नवी मुंबई-सिंधुदुर्ग विमानसेवेचे बुकिंग सुरू, १६ नोव्हेंबरपासून चिपीला थेट विमान; तिकीट ३५०० ते १२००० रुपये

कोकणात जायचे तर आतापर्यंत फक्त रस्ता किंवा रेल्वे या दोनच मार्गांवर अवलंबून राहावे लागत होते. आता कोकणात जाण्यासाठी हवाई मार्गही खुला होत आहे. सिंधुदुर्ग जिल्ह्यातील चिपी विमानतळ आणि नवी मुंबई यांच्यात थेट विमानसेवा १६ नोव्हेंबरपासून सुरू करण्याची तयारी झाली आहे. या सेवेचे बुकिंग सुरू झाले असून वेळापत्रकही जाहीर झाले आहे.

ही सेवा आठवड्यातील सातही दिवस उपलब्ध असेल. म्हणजे रविवारीसुद्धा प्रवाशांना विमानाने प्रवास करता येईल. सिंधुदुर्गातील लोकांना आणि कोकणात पर्यटनासाठी जाणाऱ्या प्रवाशांना यामुळे मोठा दिलासा मिळेल, असे सांगितले जात आहे.

महाराष्ट्र विमानतळ विकास कंपनीचे उपाध्यक्ष आणि व्यवस्थापकीय संचालक दीपक कपूर यांनी समाजमाध्यमांवरील पोस्टमधून या सेवेची महत्त्वाची माहिती दिली. रोजच्या विमानांचे वेळापत्रकही त्यांनी जाहीर केले आहे. पहिले विमान १६ नोव्हेंबर रोजी उड्डाण घेईल, हे मंत्री नितेश राणे यांनी एक्सवर पोस्ट करून सांगितले.

जाहीर झालेल्या वेळापत्रकानुसार विमान नवी मुंबई विमानतळावरून सकाळी ७:५५ वाजता निघेल आणि सकाळी ९:०५ वाजता सिंधुदुर्गातील चिपी विमानतळावर पोहोचेल. परतीचे विमान चिपी विमानतळावरून सकाळी ९:२५ वाजता नवी मुंबईच्या दिशेने झेपावेल आणि सकाळी १०:३५ वाजता नवी मुंबईत दाखल होईल.

ही सेवा फ्लाय 91 या विमान कंपनीकडून चालवली जाणार आहे. मंत्री नितेश राणे यांनी या बुकिंगचा एक स्क्रीनशॉट शेअर केला आहे. त्यातील माहितीनुसार नवी मुंबई-सिंधुदुर्ग प्रवासाचे तिकिटाचे दर ३५०० रुपयांपासून १२००० रुपयांपर्यंत आहेत.

चिपी विमानतळावरील विमान वाहतुकीला गती मिळावी आणि कोकणातील पर्यटन उद्योगाला चालना मिळावी, या हेतूने नवी मुंबई ते चिपी सेवा सुरू करण्याचा निर्णय घेण्यात आला. मुख्यमंत्र्यांच्या अध्यक्षतेखाली झालेल्या मंत्रिमंडळ बैठकीत या प्रस्तावाला मान्यता मिळाली होती. या सेवेसाठी एक वर्षाच्या कालावधीकरिता १६ कोटी ७४ लाख ६२ हजार रुपयांचा निधी मंजूर करण्यात आला आहे.

या सेवेमुळे नवी मुंबई आणि सिंधुदुर्ग या दोन्ही भागांतील प्रवासाचा वेळ मोठ्या प्रमाणात वाचेल. पर्यटन, व्यापार आणि व्यावसायिक कामांसाठी प्रवास करणाऱ्या नागरिकांना त्याचा फायदा होईल. सातही दिवस विमान उपलब्ध असल्याने सिंधुदुर्गची हवाई कनेक्टिव्हिटी अधिक मजबूत होण्यास मदत होईल.

दरम्यान, आगामी काही महिन्यांत रत्नागिरीतील अत्याधुनिक आणि आवश्यक सुविधांनी सज्ज असलेले विमानतळही सुरू होण्याची अपेक्षा आहे. हे विमानतळ सुरू झाल्यानंतर कोकणातील हवाई प्रवासाचे पर्याय आणखी वाढू शकतात.