लग्नाला दहा-पंधरा वर्षे झाली तरी नात्यातला रोमान्स टिकवायचा? या छोट्या सवयी मदत करतील

लग्नाच्या सुरुवातीच्या काळात जोडीदारासोबत वेळ घालवणे, छोट्या छोट्या गोष्टींतून आनंद शोधणे आणि एकमेकांना सरप्राईज देणे सगळ्यांनाच छान वाटतं. पण काही काळानंतर हे सगळं थांबतं. नोकरी, घरगुती जबाबदाऱ्या आणि मुलांची काळजी यांमध्येच दिवस जातो. याचा अर्थ प्रेम कमी झालं आहे असा नाही. रोजच्या धावपळीमुळे कपल्समधला रोमान्स अनेकदा मागे पडतो, एवढंच.

अशा परिस्थितीत काही छोट्या सवयी नात्यातला जिव्हाळा, प्रेम आणि जवळीक टिकवून ठेवायला मदत करू शकतात. लग्नाला दहा वर्षे किंवा त्याहून जास्त काळ झाल्यानंतरही जोडीदारासोबतचं नातं आनंदी ठेवण्यासाठी काय करता येईल, ते या सवयींमधून समजतं.

पहिली गोष्ट म्हणजे जोडीदाराला मिठी मारणं. प्रेम व्यक्त करण्यासाठी नेहमी सरप्राईझच द्यायला हवं असं नाही. दिवसातून एकदा जोडीदाराला मिठी मारणं, हात धरणं किंवा प्रेमाने विचारपूस करणं यामुळे भावनिक जवळीक वाढू शकते. मात्र शारीरिक स्पर्श नेहमी कम्फर्टेबल असावा आणि दोघांच्या संमतीने झालेला असावा.

काम आणि घरच्या जबाबदाऱ्यांमधून एकमेकांसाठी वेळ काढणंही महत्त्वाचं आहे. आठवड्यातून एकदा एकत्र फिरायला जा, चहा किंवा कॉफी घ्या, किंवा घरी एखादा आवडता चित्रपट पाहा. या वेळात फोन बाजूला ठेवा, म्हणजे दोघंही एकमेकांवर लक्ष देऊ शकाल.

दुसरी गोष्ट म्हणजे जोडीदाराच्या प्रयत्नांकडे दुर्लक्ष करू नका, त्यांचे आभार माना. घरातल्या कामात मदत केली, तुमचं ऐकून घेतलं किंवा एखादी जबाबदारी पार पाडली, तर त्याबद्दल धन्यवाद म्हणा. लहानसहान गोष्टींचं कौतुक आणि प्रेमळ शब्द ऐकले की जोडीदाराला आपण महत्त्वाचे आहोत असं वाटू शकतं. लग्नाचे जुने फोटो पाहणं, पहिल्या भेटीबद्दल बोलणं किंवा आवडत्या ठिकाणी पुन्हा जाणं यामुळे नात्यात फ्रेशनेस येऊ शकतो. एकत्र घालवलेल्या चांगल्या क्षणांची आठवण काढायची संधीही त्यातून मिळते.

तिसरी आणि सर्वात महत्त्वाची गोष्ट म्हणजे जोडीदाराचं ऐकणं आणि त्यांना समजून घेणं. मजबूत नातं टिकवायचं असेल, तर फक्त स्वतःचं मत मांडणं पुरेसं नाही. जोडीदाराचं बोलणंही काळजीपूर्वक ऐकायला हवं. त्यांच्या भावना, आवडीनिवडी आणि चिंता समजून घ्यायचा प्रयत्न करा. मतभेद असतील, तर टोचून बोलण्याऐवजी शांतपणे बोला.

एकत्र बसलेले असतानाही दोघं आपापल्या फोनमध्ये गुंतले असतील, तर संवादाची संधी कमी होते. म्हणून दिवसातला थोडा वेळ असा बाजूला ठेवा, की त्यात कोणत्याही डिजिटल व्यत्ययाशिवाय एकमेकांसोबत राहता येईल. नात्यातलं प्रेम टिकवण्यासाठी महागड्या भेटवस्तूंपेक्षा परस्पर आदर, विश्वास, संवाद आणि एकमेकांसाठी काढलेला वेळ जास्त महत्त्वाचा आहे. अशा छोट्या सवयी दीर्घकाळ टिकणारं नातं जपायला मदत करू शकतात.