बंटी दीक्षित हत्या: रावण दहनाच्या कार्यक्रमात काटा काढण्याचा बेत, नंतर कट्टा फेकला

छत्रपती संभाजीनगरमध्ये वर्चस्वाच्या वादातून देवेश उर्फ बंटी दीक्षित याची हत्या झाली. या प्रकरणात पोलिसांच्या चौकशीतून आता नवी माहिती समोर आली आहे. आरोपी पवन याने बंटीला संपवण्याचा बेत हत्येआधीच आखला होता, असे तपासात उघड झाले आहे. रामलीला मैदानावरील रावण दहनाच्या कार्यक्रमात हा बेत प्रत्यक्षात आणण्याचा त्याचा विचार होता.

बंटी आणि पवन यांच्यात गेल्या अनेक महिन्यांपासून वाद सुरू होता. या संघर्षात बंटी आपल्यावर वरचढ ठरतो आहे, असा राग पवनच्या मनात होता. रामलीला मैदानावर रावण दहनाच्या कार्यक्रमात बंटी सक्रिय असतो, हे पवनला माहीत होते. म्हणून त्याने तिथेच हल्ला करण्याची योजना केली होती.

त्या आधी पवन दांडिया कार्यक्रमात गेला आणि त्याने परिसराची पाहणी केली. दसऱ्यानिमित्त आयोजित कार्यक्रमाला राजस्थानचे राज्यपाल हरिभाऊ बागडे प्रमुख पाहुणे म्हणून येणार होते. त्यामुळे रामलीला मैदान परिसरात मोठा पोलीस बंदोबस्त होता. हे पाहून पवनने तिथला बेत रद्द केला. मात्र बंटीबद्दलचा राग कमी झाला नाही आणि पुढे एन-७ परिसरात बंटीची हत्या झाली.

हत्येनंतर पवन सरळ पोलीस ठाण्यात गेला नाही. तो एन-८ मधील शासकीय रुग्णालयाच्या गल्लीकडे गेला. औरंगाबाद जिल्हा सहकारी बँकेसमोरच्या मोकळ्या मैदानाजवळून जाताना त्याने चालत्या वाहनातून हत्येसाठी वापरलेला गावठी कट्टा आणि नऊ काडतुसे बाहेर फेकली. कट्टा रस्त्याला लागून असलेल्या गवतात पडला, त्यामुळे तो सहज कोणाच्या नजरेस आला नाही. त्यानंतर पवन स्वतःहून सिडको पोलीस ठाण्यात हजर झाला.

अटकेनंतर चौकशीत पवनने शस्त्र फेकलेल्या जागेची माहिती दिली. त्यानुसार उपनिरीक्षक अनिल नाणेकर आणि हवालदार मंगेश पवार यांच्या पथकाने त्या परिसरात शोध घेतला आणि गावठी कट्टा ताब्यात घेतला. तपास अधिकारी योगेश गायकवाड यांनी शस्त्र जप्त केल्याचे सांगितले. पोलीस निरीक्षक अतुल पैरमे यांनी सांगितले की, शुक्रवारी न्यायालयाने आरोपीला दहा दिवसांची पोलीस कोठडी सुनावली.

लॉकअपमध्येही पवन वर्चस्वाचीच भाषा बोलत असल्याचे सूत्रांनी सांगितले. बंटी प्रत्येक कामात अडथळा आणत होता, त्याला स्वतःला मोठा भाई समजायचे होते आणि आपणही कमी नाही हे दाखवायचे होते, अशा आशयाची बडबड तो करत असल्याचे सांगितले जाते.

दरम्यान, शुक्रवारी दुपारी सेंट्रल नाका स्मशानभूमीत बंटी दीक्षित यांच्यावर शोकाकुल वातावरणात अंत्यसंस्कार झाले. त्यावेळी नागरिकांची मोठी गर्दी जमली होती आणि तिथे पोलीस बंदोबस्त ठेवण्यात आला होता.