'द वॉल'च्या मुलाची मैदानात तुफान फलंदाजी, गुजरातविरुद्ध अन्वय द्रविडच्या 151 रन्स

भारताचे माजी क्रिकेटपटू राहुल द्रविड यांना 'द वॉल' म्हणून ओळखले जाते. त्यांचा मुलगा अन्वय द्रविड हाही आता क्रिकेटच्या मैदानात मोठी खेळी करताना दिसला आहे. 17 वर्षांचा अन्वय विशाखापट्टणम येथे सुरू असलेल्या विनू मांकड ट्रॉफीत कर्नाटकच्या संघाचे नेतृत्व करत आहे आणि आपल्या शानदार फलंदाजीने त्याने सगळ्यांचे लक्ष वेधून घेतले आहे. सगळीकडे त्याच्या खेळीचे कौतुक होत आहे.

कर्नाटक आणि गुजरात यांच्यात खेळला गेलेला सामना चांगलाच चुरशीचा झाला. गुजरातच्या संघाने कर्नाटकसमोर जिंकण्यासाठी तब्बल 358 रन्सचे लक्ष्य ठेवले होते. हे लक्ष्य गाठताना कर्नाटकचा कर्णधार अन्वय द्रविडने आक्रमक आणि तितकीच जबाबदारीची फलंदाजी केली. त्याने 100 बॉलमध्ये 151 रन्स केल्या आणि कर्नाटकने हा सामना जिंकला.

एवढ्या मोठ्या लक्ष्याचा पाठलाग करायला उतरलेल्या कर्नाटकची सुरुवात अपेक्षेप्रमाणे झाली नाही. रोहित रेड्डी आणि नीतीश आर्य यांनी पहिल्या विकेटसाठी 30 रन्स जोडल्या. त्यानंतर रोहित आणि ध्रुव कृष्ण यांनी दुसऱ्या विकेटसाठी 33 रन्सची पार्टनरशिप केली. तिथून पुढे मात्र कर्णधार अन्वय द्रविडने एका बाजूने डाव सांभाळला.

डावाच्या 38 व्या ओव्हरमध्ये ध्रुव कृष्ण बाद झाला. त्यानंतर अन्वयने अनिकेत रेड्डीच्या साथीने डावाची धुरा हातात घेतली आणि चौथ्या विकेटसाठी 61 रन्सची महत्त्वाची पार्टनरशिप केली. अन्वयने पूर्ण डावात संयम ठेवला, पण आक्रमक फटकेही मारले. पुढे अनिकेत रेड्डी आणि तेजस रेड्डी यांनी 358 रन्सचे लक्ष्य पूर्ण करून कर्नाटकला विजय मिळवून दिला.

विनू मांकड ट्रॉफीत कर्नाटकच्या संघाची चांगली कामगिरी सुरूच आहे. कर्णधार अन्वय द्रविडच्या खेळीमुळे गुजरातविरुद्धचा हा विजय संघाला मिळाला.

याच स्पर्धेशी जोडलेली आणखी एक बातमी दिल्लीची आहे. भारताचा माजी स्फोटक फलंदाज वीरेंद्र सेहवाग यांचा मुलगा आर्यवीर सेहवाग नुकताच ऑस्ट्रेलियाच्या 19 वर्षांखालील संघाविरुद्ध भारताच्या 19 वर्षांखालील संघाकडून खेळला. त्या मालिकेत त्याला मोठी खेळी करता आली नाही. तरीही दिल्ली आणि जिल्हा क्रिकेट असोसिएशनने (डीडीसीए) त्याच्यावर महत्त्वाची जबाबदारी सोपवली आहे. विनू मांकड ट्रॉफीसाठी दिल्लीच्या 19 वर्षांखालील पुरुष संघाचा कर्णधार म्हणून आर्यवीर सेहवागची नियुक्ती झाली असून डीडीसीएने संघाची घोषणाही केली आहे.