स्पेनमध्ये रेल्वे अपघातानंतर माद्रिदमध्ये हिंसक आंदोलन; पंतप्रधान आणि परिवहन मंत्र्यांच्या राजीनाम्याची मागणी

स्पेनमध्ये दोन हायस्पीड रेल्वेगाड्यांच्या भीषण अपघातात 68 जणांचा मृत्यू झाला. या बातमीनंतर लोकांमधला सरकारविरोधातला संताप रस्त्यावर उतरला. माद्रिदमध्ये बुधवारी रात्री शेकडो नागरिक रस्त्यावर आले. आंदोलनाला हिंसक वळण लागले आणि आंदोलकांनी पोलिसांवर बाटल्या आणि फटाके फेकले. परिस्थिती आटोक्यात आणण्यासाठी पोलिसांनी अश्रुधुराचा वापर केला आणि जमावाला पांगवले.

माद्रिदमध्ये एक हजारांहून अधिक नागरिकांनी सरकारविरोधी आंदोलन केले. उजव्या विचारसरणीच्या संघटनांच्या नेतृत्वाखाली झालेल्या या आंदोलनात रेल्वे सुरक्षेची जबाबदारी कोणाची आहे, ते निश्चित करा, अशी मागणी करण्यात आली. आंदोलकांनी पंतप्रधान पेद्रो सांचेझ आणि परिवहन मंत्री ऑस्कर पुएंते यांनी राजीनामा द्यावा, अशीही मागणी केली. काही आंदोलकांनी परिवहन मंत्र्यांच्या विरोधात जोरदार घोषणाबाजीही केली. हे आंदोलन रेल्वे अपघातातील मृतांच्या आणि जखमींच्या घटनेनंतर लगेचच उभे राहिले आणि लोकांचा रोष स्पष्टपणे दिसून आला.

या आंदोलनाचे आयोजन दक्षिणपंथी 'फालांज' पक्ष आणि 'रेवुएल्टा' यांसारख्या संघटनांनी केले होते. त्याशिवाय 'वॉक्स'शी संबंधित असलेल्या 'सोलिदारिदाद' या संघटनेने वेगळे आंदोलन केले. म्हणजे माद्रिदमध्ये एकाच दिवशी वेगवेगळ्या संघटनांनी आपापल्या पद्धतीने निषेध नोंदवला.

काही आंदोलकांनी पोलिसांचे सुरक्षा कडे तोडण्याचा प्रयत्न केला आणि तिथूनच तणाव वाढला. आंदोलकांना रोखण्यासाठी पोलिसांनी अश्रुधुराचे गोळे सोडले. त्यानंतर संतप्त झालेल्या आंदोलकांनी पोलिसांच्या दिशेने रिकाम्या बाटल्या आणि फटाके फेकले. शेवटी पोलिसांनी सौम्य बळाचा वापर करून जमावाला पांगवले.

हा रेल्वे अपघात बुधवारी सकाळी माद्रिदच्या दक्षिणेला असलेल्या उर्डा शहराजवळ झाला. स्पेनच्या सरकारी प्रसारक आरटीव्हीईच्या माहितीनुसार, सरकारी रेल्वे कंपनी रेनफेची एक गाडी खासगी कंपनी इर्यो हिच्या रुळांवर उभ्या असलेल्या गाडीला जाऊन धडकली. या दुर्घटनेत 68 जणांचा मृत्यू झाला, तर 180 हून अधिक जण जखमी झाले.

हायस्पीड रेल्वेगाड्या ताशी 200 किलोमीटरपेक्षा जास्त वेगाने धावतात. त्यामुळे अपघाताची तीव्रता मोठी होती. सुरुवातीच्या माहितीनुसार रेल्वे सुरक्षा यंत्रणेत बिघाड झाला असण्याची शक्यता व्यक्त केली जात आहे. त्यानंतर नियंत्रण केंद्राने एका गाडीला पुन्हा प्रवास सुरू करण्याची परवानगी दिली आणि त्यामुळे दुर्घटना घडली, असेही सांगितले जात आहे. मात्र अपघाताचे नेमके कारण अधिकृत तपासानंतरच स्पष्ट होईल.

स्पेनमध्ये याआधी जानेवारी महिन्यात अडामूजजवळ रेल्वे अपघात झाला होता आणि त्यात 46 जणांचा मृत्यू झाला होता. त्या पार्श्वभूमीवर या ताज्या अपघातानंतर रेल्वे सुरक्षेच्या व्यवस्थेबद्दल प्रश्न उपस्थित केले जात आहेत. अपघाताची जबाबदारी निश्चित करा आणि प्रवाशांच्या सुरक्षेसाठी ठोस उपाययोजना करा, अशी मागणी आंदोलकांनी केली आहे.