छत्रपती संभाजीनगरात भरदिवसा थरार: बालपणीच्या मित्राला कारने उडवले, दांडक्याने ठेचले

छत्रपती संभाजीनगरात गुरुवारी (22 ऑक्टेबर) सकाळी साडेदहाच्या सुमारास भरदिवसा एका तरुणाची हत्या झाली आणि संपूर्ण शहर हादरले. बजरंग चौक ते बळीराम पाटील चौक या रस्त्यावर ही घटना घडली. व्यावसायिक वर्चस्व आणि काही महिन्यांपूर्वी झालेल्या अपमानाचा राग यातून बालपणीच्या मित्रानेच आपल्या मित्राची निर्घृण हत्या केली आहे.

मृत तरुणाचे नाव देवेश उर्फ बंटी चंद्रेश दीक्षित (वय 37 वर्षे, रा. एन-7 परिसर) असे आहे. संशयित आरोपीचे नाव पवन दिलीप पाराशर (रा. एन-7 परिसर) असे आहे. हत्येनंतर पवन स्वतः सिडको पोलीस स्टेशनला गेला आणि त्याने आत्मसमर्पण केले.

मिळालेल्या माहितीनुसार, बंटी सिडको एन-7 परिसरात मेस चालवत होता. त्याशिवाय इतर व्यवसाय आणि सामाजिक कामातही तो सक्रिय होता. पवन हा त्याचा बालपणीचा मित्र होता आणि दोघे एकाच शाळेत शिकले होते. दोघेही स्थानिक हॉटेल आणि बारमध्ये सुरक्षा रक्षक, म्हणजे बाऊन्सर, पुरवण्याचे काम करत होते.

काही काळाने बाऊन्सर पुरवण्याच्या कामावरून आणि व्यावसायिक वर्चस्वावरून दोघांत वाद सुरू झाले. हा वाद हळूहळू विकोपाला गेला आणि दोघांमध्ये सातत्याने भांडणे होऊ लागली.

गुरुवारी सकाळी बंटी नेहमीप्रमाणे जिममध्ये गेला होता. तिथून घरी जाण्यासाठी साडेदहाच्या सुमारास तो आपल्या मोपेडवरून निघाला. त्या वेळी पवन कारने त्याचा पाठलाग करत होता. बंटी बजरंग चौकातून बळीराम पाटील चौकाच्या दिशेने वळताच पवनने कारचा वेग वाढवला. मंगेश गॅस एजन्सीसमोरच्या मुख्य रस्त्यावर त्याने बंटीच्या मोपेडला मागून जोरदार धडक दिली.

ही धडक इतकी भीषण होती की बंटी हवेत उडून रस्त्याच्या मधोमध आदळला. त्याची दुचाकी तब्बल 200 फूट दूर जाऊन पडली.

कारच्या धडकेने बंटी गंभीर जखमी झाला होता. तरीही पवनने लाकडी दांडक्याने त्याचे डोके आणि चेहरा ठेचला. रक्ताच्या थारोळ्यात पडलेल्या बंटीला तिथेच सोडून तो आपल्या कारने पळून गेला. मुख्य रस्त्यावर भरदिवसा घडलेल्या या प्रकाराने परिसरात प्रचंड घबराट पसरली.

हत्येनंतर पवन थेट सिडको पोलीस स्टेशनला पोहोचला आणि त्याने आत्मसमर्पण केले. या हत्येमागे आणखी काही मुख्य कारणे किंवा जुने वाद आहेत का, याचा सिडको पोलीस सखोल तपास करत आहेत.