बाजार घसरला म्हणून SIP वाढवावी का? तज्ज्ञ म्हणतात, निर्णय उत्पन्नावर ठरवा

शेअर बाजारात अलीकडे घसरण झाली आहे आणि अनेकांच्या हातात अतिरिक्त पैसाही आला आहे. त्यामुळे म्युचुअल फंड SIP ची रक्कम वाढवण्याची हीच योग्य वेळ आहे का, असा प्रश्न अनेक गुंतवणूकदारांना पडला आहे. तज्ज्ञांच्या मते हा निर्णय फक्त बाजाराच्या स्थितीवर नाही, तर तुमच्या स्वतःच्या आर्थिक परिस्थितीवर अवलंबून असायला हवा.

बाजार उच्चांकी पातळीवरून खाली आला की गुंतवणूकदारांना तो साहजिकच आकर्षक वाटतो. घसरणीमुळे कमी किमतीत जास्त युनिट्स मिळू शकतात, हे खरे आहे. पण बाजाराची पुढची चाल अचूक ओळखणे किंवा तिचे भाकीत करणे कोणालाच जमत नाही. म्हणून फक्त बाजार पडला म्हणून SIP वाढवणे योग्य ठरत नाही.

म्युचुअल फंड डिस्ट्रीब्युटर (MFDs) आणि वित्तीय तज्ज्ञ सांगतात की SIP मधील वार्षिक किंवा नियमित वाढ बाजाराच्या अंदाजावर नाही, तर तुमच्या उत्पन्नातील वाढीवर आधारित असावी. पगारवाढ झाली, बोनस मिळाला किंवा एखाद्या कर्जाचा EMI संपला, की हातात जादा पैसा येतो. त्यातला काही भाग थेट SIP मध्ये गुंतवणे फायद्याचे ठरते.

तज्ज्ञांच्या मते SIP वाढवण्याची सवय अशी असावी की दरवेळी नव्याने विचार करावा लागणार नाही. नाहीतर हा जादा पैसा नकळत रोजच्या जीवनशैलीवरील खर्चात उडून जातो.

SIP वाढवण्यापूर्वी काही गोष्टी लक्षात ठेवाव्यात. पहिली म्हणजे एमर्जन्सी फंड. कोणतीही गुंतवणूक करण्यापूर्वी संकटाच्या वेळेसाठी पुरेशी रक्कम सुरक्षित बाजूला ठेवली पाहिजे. दुसरी म्हणजे दीर्घकालीन दृष्टिकोन. ज्या पैशांची तुम्हाला किमान पुढची पाच वर्षे गरज पडणार नाही, त्यांचीच SIP वाढवा. तिसरी म्हणजे उत्पन्नाशी सुसंगतता. SIP मधील वाढ बाजाराच्या चढ-उतारांवर नाही, तर पगारवाढीच्या किंवा उत्पन्नाच्या प्रमाणात ठरवावी.

वाढ किती करावी, यावरही तज्ज्ञांनी मत मांडले आहे. पगारात 10 टक्के वाढ झाली तर SIP ची रक्कमही 10 टक्क्यांनी वाढवता येईल. अतिरिक्त बचत बऱ्यापैकी असेल तर ही वाढ 20 टक्क्यांपर्यंत नेण्यास हरकत नाही. मात्र गुंतवणूक इतकी ताणू नका की तुम्हाला मानसिक तणाव येईल.

स्टेप-अप SIP (Step-up SIP) वापरून दीर्घकाळात मोठा निधी उभा करता येतो. समजा तुम्ही दरमहा 20,000 रुपयांची SIP सुरू ठेवली आणि दरवर्षी त्यात 10 टक्के वाढ केली, तर 15 वर्षांनंतर मिळणारी एकूण रक्कम सामान्य SIP च्या तुलनेत अनेक पटींनी वाढू शकते.

थोडक्यात, बाजाराच्या हालचालींचे अंदाज बांधत बसण्यापेक्षा वाढत्या उत्पन्नानुसार शिस्तीने SIP वाढवत राहणे हाच संपत्ती निर्माण करण्याचा सर्वोत्तम मार्ग आहे.

हा मजकूर सामान्य माहितीच्या आधारे लिहिलेला आहे. शेअर मार्केट, म्युच्युअल फंड, सोने किंवा इतरत्र गुंतवणूक करण्याचा सल्ला दिलेला नाही. गुंतवणूक करण्यापूर्वी आपल्या गुंतवणूक सल्लागाराचे मार्गदर्शन नक्की घ्या.