मामेबहिणीशी बोलण्यावरून वाद, गारखेड्यात १९ वर्षीय तरुणाची चाकूने वार करून हत्या

छत्रपती संभाजीनगरमधील गारखेडा परिसरात एका १९ वर्षीय तरुणाची चाकूने वार करून हत्या करण्यात आली. गारखेडा परिसरातील साईनगर येथे बुधवारी (१४ ऑक्टोबर) रात्री सुमारे ११ वाजता ही घटना घडली. तौसिफ शमीम शेख (वय १९, रा. साईनगर, गारखेडा) असे मृत तरुणाचे नाव आहे. मामेबहिणीशी बोलत असल्याच्या कारणावरून झालेल्या वादातून हे घडल्याचे फिर्यादीत म्हटले आहे.

या प्रकरणी आदित्य शेळके याच्याविरुद्ध पुंडलिकनगर पोलीस स्टेशनमध्ये गुन्हा दाखल करण्यात आला आहे. तो घटनेनंतर पसार झाला असून पोलीस त्याचा शोध घेत आहेत. आदित्यची मामेबहीण तौसिफशी बोलत होती, या कारणावरून झालेल्या वादातून हे सगळे घडल्याचे फिर्यादीत म्हटले आहे.

तौसिफ आई-वडिलांसोबत राहत होता. सेंट्रिंगचे काम करून तो घराचा खर्च चालवत होता. बुधवारी रात्री सुमारे १० वाजता जेवण झाल्यावर तो आपला चुलत भाऊ मुजम्मील जमील शेख यांच्यासोबत नूर मस्जिदच्या मागच्या बाजूला बसला होता.

त्याच वेळी आदित्य शेळके तिथे आला. आपली मामेबहीण तौसिफशी बोलते, या कारणावरून त्याने तौसिफशी वाद घातला. वाद वाढू नये म्हणून मुजम्मील यांनी तौसिफला घरी जायला सांगितले. त्यावेळी आदित्यने तौसिफला सोडणार नाही, अशी धमकी दिल्याचे फिर्यादीत नमूद आहे.

थोड्या वेळाने मुजम्मील आपल्या घरासमोर आले. तेव्हा तौसिफ मोटारसायकलवर बसून मोबाईल पाहत होता. रात्री सुमारे ११ वाजण्याच्या सुमारास आदित्य पुन्हा तिथे आला. फिर्यादीनुसार त्याने हातातील चाकूने तौसिफच्या छातीवर अचानक वार केला. त्यामुळे तौसिफ खाली कोसळला. त्यानंतर आदित्यने त्याच्या चेहऱ्यावर आणि डोक्यावरही चाकूने वार केल्याचे फिर्यादीत म्हटले आहे.

तौसिफवर हल्ला झाल्याचे लक्षात येताच मुजम्मील आणि आजूबाजूचे लोक त्याच्याकडे धावले. मात्र तोपर्यंत आदित्य घटनास्थळावरून पळून गेला होता. गंभीर जखमी झालेल्या तौसिफला नातेवाइकांनी लगेच मोटारसायकलवरून एमजीएम रुग्णालयात नेले. तिथे डॉक्टरांनी तपासून त्याला मृत घोषित केले. पोलिसांना दिलेल्या फिर्यादीत तौसिफच्या छातीसह नाक आणि डोक्यावरही जखमा झाल्याचे नमूद आहे.

घटनेची माहिती मिळताच पुंडलिकनगर पोलीस स्टेशनचे पोलीस निरीक्षक राजेंद्र मुंडे यांच्यासह पोलिसांचे पथक घटनास्थळी पोहोचले. पोलिसांनी जागेची पाहणी करून तपास सुरू केला. तौसिफचे चुलत भाऊ मुजम्मील जमील शेख यांच्या फिर्यादीवरून आदित्य शेळके याच्याविरुद्ध गुन्हा दाखल करण्यात आला आहे. हत्येनंतर फरार झालेल्या आरोपीचा पोलीस शोध घेत आहेत. हल्ल्याचे नेमके कारण काय आणि या घटनेमागे इतर कोणत्या बाबी आहेत, याचा तपास पोलीस करत आहेत.