खामगावच्या जनुना गावात पिसाळलेल्या कुत्र्याच्या हल्ल्यानंतर १२ वर्षांच्या मुलाचा रेबीजमुळे मृत्यू

बुलढाणा जिल्ह्यातील खामगाव तालुक्यात असलेल्या जनुना गावात १२ वर्षांच्या एका मुलाचा रेबीजमुळे मृत्यू झाला. घराबाहेर खेळत असताना पिसाळलेल्या कुत्र्याने त्याच्यावर हल्ला केला होता. अवघ्या बारा वर्षांच्या मुलाचा असा दुर्दैवी अंत झाल्याने संपूर्ण बुलढाणा जिल्ह्यात मोठी खळबळ उडाली आहे.

मिळालेल्या माहितीनुसार, हा मुलगा नेहमीप्रमाणे आपल्या घराबाहेर मित्रांसोबत खेळत होता. तेवढ्यात अचानक एका पिसाळलेल्या कुत्र्याने तिथे धाव घेतली आणि त्याच्यावर हल्ला चढवला. कुत्र्याने त्याचा जोरात चावा घेतल्याने तो गंभीर जखमी झाला. त्याच्या किंचाळण्याचा आवाज ऐकून गावातले लोक धावत आले आणि त्यांनी त्याला कुत्र्याच्या तावडीतून सोडवले.

हल्ल्यानंतर जखमी मुलाला तातडीने स्थानिक सामान्य रुग्णालयात दाखल करण्यात आले. तिथे प्राथमिक उपचार केल्यानंतर पुढच्या उपचारासाठी त्याला एका खासगी रुग्णालयात हलवण्यात आले.

मात्र खासगी रुग्णालयात उपचार सुरू असतानाच त्याच्या शरीरात रेबीजची गंभीर लक्षणे दिसू लागली, असे सांगण्यात आले. परिस्थिती बिघडल्यामुळे त्याला तातडीने अकोला येथील शासकीय रुग्णालयात नेण्यात आले. पण रेबीजचा संसर्ग पसरल्याने अकोल्यात उपचार सुरू असताना त्याचा मृत्यू झाला.

या घटनेमुळे जनुना गावावर शोककळा पसरली आहे. घराबाहेर खेळता खेळता झालेल्या या हल्ल्याने आणि त्यानंतर झालेल्या मृत्यूने गावकरी हादरले आहेत. भटक्या आणि पिसाळलेल्या कुत्र्यांचा बंदोबस्त करावा, अशी तीव्र मागणी आता गावातील ग्रामस्थ करत आहेत.