हॅरी ब्रूकची श्रीलंकेविरुद्ध वादळी खेळी, अवघ्या 114 चेंडूंत वनडेतील सर्वात वेगवान द्विशतक

इंग्लंडचा कर्णधार हॅरी ब्रूक (Harry Brook) याने श्रीलंकेविरुद्धच्या वनडे सामन्यात ऐतिहासिक खेळी करत विश्वविक्रमाला गवसणी घातली. त्याने अवघ्या 114 चेंडूंत द्विशतक पूर्ण केले आणि एकदिवसीय क्रिकेटमधील सर्वात वेगवान द्विशतक झळकावणारा फलंदाज होण्याचा मान मिळवला. त्याच्या आक्रमक खेळीच्या जोरावर इंग्लंडने निर्धारित 50 षटकांत 4 गडी गमावून 429 धावांचा डोंगर उभा केला.

या खेळीसह ब्रूक इंग्लंडकडून वनडे क्रिकेटमध्ये द्विशतक झळकावणारा पहिला फलंदाज ठरला. तसेच ग्लेन मॅक्सवेलनंतर सलामीला न उतरता द्विशतक झळकावणारा तो दुसरा फलंदाज ठरला आहे.

वनडेत सर्वात वेगवान द्विशतक झळकावणाऱ्यांच्या यादीत ब्रूकने शुभमन गिलचा विक्रम मोडीत काढून अव्वल स्थान मिळवले आहे. गिलने याच वर्षी वेस्ट इंडिजविरुद्ध 117 चेंडूंत द्विशतक पूर्ण केले होते, तर इशान किशनने बांगलादेशविरुद्ध 126 चेंडूंत हा पराक्रम केला होता.

वनडे क्रिकेटमध्ये आतापर्यंत 14 वेळा फलंदाजांनी द्विशतक झळकावले आहे. भारताच्या रोहित शर्माच्या नावावर या प्रकारात सर्वाधिक वैयक्तिक धावांचा विक्रम आहे. त्याने 13 नोव्हेंबर 2014 रोजी ईडन गार्डन्स मैदानावर श्रीलंकेविरुद्ध 264 धावांची खेळी केली होती.

नाणेफेक जिंकून प्रथम फलंदाजी करणाऱ्या इंग्लंडला टॉम बँटन आणि बेन डकेट यांनी चांगली सुरुवात करून दिली. दोघांनी 80 चेंडूंत 74 धावांची भागीदारी केली. बँटनने 51 चेंडूंत 9 चौकारांसह 50 धावा केल्या. त्यानंतर डकेट 29 धावांवर बाद झाला. इंग्लंडची धावसंख्या 85 असताना संघाने दोन गडी गमावले होते.

यानंतर कर्णधार ब्रूकने जो रूटच्या साथीने डाव सावरला. दोघांनी तिसऱ्या विकेटसाठी 127 चेंडूंत 159 धावांची भागीदारी केली. रूटने 66 चेंडूंत आठ चौकारांच्या मदतीने 69 धावा केल्या.

रूट बाद झाल्यानंतर ब्रूकने विल जॅक्ससोबत आक्रमक फलंदाजी सुरू ठेवली. या जोडीने चौथ्या विकेटसाठी अवघ्या 77 चेंडूंत 185 धावा जोडल्या आणि इंग्लंडला 429 धावांपर्यंत पोहोचवले.

ब्रूकने 116 चेंडूंत 10 चौकार आणि 21 षटकारांच्या मदतीने 202 धावा केल्या. विल जॅक्सने 30 चेंडूंत आठ चौकार आणि तीन षटकारांसह नाबाद 66 धावा केल्या. श्रीलंकेकडून दुनिथ वेल्लालगेने दोन, तर असिथा फर्नांडो आणि जनिथ लियानागे यांनी प्रत्येकी एक बळी घेतला.

वनडे क्रिकेटमध्ये 400 धावांचा टप्पा गाठण्याची इंग्लंडची ही आठवी वेळ ठरली आहे. भारताने हा टप्पा सर्वाधिक 9 वेळा गाठला आहे. दक्षिण आफ्रिकेने 8 वेळा, तर ऑस्ट्रेलियाने 3 वेळा वनडे सामन्यात 400 धावांचा टप्पा पार केला आहे.