रणजीत रिंकू सिंगचे सलग दुसरे शतक, आधी बिहार आणि आता गोव्याविरुद्ध खणखणीत खेळी
उत्तर प्रदेशचा डावखुरा फलंदाज रिंकू सिंग याने रणजी ट्रॉफी २०२६-२७ मध्ये गोव्याविरुद्ध १५५ चेंडूंमध्ये शतक ठोकले. प्रथम श्रेणी कारकिर्दीतील हे त्याचे ११ वे शतक आहे.
छायाचित्रे सत्यापित केलेली नाहीत
रणजी ट्रॉफी २०२६-२७ च्या हंगामात उत्तर प्रदेशचा स्टार डावखुरा फलंदाज रिंकू सिंग याची बॅट चांगलीच चालली आहे. हंगामाच्या दुसऱ्या फेरीतही त्याने आपला प्रभावी फॉर्म टिकवून ठेवला. बिहारविरुद्धच्या पहिल्या सामन्यात शतक केल्यानंतर अवघ्या एका आठवड्यात त्याने गोव्याविरुद्धच्या सामन्याच्या पहिल्याच दिवशी आणखी एक शतक ठोकले. म्हणजेच या हंगामातील दोन्ही सामन्यांत त्याच्या बॅटमधून शतक निघाले.
रविवारी उत्तर प्रदेशसाठी मधल्या फळीत फलंदाजीला आलेल्या रिंकूने १५५ चेंडूंमध्ये आपले शतक पूर्ण केले आणि संघाला मजबूत स्थितीत आणले. प्रथम श्रेणी कारकिर्दीतील हे त्याचे ११ वे शतक ठरले. या खेळीत १० चौकार आणि २ षटकारांचा समावेश होता. त्याने संयम आणि आक्रमकता यांचा चांगला मेळ घातला.
उत्तर प्रदेशचा कर्णधार आर्यन जुयाल याने गोव्याविरुद्ध नाणेफेक जिंकून प्रथम फलंदाजी घेतली. पण पहिल्या डावात उत्तर प्रदेशचे फलंदाज निराशाजनक ठरले आणि संघाची सुरुवात खराब झाली. उत्तर प्रदेशने ३३ धावांत तीन विकेट्स गमावल्या. अभिषेक गोस्वामी पाच धावांवर लवकर बाद झाला. माधव कौशिकने ४५ धावा केल्या. तिसऱ्या क्रमांकावर फलंदाजीला आलेला कर्णधार आर्यन जुयाल १४ धावा करून पव्हेलियनमध्ये परतला. करण शर्मा शून्यावर बाद झाला. सात फलंदाजांना दुहेरी आकडा गाठता आला नाही.
एकीकडे विकेट पडण्याचे सत्र सुरू असताना दुसऱ्या टोकावर रिंकू सिंगने जबाबदारी सांभाळली आणि संघाचा डाव सावरला.
बिहारविरुद्धच्या पहिल्या सामन्यातही रिंकूने शानदार शतक केले होते. त्याने आठ चौकार आणि तीन षटकारांसह ११२ धावांची उत्कृष्ट खेळी केली होती. त्याच्यासोबत कौशिकने उत्तर प्रदेशसाठी सात चौकार आणि तीन षटकारांसह १५० धावा केल्या. या दोन दमदार शतकांच्या जोरावर उत्तर प्रदेशने २०२६-२७ रणजी ट्रॉफीच्या एलिट गट 'अ' च्या सामन्यात बिहारचा एक डाव आणि २६७ धावांनी पराभव केला. त्या सामन्यात रिंकूने आपल्या एकमेव डावात ११२ धावा केल्या होत्या.
देशांतर्गत क्रिकेटमध्ये रिंकूने सातत्याने धावा केल्या आहेत. त्याने २०१६ मध्ये हैदराबादविरुद्ध प्रथम श्रेणी क्रिकेटमध्ये पदार्पण केले. ५० हून अधिक प्रथम श्रेणी डावांमध्ये त्याची सरासरी जवळपास ६० आहे. त्याने ५५ सामन्यांतील ७८ डावांत ३,९०० हून अधिक धावा केल्या आहेत. त्याच्या नावावर ११ शतके आणि २३ अर्धशतके आहेत. नाबाद १६३ धावा ही त्याची सर्वोत्तम खेळी आहे.
