ऑक्टोबर हीटचा तडाखा: अमरावतीत 39.6 अंश, कोल्हापूर-सांगलीत विजांसह पावसाचा अंदाज

राज्यातून मॉन्सून माघारी निघाला असतानाच लोकांना आता 'ऑक्टोबर हीट'च्या कडक झळा सहन कराव्या लागत आहेत. आज, 8 ऑक्टोबरला संपूर्ण महाराष्ट्रात उन्हाचा कडाका आणि उकाडा कायम राहील, असा अंदाज हवामान विभागाने दिला आहे.

एकीकडे उन्हाचा चटका वाढत असताना दुसरीकडे कोल्हापूर आणि सांगली जिल्ह्यांत विजांच्या कडकडाटासह पाऊस पडण्याची शक्यता वर्तवण्यात आली आहे.

महाराष्ट्राच्या जवळपास निम्म्या भागातून मॉन्सूनचा प्रवास पूर्ण झाला आहे. बुधवारीही त्याची परतीची वाटचाल सुरू होती. सध्याचे वातावरण मॉन्सूनला परतण्यासाठी खूपच अनुकूल आहे. त्यामुळे येत्या दोन ते तीन दिवसांत राज्यातील आणखी काही भागांतून तो निघून जाईल.

हवामानशास्त्रानुसार पश्चिम बंगालच्या हिमालयाकडील भागापासून विदर्भ, मराठवाडा, कर्नाटक ते गोव्यापर्यंत समुद्रसपाटीपासून 5.8 किलोमीटर उंचीवर हवेचा कमी दाबाचा पट्टा तयार झाला आहे. शिवाय मध्य महाराष्ट्रापासून मन्नारच्या आखातापर्यंत आणखी एक कमी दाबाचा पट्टा सक्रिय झाला आहे.

राज्यातल्या बहुतेक भागांत पारा सतत 35 अंश सेल्सिअसच्या वर जातोय, त्यामुळे लोक उकाड्याने हैराण झाले आहेत. बुधवारी सकाळपर्यंतच्या 24 तासांत अमरावतीत राज्यातील सर्वाधिक, म्हणजे 39.6 अंश सेल्सिअस तापमानाची नोंद झाली.

वर्धा येथे तापमान 38 अंश सेल्सिअस होते. अकोला, जळगाव, छत्रपती संभाजीनगर, सोलापूर, धुळे आणि चंद्रपूर या जिल्ह्यांत पारा 37 अंश सेल्सिअसच्या वर नोंदवला गेला. विशेष म्हणजे, एकीकडे उन्हाचा तडाखा असताना जळगावात राज्यातील सर्वात कमी, म्हणजे 17.2 अंश सेल्सिअस तापमान नोंदले गेले आहे.

उन्हाचा त्रास वाढलेला असतानाच पश्चिम महाराष्ट्रातील कोल्हापूर आणि सांगली या दोन जिल्ह्यांत आज विजांच्या कडकडाटासह पाऊस होईल, असा अंदाज हवामान विभागाने दिला आहे. उर्वरित महाराष्ट्रात आकाश अंशतः ढगाळ राहील, तसेच उन्हाचा तडाखा आणि उकाडा आणखी तीव्र होण्याची शक्यता आहे.

पुढच्या आठवडाभराचा तापमानाचा अंदाजही देण्यात आला आहे. 8 ऑक्टोबर, गुरुवारी कमाल तापमान 37 आणि किमान 27 अंश सेल्सिअस राहील. 9 ऑक्टोबर, शुक्रवारीही कमाल 37 आणि किमान 27 अंश असेल. 10 ऑक्टोबर, शनिवारी कमाल 36 आणि किमान 27 अंश राहण्याचा अंदाज आहे.

11 ऑक्टोबर, रविवारी आणि 12 ऑक्टोबर, सोमवारी कमाल तापमान 37 आणि किमान 27 अंश सेल्सिअस असेल. 13 ऑक्टोबर, मंगळवारी कमाल 37 आणि किमान 26 अंश अपेक्षित आहे. 14 ऑक्टोबर, बुधवारी कमाल 36 आणि किमान 27 अंश, तर 15 ऑक्टोबर, गुरुवारी कमाल 37 आणि किमान 26 अंश सेल्सिअस राहील, असा अंदाज आहे.