाहीत. म्हणून कोमट असतानाच हळुवारपणे लाडू वळा.

असे तयार झाले दुकानासारखे बुंदीचे लाडू. ते फ्रिजमध्ये ठेवले तर 7 दिवस आरामात टिकतात. दिवाळीत पाहुणे आले की पटकन बाहेर काढून द्यायचे. या दिवाळीत एकदा तरी हे लाडू घरी बनवून बघा, घरच्यांना खूप आवडतील.