दुष्काळग्रस्त शेतकऱ्यांसोबत शिवसेनेचे मंत्री करणार दिवाळीचा फराळ, शिंदे जालन्यात जाणार

राज्यातील दुष्काळी परिस्थितीमुळे संकटात सापडलेल्या शेतकरी कुटुंबांसोबत यंदाची दिवाळी साजरी करण्याचा निर्णय शिवसेनेने घेतला आहे. उपमुख्यमंत्री एकनाथ शिंदे यांच्या नेतृत्वाखाली पक्षाचे मंत्री आणि पदाधिकारी राज्यातील वेगवेगळ्या दुष्काळग्रस्त भागांत जाऊन शेतकऱ्यांसोबत दिवाळीचा फराळ करणार आहेत. शिवसेनेचे नेते आणि मंत्री उदय सामंत यांनी ही माहिती दिली. "यंदा शेतकरी हेच आमचे कुटुंब आहे," अशी भावना त्यांनी व्यक्त केली.

सामंत यांच्या म्हणण्यानुसार, दिवाळीत आपण आपल्या कुटुंबासोबत आनंद साजरा करत असतो. अशा वेळी संकटात असलेल्या शेतकरी बांधवांच्या दुःखात सहभागी होणे ही आपली सामाजिक जबाबदारी आहे. केवळ आर्थिक मदत देऊन ही जबाबदारी संपत नाही. संकटाच्या काळात शेतकऱ्यांच्या पाठीशी उभे राहणे, त्यांच्याशी बोलणे आणि त्यांना मानसिक आधार देणेही महत्त्वाचे आहे, असे ते म्हणाले. याच भावनेतून शिवसेनेने हा निर्णय घेतल्याचे त्यांनी सांगितले.

एकनाथ शिंदे जालना जिल्ह्यात शेतकऱ्यांसोबत दिवाळी साजरी करणार आहेत. उदय सामंत स्वतः नांदेड जिल्ह्यातील सायाळ येथे शेतकरी कुटुंबांसोबत फराळ करतील.

इतर मंत्रीही राज्याच्या विविध भागांतील दुष्काळग्रस्त गावांमध्ये जाऊन शेतकरी कुटुंबांची भेट घेणार आहेत. त्यांचे नियोजित दौरे असे आहेत: गुलाबराव पाटील जळगाव जिल्ह्यातील पोखरी तांडा येथे, प्रताप सरनाईक धाराशिव जिल्ह्यातील पानखंडा येथे, दादा भुसे मालेगावात, संजय शिरसाट छत्रपती संभाजीनगर जिल्ह्यातील शिंदोण तांडा येथे आणि शंभूराज देसाई सातारा जिल्ह्यातील खटाव येथे जातील. प्रकाश आबिटकर सांगली जिल्ह्यातील आटपाडी आणि उंबरगाव येथे, भरत गोगावले पुणे जिल्ह्यातील भोर येथे, संजय राठोड यवतमाळ जिल्ह्यातील मंगरूळ येथे, योगेश कदम पालघरमध्ये आणि आशिष जयस्वाल नागपूर जिल्ह्यातील कोलिथमारा येथे जाणार आहेत.

शिवसेनेच्या माध्यमातून आतापर्यंत सुमारे सात ते साडेसात लाख शेतकरी कुटुंबांपर्यंत शिधावाटप पोहोचवण्यात आले आहे, असे सामंत यांनी सांगितले. आणखी चार ते पाच लाख शेतकरी कुटुंबांपर्यंत मदत पोहोचवण्याचा संकल्प आहे, असेही त्यांनी म्हटले.

दुष्काळग्रस्त भागांत पाणी सहज उपलब्ध व्हावे, यासाठी प्रत्येक जिल्ह्यात ट्रॅक्टरला जोडता येणारे दोन ते अडीच हजार लिटर क्षमतेचे टँकर देण्याचा निर्णय घेण्यात आला आहे, अशी माहिती सामंत यांनी दिली.

शेतकऱ्यांसोबत दिवाळी साजरी करणे हा केवळ एका दिवसाचा दौरा किंवा औपचारिक उपक्रम नाही, असे सामंत यांनी स्पष्ट केले. दिवाळी संपली म्हणून शेतकऱ्यांप्रती असलेली जबाबदारी संपणार नाही, असे सांगून ते म्हणाले की, शासनाच्या माध्यमातून मदतकार्य सुरूच राहील आणि शिवसेनेचे सामाजिक कामही पुढे सुरू राहील.

दरवर्षी आपण कुटुंबासोबत दिवाळी साजरी करतो, मात्र यंदा शेतकरी हेच आमचे कुटुंब आहे, असे सामंत यांनी सांगितले. संकटात असलेला प्रत्येक शेतकरी महायुती सरकारसाठी महत्त्वाचा आहे, असे त्यांनी म्हटले. शेतकऱ्यांच्या बांधावर जाऊन त्यांच्यासोबत फराळ करणे आणि त्यांच्या सुख-दुःखात सहभागी होणे, हीच यंदाच्या दिवाळीची खरी भावना असल्याचे ते म्हणाले.