भाजणीशिवाय झटपट कुरकुरीत बटर चकली; दिवाळीच्या फराळासाठी सोपी रेसिपी

दिवाळीनिमित्त घरोघरी फराळाचे वेगवेगळे पदार्थ बनवले जातात. या पदार्थांमध्ये चकली आवर्जून केली जाते. कुरकुरीत चकलीशिवाय फराळाचे ताट पूर्ण झाल्यासारखे वाटत नाही.

चकली बनवताना प्रामुख्याने वेगवेगळ्या डाळींची भाजणी तयार केली जाते. पण भाजणी करताना काही चुका झाल्या, तर पदार्थाची चव पूर्णपणे बिघडून जाते. शिवाय भाजणी बनवण्याचा अनेकांना खूप कंटाळा येतो. अशा वेळी भाजणीचा वापर न करता चकल्या बनवता येतात.

या पद्धतीने बनवलेली बटर चकली चवीला अतिशय सुंदर लागते आणि सगळेच तुमचे कौतुक करतील. ही चकली कमी वेळात झटपट तयार होते. चला तर आता ही रेसिपी जाणून घेऊया.

साहित्य म्हणून चणा डाळ, मूग डाळ, उडीद डाळ, पाणी, तांदळाचे पीठ, पांढरे तीळ, ओवा, लाल तिखट मसाला, हळद, हिंग, मीठ, धणे जिरे पावडर, बटर, कोमट गरम पाणी आणि तेल लागते.

बटर चकली बनवण्यासाठी सर्वप्रथम एका मोठ्या वाटीमध्ये चणा डाळ, पिवळी मूग डाळ आणि उडीद डाळ एकत्र करा. ही डाळ पाण्याने तीन वेळा धुवून घ्या. त्यानंतर डाळ तासभर भिजू द्या.

तासभर भिजल्यानंतर डाळ कुकरच्या भांड्यात टाका आणि व्यवस्थित मऊ होईपर्यंत शिजवून घ्या. डाळ शिजवताना त्यात जास्त पाणी घालू नये.

आता एक मोठे ताट घ्या. त्यात तांदळाचे पीठ, पांढरे तीळ, ओवा, लाल तिखट, हळद, हिंग, चवीनुसार मीठ, धणे जिरे पावडर आणि बटर घाला. हे सगळे मिश्रण व्यवस्थित एकत्र करा.

त्यानंतर या मिश्रणात शिजवून घेतलेली डाळ घाला. मग कोमट पाण्याने पीठ हळूहळू मळून घ्या. मळून घेतलेल्या पिठावर सुटी कापड टाकून त्यावर झाकण ठेवा.

यानंतर कढईमध्ये तेल गरम करण्यासाठी ठेवा. तेल गरम झाले की तयार केलेल्या चकल्या त्यात टाका आणि मंद आचेवर दोन्ही बाजूंनी कुरकुरीत होईपर्यंत तळून घ्या.

अशा पद्धतीने भाजणीचा वापर न करता बनवलेल्या बटर चकल्या तयार होतात. यंदाच्या दिवाळीत फराळाच्या ताटासाठी ही कृती नक्की करून पाहता येईल.