सेलू पंचायत समितीचा जलसंवर्धनाचा आदर्श उपक्रम, श्रमदानातून चार रिचार्ज पिट आणि १६ लाख लिटर पाण्याचे पुनर्भरण

भूजल पातळी दिवसेंदिवस खालावत चालली आहे आणि पाणीटंचाईही वाढत आहे. या अडचणीवर मात करण्यासाठी सेलू पंचायत समितीच्या वतीने एक प्रेरणादायी आणि पर्यावरणपूरक पाऊल उचलण्यात आले आहे. पंचायत समितीच्या परिसरात श्रमदानातून चार रिचार्ज पिट, म्हणजेच जलतारा प्रकल्प, तयार करण्यात आले आहेत.

पालकमंत्री मेघना साकोरे-बोडर्डीकर यांच्या महत्त्वाकांक्षी जलतारा प्रकल्पांतर्गत हे काम करण्यात आले. प्रत्येक रिचार्ज पिट १७० घनफूट आकाराचा आहे. या अभिनव उपक्रमामुळे एकाच पावसाळ्यात सुमारे १६ लाख लिटर पावसाचे पाणी जमिनीत मुरणार असून, त्यातून भूजल पुनर्भरण होणार आहे.

पावसाचा थेंब न थेंब वाया जाऊ न देता तो जमिनीत मुरवायचा, भूजल पातळीत वाढ करायची आणि भविष्यातील पाणीटंचाईवर मात करायची, हा या उपक्रमाचा मुख्य उद्देश आहे.

केंद्रीय प्राथमिक शाळेचा परिसर विस्तारित आहे. त्यामुळे पावसाळ्यात तिथे मोठ्या प्रमाणावर पाणी साचायचे आणि अनेक महिने चिखल राहायचा. या समस्येवर मात करण्यासाठी पंचायत समितीचे गटविकास अधिकारी उदय जाधव यांनी पुढाकार घेतला. अधिकारी आणि कर्मचाऱ्यांना सोबत घेऊन त्यांनी या परिसराचा कायापालट केला.

या कामासाठी कोणतीही यांत्रिक किंवा कंत्राटी मदत घेतलेली नाही. गटविकास अधिकारी उदय जाधव यांच्यासह सर्व अधिकारी आणि कर्मचारी स्वतः पुढे येऊन श्रमदान करण्यासाठी उतरले, आणि त्यांनी हे काम पूर्ण केले.

उपक्रमाच्या अंमलबजावणीत विस्तार अधिकारी प्रभाकर शिंदे, संदीप पवार आणि अमोल माटकर यांनी सहभाग घेतला. कृषी विस्तार अधिकारी जयश्री भोसले आणि कनिष्ठ सहाय्यक जीवन खरावने हेही या कामात सहभागी झाले. त्यांच्यासोबत नितीन लोखंडे, नारायण गाडेकर, प्रतीक चव्हाण, दत्तात्रय म्हस्के, प्रवीण चंदन, दत्ता काळे, नारायण काळे, दत्तात्रय पडघन, आर. डी. काळे, विक्रम खिल्लारे, देंगे आणि सचिन नगर यांच्यासह इतरांनीही सहभाग नोंदवला.

शासकीय कार्यालयांच्या परिसरात अशा प्रकारच्या उपाययोजना राबवल्या, तर जलसंवर्धनाला अधिक व्यापक स्वरूप देता येऊ शकते. सेलू पंचायत समितीने हाच आदर्श संपूर्ण जिल्ह्यासमोर ठेवला आहे. पंचायत समितीच्या या उपक्रमाचे सर्व स्तरांतून कौतुक होत आहे.