एमपीएससी विद्यार्थ्यांवरील कारवाईवरून रोहित पवार पोलीस ठाण्यात, मुख्यमंत्र्यांवर टीका

पुणे : एमपीएससी विद्यार्थ्यांच्या आंदोलनावरून पोलिसांकडून सुरू असलेल्या कारवाईवर राष्ट्रवादी काँग्रेस पक्ष (शरदचंद्र पवार) पक्षाचे आमदार रोहित पवार यांनी तीव्र नाराजी व्यक्त केली आहे. विद्यार्थ्यांवर गुन्हे दाखल होत असताना आपल्यावर कारवाई का होत नाही, असा सवाल करत त्यांनी विश्रामबाग पोलीस ठाण्यात जाऊन अधिकाऱ्यांना जाब विचारला.

विद्यार्थ्यांऐवजी माझ्यावर गुन्हे दाखल करा आणि विद्यार्थ्यांवरील गुन्हे मागे घ्या, अशी मागणी पवार यांनी केली. यावेळी त्यांनी मुख्यमंत्री देवेंद्र फडणवीस यांच्यावरही निशाणा साधला. संबंधित पोलीस अधिकाऱ्यांवर कारवाई करावी, अशी मागणीही त्यांनी मुख्यमंत्र्यांकडे केली.

पुण्यातील एस. एम. जोशी पुलावर एमपीएससी अध्यक्षांच्या राजीनाम्यासह विविध मागण्यांसाठी गेल्या दहा दिवसांपासून विद्यार्थ्यांचे आंदोलन सुरू आहे. विद्यार्थी शांततेत आंदोलन करत आहेत, पण आयोजकांना आणि विद्यार्थ्यांना पोलीस जाणीवपूर्वक त्रास देत आहेत, असा आरोप रोहित पवार यांनी केला. मध्यरात्री वसतिगृह चालकांना दिलेल्या नोटिसा आणि विद्यार्थ्यांना आंदोलनात सहभागी न होण्यासाठी दिल्या जाणाऱ्या कथित धमक्या, यावरही त्यांनी आक्षेप घेतला.

विद्यार्थ्यांना गुन्हेगार किंवा दहशतवादी समजून वागवणे चुकीचे आहे, असे पवार म्हणाले. गरीब शेतकऱ्यांच्या मुलांना गुन्हेगार आणि हेर असल्यासारखी वागणूक दिली जात आहे, असाही आरोप त्यांनी केला. विद्यार्थ्यांवरील गुन्हे मागे घेऊन संबंधित कलमांनुसार आपल्यावर गुन्हे दाखल करावेत, असे ते म्हणाले.

आंदोलनासाठी पोलिसांकडे परवानगीचे अनेक अर्ज दिले होते आणि त्यातले काही अर्ज नाकारण्यात आले, असे पवार यांनी सांगितले. सरकारने विद्यार्थ्यांच्या मागण्यांवर तातडीने निर्णय घ्यावा, नाहीतर आंदोलन अधिक व्यापक होऊ शकते, असा इशाराही त्यांनी दिला. चर्चा करून तोडगा काढण्याऐवजी कारवाईचा मार्ग स्वीकारला, तर परिस्थिती चिघळू शकते, असे मत त्यांनी मांडले.

दरम्यान, आंदोलनस्थळी परवानगीशिवाय ड्रोन उडवून चित्रीकरण केल्याप्रकरणी विश्रामबाग पोलिसांनी पाच जणांवर गुन्हा दाखल केला आहे. पोलिसांनी ड्रोन जप्त केला आहे. पोलीस हवालदार युवराज भारत टोळे यांच्या तक्रारीवरून दिगंबर भारत खारे, प्रमोद पाटील, शिवराज मोरे, ऋषिकेश गांगुर्डे आणि अक्षय कांबळे यांच्याविरोधात भारतीय न्याय संहितेच्या कलम २२३ नुसार गुन्हा नोंदवण्यात आला आहे.

पोलिसांनी दिलेल्या माहितीनुसार, सोमवारी, ५ ऑक्टोबर रोजी सायंकाळी साडेसातच्या सुमारास आंदोलनस्थळाच्या मागील बाजूला जनरेटरजवळ दिगंबर खारे रिमोट कंट्रोलरच्या साहाय्याने ड्रोन उडवताना आढळले. चौकशीत ड्रोन उडवण्यासाठी लागणारा परवाना आणि पोलिसांची परवानगी त्यांच्याकडे नसल्याचे समोर आले, त्यानंतर पोलिसांनी कारवाई केली.

या कारवाईनंतर रोहित पवार विश्रामबाग पोलीस ठाण्यात पोहोचले. विद्यार्थ्यांवर गुन्हे कोणाच्या आदेशाने दाखल केले जात आहेत, असा सवाल त्यांनी पोलिसांना केला. याआधी परवानगी रद्द झाल्यानंतरही आंदोलन सुरू ठेवल्याप्रकरणी एमपीएससी विद्यार्थी प्रतिनिधींसह १५ जणांवर गुन्हा दाखल करण्यात आला होता.