पुणे पोलीस दलात खळबळ! रेल्वेतून १२ किलो गांजाची तस्करी करताना अंमलदार तेलंगणात अटकेत

पुणे शहर पोलीस दलातील एका पोलीस अंमलदाराला तेलंगणा राज्यात थेट गांजाची तस्करी करताना पकडण्यात आल्याने पुण्यात मोठी खळबळ उडाली आहे. त्याला तब्बल १२ किलो गांजा घेऊन जात असताना पकडण्यात आले. तो रेल्वेने या गांजाची तस्करी करत होता.

पकडण्यात आलेल्या पोलीस अंमलदाराचे नाव नितीन ज्ञानू शिंदे असे आहे. ते ३३ वर्षांचे असून पुण्यात राहतात. या प्रकरणी तेलंगणा राज्यातील नेकुंडा पोलीस ठाण्यात त्यांच्याविरुद्ध एनडीपीएस कायद्यानुसार गुन्हा दाखल करण्यात आला आहे.

रविवारी तेलंगणा पोलिसांनी पुणे पोलिसांना या कारवाईची माहिती कळवली. नितीन शिंदे यांना रेल्वेतून १२ किलो गांजाची तस्करी करताना पकडण्यात आल्याचे त्यांनी पुणे पोलिसांना सांगितले. त्यानंतरच हा प्रकार समोर आला. मिळालेल्या माहितीनुसार, नितीन शिंदे पुणे पोलीस दलात कर्मचारी आहेत. त्यांची नेमणूक वाहतूक शाखेमार्फत विश्रामबाग वाहतूक विभागात होती. ते ८ ऑक्टोबरपासून वैद्यकीय रजेवर गेले होते.

शिंदे हे गांजा घेऊन नेमके कुठे येत होते, हे अजून समजलेले नाही. त्यांच्यासोबत आणखी कोणी आहे का, याचीही माहिती मिळालेली नाही. इतर तपशीलही अद्याप समजू शकलेले नाहीत. मात्र पोलीस दलातील कर्मचाराच गांजाची तस्करी करत असल्याचे उघड झाल्याने पुण्यात मोठी खळबळ माजली आहे.

अशीच एक घटना मिरा-भाईंदर शहरातही समोर आली आहे. तिथे अंमली पदार्थांच्या विक्रीविरोधात कारवाई सुरू असतानाच पोलीस दलातील एका हवालदारालाच एमडी ड्रग्स विक्रीच्या प्रकरणात अटक झाली. त्यामुळे तिथेही खळबळ उडाली आहे.

अटक झालेल्या हवालदाराचे नाव प्रकाश पवार आहे. त्यांचा कथित साथीदार अखिलेश कुमार यालाही ताब्यात घेण्यात आले. या दोघांकडून एमडी ड्रग्स, रोख रक्कम, दुचाकी आणि मोबाईल फोन असा एकूण १ लाख ३२ हजार ५५० रुपयांचा मुद्देमाल जप्त करण्यात आल्याची माहिती आहे.

पोलीस आयुक्त अनिकेत कौशिक यांनी मिरा-भाईंदर अंमली पदार्थमुक्त करण्याचा संकल्प बोलून दाखवला होता. असे असताना खुद्द पोलिसांच्याच एका कर्मचाऱ्यावर अंमली पदार्थ विक्रीचा आरोप झाला आहे. त्यामुळे या मोहिमेची अंमलबजावणी खरोखर प्रभावीपणे होत आहे का, असे प्रश्न आता विचारले जात आहेत.

मिरा-भाईंदरमध्ये अंमली पदार्थ विक्रीचा प्रश्न गंभीर बनलेला आहे. त्याविरोधात कारवाई करण्याची जबाबदारी ज्यांच्यावर आहे, त्याच पोलीस दलातील कर्मचाऱ्यावर एमडी ड्रग्स विक्रीचा आरोप झाल्याने तिथेही मोठी खळबळ उडाली आहे. पुण्यातील आणि मिरा-भाईंदरमधील या दोन्ही घटनांमध्ये पोलीस दलातीलच कर्मचारी अंमली पदार्थांच्या प्रकरणात अडकल्याचे समोर आले आहे.