हापूसची चार महिने आधीच बाजारात एन्ट्री, पहिल्या पेटीला २१ हजार रुपयांचा विक्रमी दर

रत्नागिरीचा जगप्रसिद्ध हापूस आंबा म्हटलं की सहसा डोळ्यांसमोर येतो तो फेब्रुवारी-मार्च महिन्यापासून सुरू होणारा आंब्याचा हंगाम. यंदा मात्र हापूसने तब्बल चार महिने आधीच बाजारात एन्ट्री घेतली आहे आणि सगळेच थक्क झाले आहेत. निसर्गाची अनोखी साथ आणि बागायतदारांची मेहनत यामुळे हे घडले, असे सांगितले जात आहे. विशेष म्हणजे, या हंगामापूर्वी बाजारात दाखल झालेल्या हापूसच्या पहिल्याच पेटीचा लिलाव २१ हजार रुपयांच्या विक्रमी दराने झाला.

हा अवकाळी हापूस रत्नागिरी तालुक्यातील गावखडी येथील प्रयोगशील आंबा बागायतदार दत्ताराम दाजी पडयार यांच्या बागेत तयार झाला. त्यांच्या बागेतील चार डझन म्हणजे ४८ नग हापूस आंब्यांची ही पहिली पेटी होती. रत्नागिरीतील प्रसिद्ध व्यापारी 'सतीश पवार बंधू' यांच्यामार्फत ही पेटी बाजारात विक्रीसाठी आणण्यात आली होती.

या पहिल्यावहिल्या पेटीला २१ हजार रुपयांचा मोठा दर मिळाला. त्यामुळे हिशोब केल्यास एका डझन आंब्यासाठी ५,२५० रुपये इतका दर मिळाला आहे. हा या मोसमातील सुरुवातीचा एक नवा विक्रम मानला जात आहे.

या पेटीचे पहिले ग्राहक होण्याचा मान कौस्तुभ दीक्षित यांनी मिळवला आहे. हंगामाच्या चार महिने आधी बाजारात आलेला हा पहिलावहिला राजापूर/रत्नागिरी हापूस आंबा त्यांनी २१ हजार रुपयांना खरेदी केला.

सामान्यतः हापूस आंब्याची आवक फेब्रुवारीच्या उत्तरार्धात किंवा मार्चमध्ये वेगाने सुरू होते. त्यामुळे ऑक्टोबर-नोव्हेंबरच्या सुमारासच असा तयार आणि दर्जेदार हापूस बाजारात उपलब्ध होणे ही अत्यंत दुर्मिळ घटना मानली जाते.

नेहमीचा नियमित हंगाम सुरू होण्यासाठी अजून काही महिन्यांचा कालावधी बाकी आहे. असे असतानाही पहिल्याच पेटीला मिळालेला २१ हजार रुपयांचा विक्रमी दर सध्या संपूर्ण कोकणात आणि आंबा बाजारपेठेत मोठा चर्चेचा विषय ठरला आहे. त्यामुळे व्यापारी आणि बागायतदारांमध्ये उत्साहाचे वातावरण आहे.