शारजाहमध्ये कर्नाटकच्या तरुणाची हत्या, मृतदेहाचे तुकडे करून बॅगेत भरले

यूएईतील शारजाहमध्ये चांगल्या आयुष्याच्या शोधात गेलेल्या कर्नाटकातील एका तरुणाची जुलैमध्ये अत्यंत क्रूर पद्धतीने हत्या झाल्याचे समोर आले आहे. एल्विन प्रकाश कुंदर असे या तरुणाचे नाव असून त्यांच्या कुटुंबीयांनी ही धक्कादायक माहिती दिली आहे. हत्येनंतर त्यांच्या मृतदेहाचे तब्बल नऊ तुकडे करून ते दोन बॅगेत भरण्यात आल्याचे कुटुंबीयांचे म्हणणे आहे. ओमानच्या दिशेने जाणाऱ्या रस्त्यावर उभ्या असलेल्या एका कारमध्ये हा मृतदेह सापडला. या घटनेनंतर प्रकाश यांची पत्नी टीना आणि दहावीत शिकणारा त्यांचा मुलगा नेमके कुठे आहेत, याची अद्याप स्पष्ट माहिती मिळालेली नाही. हत्येमागचे नेमके कारण काय आणि यात कोण संशयित आहे, हेही अद्याप अधिकृतपणे जाहीर झालेले नाही.

एल्विन प्रकाश कुंदर हे मूळचे कर्नाटकातील उडुपी जिल्ह्यातील कुंडापूर गावचे रहिवासी होते. गेली सुमारे चौदा वर्षे ते शारजाह विमानतळावर नोकरी करत होते आणि पत्नी टीना व मुलासोबत तिथेच राहत होते. टीना शाळेत शिक्षिका म्हणून काम करतात, तर त्यांचा मुलगा दहावीत शिकतो आहे. गेल्या वर्षी डिसेंबरमध्ये प्रकाश भारतात येऊन गेले होते आणि त्यानंतर पुन्हा शारजाहला परतले होते.

प्रकाश यांचे भाऊ अनिल प्रशांत कुंदर यांनी सांगितले, की २० जुलैच्या सुमारास त्यांनी प्रकाश यांना फोन केला होता. मात्र प्रकाश यांनी फोन न उचलता फक्त मेसेजवर आपण ठीक असल्याचे कळवले. हे कुटुंबीयांना संशयास्पद वाटले, कारण प्रकाश नेहमी व्हॉइस मेसेजवरूनच बोलायचे. त्यानंतर पुन्हा संपर्क करण्याचा प्रयत्न केला असता काहीच उत्तर आले नाही. त्यामुळे अनिल यांनी शारजाहमध्येच असणाऱ्या प्रकाश यांच्या वर्गमित्र मनोहर यांना गाठून चौकशी करायला सांगितले. मनोहर प्रकाश ज्या कंपनीच्या निवासस्थानी राहत होते, तिथे गेले. तिथल्या वॉचमनने प्रकाश भारतात गेल्याचे सांगितले, असे कुटुंबीयांचे म्हणणे आहे. सुरुवातीला कंपनीच्या एचआर विभागानेही तेच सांगितले. पण अनिल यांनी स्पष्ट केले, की प्रकाश भारतात परतलेलेच नाहीत. त्यानंतर कंपनीने पासपोर्टची माहिती तपासली, तेव्हा प्रकाश अजूनही शारजाहमध्येच असल्याचे उघड झाले. यानंतर त्यांच्या बेपत्ता असल्याची तक्रार दाखल करण्यात आली.

शोध सुरू असताना ओमानच्या दिशेने जाणाऱ्या रस्त्यावर उभ्या असलेल्या एका कारमध्ये प्रकाश यांचा मृतदेह सापडला. मृतदेहाचे नऊ तुकडे करून ते दोन बॅगेत ठेवलेले होते. नंतर हा मृतदेह प्रकाश कुंदर यांचाच असल्याची ओळख पटली. हत्येचा नेमका उद्देश काय होता, याची अधिकृत माहिती अजून बाहेर आलेली नाही. शारजाह प्रशासनाने संशयितांची ओळख किंवा हत्येमागचे कारण अद्याप जाहीर केलेले नाही.

प्रकाश यांच्या मृत्यूनंतर पत्नी टीना आणि मुलगा कुठे आहेत, हे अजूनही स्पष्ट झालेले नाही. काही वृत्तांत हे दोघे शारजाहमधून भारतात आल्याची शक्यता वर्तवण्यात आली आहे, मात्र याला अजून अधिकृत दुजोरा मिळालेला नाही. या हत्येत टीना यांचा सहभाग असल्याचा कोणताही ठोस पुरावा किंवा अधिकृत निष्कर्ष सध्या समोर आलेला नाही. कुटुंबीयांनीही सांगितले, की प्रकाश आणि टीना यांच्यात कधी काही वाद असल्याची त्यांना कल्पना नाही.

अनिल यांनी उडुपीच्या पोलिस अधीक्षकांची भेट घेऊन या प्रकरणात मदत करण्याची मागणी केली आहे. यूएईतील कायदेशीर प्रक्रिया पूर्ण झाल्यावर प्रकाश यांचा मृतदेह भारतात आणला जावा, याची कुटुंबीय वाट पाहत आहेत. हत्या नेमकी कशी झाली, मृतदेह कोणत्या स्थितीत सापडला आणि पत्नी-मुलाचा ठावठिकाणा काय आहे, याबाबत अधिक माहिती द्यावी, अशी मागणीही कुटुंबीयांनी केली आहे.