पुण्यात बंडगार्डन रस्त्यावरील फाईव्ह स्टार हॉटेलमध्ये पोलिसांचा छापा, दोन तरुणींची सुटका

पुणे शहरातील बंडगार्डन रस्त्यावर असलेल्या एका अत्यंत प्रतिष्ठित पंचतारांकित (फाईव्ह स्टार) हॉटेलमध्ये हायप्रोफाइल वेश्याव्यवसाय सुरू असल्याचा प्रकार पुणे पोलिसांनी उघडकीस आणला आहे. एजंटांमार्फत परराज्यांतील तरुणींना आणून हा व्यवसाय चालवला जात होता, अशी माहिती समोर आली आहे. हा प्रकार धक्कादायक आणि संतापजनक असल्याचे सांगितले जात आहे.

पोलिसांनी रचलेल्या सापळ्यात बनावट ग्राहकाची मदत घेऊन हा छापा टाकण्यात आला. छाप्यानंतर समोर आलेले दृश्य पाहून पोलीस अधिकारीही अवाक झाले.

संगमवाडी-बंडगार्डन रस्त्यावर एक्साइज कॉलनीजवळ असलेल्या एका नावाजलेल्या पंचतारांकित हॉटेलमध्ये हायप्रोफाइल वेश्याव्यवसाय सुरू असल्याची गुप्त माहिती पोलिसांना मिळाली होती. या माहितीच्या आधारे अनैतिक मानवी वाहतूक प्रतिबंधक म्हणजेच 'एचटीयू' कक्षाच्या पोलीस निरीक्षक आशालता खापरे यांच्या पथकाने तात्काळ हालचाली सुरू केल्या.

पथकाने सुरुवातीला एक बनावट ग्राहक (डमी कस्टमर) हॉटेलमध्ये पाठवला आणि मिळालेल्या माहितीची खात्री करून घेतली. माहिती खरी असल्याचे स्पष्ट होताच पोलीस पथकाने हॉटेलच्या खोलीत अचानक छापा टाकला.

या धडक कारवाईत पोलिसांनी परराज्यातून आणलेल्या आणि मॉडेलिंग क्षेत्रात काम करणाऱ्या दोन पीडित तरुणींची सुटका केली. या तरुणींना पैशांचे आमिष दाखवून किंवा त्यांच्या हतबलतेचा फायदा घेऊन या दलदलीत ढकलण्यात आल्याची प्राथमिक माहिती समोर आली आहे.

या प्रकरणी कोरेगाव पार्क पोलीस ठाण्यात एकूण चौघांविरोधात गुन्हा दाखल करण्यात आला आहे. यात आरोपी रोहन उर्फ राजकुमार (वय ३२), विवेक उर्फ मयंक कबीर (वय ३४) आणि विक्रम उर्फ पीयुष (वय ३४) यांचा समावेश आहे. हे तिघेही आसामचे रहिवासी आहेत. चौथा आरोपी त्यांचा साथीदार आहे. हे आरोपी एजंट म्हणून रॅकेट चालवत असल्याचा आरोप आहे.

पंचतारांकित हॉटेलमध्ये हे रॅकेट उघडकीस आल्यामुळे शहरात आणि हॉटेल क्षेत्रात मोठी खळबळ उडाली आहे. पोलीस सध्या या प्रकरणाचा अधिक सखोल तपास करत आहेत.