चंद्रपूरमध्ये बेकायदा पाणी उपशावर नजर, प्रत्येक महसूल मंडळात भरारी पथक नेमण्याचे आदेश

चंद्रपूर जिल्ह्यात जलस्रोतांमधून होणारा अनधिकृत पाणी उपसा रोखण्यासाठी जिल्हा प्रशासनाने कठोर पावले उचलली आहेत. जिल्हाधिकारी वसुमना पंत यांनी प्रत्येक महसूल मंडळासाठी भरारी पथके तात्काळ स्थापन करण्याचे आदेश दिले आहेत. जिल्ह्यातील दुष्काळी परिस्थितीमुळे पिण्याच्या पाण्याचे संरक्षण करणे गरजेचे असल्याचे प्रशासनाने म्हटले आहे.

जिल्ह्यात पाऊस कमी झाल्यामुळे दुष्काळी परिस्थिती निर्माण झाली आहे. येत्या काळात पिण्याच्या पाण्याची टंचाई होऊ नये, यासाठी उपलब्ध जलसाठा काटकसरीने आणि नियोजनबद्ध पद्धतीने वापरणे आवश्यक आहे. या पार्श्वभूमीवर जलस्रोतांमधील अनधिकृत पाणी उपशाविरोधात विशेष तपासणी मोहीम राबवली जाणार आहे. संबंधित विभागांनी आपापल्या कार्यक्षेत्रात तात्काळ भरारी पथके नेमून प्रत्यक्ष कामाला सुरुवात करावी, असे सांगण्यात आले आहे.

प्रत्येक महसूल मंडळासाठी स्थापन होणाऱ्या पथकात जलसंपदा विभाग, जलसंधारण विभाग किंवा जिल्हा परिषदेचे शाखा अभियंता समन्वयक म्हणून काम पाहतील. याशिवाय महावितरण कंपनीचे शाखा अभियंता, महसूल विभागाचे मंडळ अधिकारी आणि पोलीस उपनिरीक्षक यांचाही पथकात समावेश असेल.

ही पथके जलाशय, धरणे, नद्या, तलाव, कोल्हापुरी बंधारे, कालवे आणि इतर जलस्रोतांची नियमित तसेच अचानक तपासणी करतील. अनधिकृत पाणी उपशाबाबत नागरिकांकडून तक्रार आल्यास त्या ठिकाणी तातडीने तपासणी केली जाईल. अनधिकृतपणे पाणी उपसणाऱ्या मोटारी, पंप, पाईपलाईन आणि इतर साधनसामग्रीची पडताळणी करून ती जप्त करण्याची कारवाई केली जाणार आहे.

तपासणी अहवालाबाबतही स्पष्ट सूचना देण्यात आल्या आहेत. नियमित आणि अचानक केलेल्या तपासण्या, आढळलेला अनधिकृत पाणी उपसा आणि केलेली कारवाई, याचा अहवाल दर सोमवारी जिल्हाधिकारी कार्यालयाला सादर करावा लागेल.

दुष्काळी परिस्थितीत उपलब्ध पाणीसाठ्याचे संरक्षण करणे आणि नागरिकांना पिण्यासाठी पुरेसे पाणी मिळवून देणे, याला जिल्हा प्रशासनाचे सर्वोच्च प्राधान्य आहे. त्यामुळे अनधिकृत आणि नियोजनबाह्य पाणी उपसा रोखण्यासाठी सर्व संबंधित विभागांनी समन्वयाने आणि प्रभावीपणे कार्यवाही करावी, असे जिल्हाधिकारी वसुमना पंत यांनी सांगितले आहे. या कामात कोणतीही दिरंगाई होणार नाही, याची दक्षता घ्यावी, असेही त्यांनी निर्देशात म्हटले आहे.