माजी क्रिकेटपटू केदार जाधव पुण्यात आरएसएसच्या विजयादशमी संचलनात, इन्स्टाग्रामवर शेअर केले फोटो

भारताचा माजी क्रिकेटपटू केदार जाधव हा त्याच्या क्रिकेटमधील कामगिरीमुळे नाही, तर एका वेगळ्याच कारणामुळे चर्चेत आला आहे. राष्ट्रीय स्वयंसेवक संघाच्या विजयादशमीच्या संचलनात तो सहभागी झाल्याचे दिसले. या संचलनाचे फोटो त्याने स्वतः सोशल मीडियावर शेअर केले आहेत.

काल देशभरात विजयादशमीचा उत्साह सगळीकडे पाहायला मिळाला. काल राष्ट्रीय स्वयंसेवक संघाचा स्थापना दिवसही होता. त्यामुळे पुणे शहरासह देशभरात अनेक ठिकाणी आरएसएसचे पथसंचलन पार पडले. याच उत्सवात केदार जाधवही संघाच्या विजयादशमी उत्सवात सहभागी झाल्याचे पाहायला मिळाले.

केदार जाधव २० ऑक्टोबर रोजी पुण्यातील डेक्कन जिमखाना कॉलनी येथे आयोजित केलेल्या राष्ट्रीय स्वयंसेवक संघाच्या विजयादशमी उत्सवात सहभागी झाला होता. त्या वेळी त्याने संघाचा गणवेश घातला होता. गणवेशातला स्वतःचा फोटो त्याने इन्स्टाग्राम या सोशल मीडिया प्लॅटफॉर्मवर शेअर केला.

केदार जाधवने शेअर केलेल्या या फोटोत तो संघाच्या पारंपरिक गणवेशात दिसतो. त्याने पांढरा शर्ट, खाकी पॅंट आणि डोक्यावर काळी टोपी घातली असून हातात दंड आहे. क्रिकेटच्या मैदानावर आपल्या अष्टपैलू खेळाने भारताला अनेक विजय मिळवून देणारा केदार जाधव संघाच्या कार्यक्रमात दिसला.

हा फोटो समोर आल्यानंतर क्रीडा वर्तुळात तसेच राजकीय आणि सामाजिक वर्तुळात मोठ्या प्रमाणात चर्चा सुरू झाली आहे. त्याच्या या सहभागाबद्दल संमिश्र प्रतिक्रिया उमटत आहेत. एका एक्स युजरने "Former Indian cricketer Kedar Jadhav spotted at an RSS rally" असे लिहून २० ऑक्टोबर रोजी हा फोटो पोस्ट केला होता.

केदार जाधवने आपल्या क्रिकेट कारकिर्दीत भारतीय संघासाठी अत्यंत मोलाचे योगदान दिले आहे. त्याने १६ नोव्हेंबर २०१४ रोजी इंटरनॅशनल क्रिकेटची सुरुवात केली होती. मिडल ऑर्डरमध्ये येऊन त्याने अनेकदा शानदार खेळी करत संघाचा डाव सावरला आहे. क्रिकेटच्या क्षेत्रात तो ऑलराऊंडर म्हणून ओळखला जायचा.

३ जून २०२४ रोजी केदार जाधवने क्रिकेटच्या सर्व प्रकारांतून निवृत्ती जाहीर केली होती. म्हणजेच ही निवृत्ती कोणत्याही एका प्रकारापुरती नव्हती, तर सर्व प्रकारांतून होती. आता तो संघाच्या विजयादशमी उत्सवातील सहभागामुळे चर्चेत आला आहे.