आशियाई पॅरा गेम्समध्ये सिमरन शर्माला दुहेरी सुवर्ण, १०० मीटर T12 मध्ये १२.०२ सेकंदांची विक्रमी वेळ

जपानमधील आइची-नागोया येथे सुरू असलेल्या आशियाई पॅरा गेम्स २०२६ मध्ये भारतीय खेळाडू आपली दमदार कामगिरी सुरूच ठेवत आहेत. आज या स्पर्धेत भारताने वेगवेगळ्या क्रीडा प्रकारांत सुवर्णपदक जिंकले. भारताची स्टार पॅरा स्प्रिंटर सिमरन शर्मा हिने ऐतिहासिक कामगिरी केली असून या स्पर्धेतले तिचे हे दुसरे सुवर्णपदक आहे.

सिमरन शर्मा हिने महिलांच्या १०० मीटर T12 वर्गाच्या अंतिम फेरीत १२.०२ सेकंदांची विक्रमी वेळ नोंदवली आणि सुवर्णपदक पटकावले. त्याआधी तिने २०० मीटर T12 प्रकारात २४.८० सेकंदांची वेळ देत सुवर्णपदक जिंकले होते. म्हणजेच १०० मीटर आणि २०० मीटर या दोन्ही शर्यतींत ती पहिली आली आणि तिने दोन्ही प्रकारांत सोन्यावर आपले नाव कोरले.

हांगझोऊ येथे झालेल्या आशियाई पॅरा गेम्स २०२२ मध्ये सिमरनने १२.६८ सेकंदांच्या वेळेसह रौप्य पदक जिंकले होते. त्यानंतर यंदा तिने थेट सुवर्ण पदक जिंकले आहे. सध्या जपानमध्ये सुरू असलेल्या या स्पर्धेत भारताच्या खेळाडूंनी आपल्या शानदार कामगिरीचे प्रदर्शन केले असून भारताने आतापर्यंत एकूण 47 पदके जिंकली आहेत.

पुरुषांच्या १०० मीटर T64 स्पर्धेत प्रणव देसाई यांनी ११.९६ सेकंदांची वेळ नोंदवून कांस्यपदक जिंकले. पुरुषांच्या १०० मीटर T47 स्पर्धेत भारताने पहिले आणि दुसरे स्थान पटकावले. दिलीप गावित महादु यांनी १०.६९ सेकंदात सुवर्णपदक जिंकले, तर मोहम्मद बासिल मोर्सिंगनाकाथी यांनी १०.७२ सेकंदांच्या वेळेसह रौप्य पदक आपल्या नावावर केले.

पुरुषांच्या जॅवलिन थ्रो F55 प्रकारात सुखचैन यांनी त्यांच्या आतापर्यंतच्या सर्वोत्तम कामगिरीसह कांस्य पदक जिंकले. पुरुषांच्या जॅवलिन थ्रो F12/13 स्पर्धेत मनजीत व्यास यांनी ६१.०३ मीटरच्या सर्वोत्तम कामगिरीसह रौप्य पदक मिळवले. त्यांनी ही कामगिरी आपल्या दुसऱ्या प्रयत्नात केली.

पुरुषांच्या जॅवलिन थ्रो F53 स्पर्धेतही भारताने रौप्य आणि कांस्यपदक पटकावले. प्रदीप कुमार यांनी आपल्या शेवटच्या प्रयत्नात २७.४५ मीटरच्या सर्वोत्तम कामगिरीसह रौप्य पदक जिंकले, तर आयुष वर्मा यांनी आपल्या पाचव्या प्रयत्नात १७.८८ मीटरच्या सर्वोत्तम कामगिरीसह कांस्यपदक जिंकून भारताची मान अभिमानाने उंचावली.