मुंबई-बंगळुरू वंदे भारत स्लीपर रवाना, मोदी म्हणाले दोन शहरांसाठी 'गेमचेंजर'

मुंबई आणि बंगळुरू या दोन महत्त्वाच्या शहरांमधला प्रवास वेगवान आणि आरामदायी करण्याच्या दिशेने एक मोठे पाऊल उचलले गेले आहे. रविवारी मुंबई-बंगळुरू वंदे भारत स्लीपर ट्रेनला हिरवा झेंडा दाखवण्यात आला. पंतप्रधान नरेंद्र मोदी यांनी या नव्या एक्स्प्रेसचे स्वागत केले. ही सेवा दोन्ही शहरांना जोडण्यासाठी 'गेमचेंजर' ठरेल, असा विश्वास त्यांनी व्यक्त केला.

मोदी यांनी 'एक्स'वर भारतीय रेल्वेची पोस्ट शेअर करून या नव्या सेवेचे महत्त्व सांगितले. बंगळुरूमधून सुरू झालेली ही रेल्वे सेवा देशातील आधुनिक रेल्वे कनेक्टिव्हिटी अधिक मजबूत करण्याच्या दिशेने महत्त्वाचे पाऊल आहे, असे ते म्हणाले. आपल्या पोस्टमध्ये त्यांनी लिहिले की, तंत्रज्ञान आणि नवसंकल्पनांसाठी ओळखल्या जाणाऱ्या बंगळुरूमधून रेल्वे कनेक्टिव्हिटीच्या दिशेने आणखी एक महत्त्वाचे पाऊल टाकले गेले आहे. बंगळुरू-मुंबई वंदे भारत स्लीपर ट्रेन या दोन्ही महानगरांमधील संपर्कव्यवस्थेसाठी गेमचेंजर ठरेल.

या गाडीचा फायदा कर्नाटक, आंध्र प्रदेश आणि महाराष्ट्रातील प्रवाशांना होणार आहे. पंतप्रधानांनी सांगितले की, तरुण, आयटी क्षेत्रातील कर्मचारी आणि विद्यार्थी यांच्यासाठी ही सेवा विशेषतः उपयोगी ठरेल. या रेल्वे सेवेमुळे प्रवास अधिक आरामदायी आणि सोयीचा होण्यास मदत मिळेल, अशी अपेक्षाही त्यांनी बोलून दाखवली.

केंद्रीय रेल्वेमंत्री अश्विनी वैष्णव यांनी इतर मान्यवरांच्या उपस्थितीत या वंदे भारत स्लीपर ट्रेनला हिरवा झेंडा दाखवून रवाना केले. लांब पल्ल्याच्या रेल्वे प्रवासात आधुनिक सुविधा आणि चांगला प्रवासाचा अनुभव देण्याच्या उद्देशाने ही सेवा सुरू केल्याचे रेल्वे मंत्रालयाने म्हटले आहे.

दरम्यान, देशातील बुलेट ट्रेन नेटवर्कच्या नॉर्दर्न कॉरिडॉरला पंतप्रधान नरेंद्र मोदी यांनी मंजुरी दिल्याची माहिती रेल्वेमंत्री वैष्णव यांनी शनिवारी दिली होती. वाराणसी-नवी दिल्ली वंदे भारत स्लीपर एक्स्प्रेसच्या शुभारंभाच्या वेळी त्यांनी या महत्त्वाकांक्षी प्रकल्पाची माहिती दिली. प्रस्तावित बुलेट ट्रेन कॉरिडॉर दिल्ली, आग्रा, कानपूर, लखनौ, अयोध्या, प्रयागराज, वाराणसी, पाटणा आणि सिलीगुडी या शहरांना जोडणार आहे. पुढे तो गुवाहाटीपर्यंत वाढवण्याची योजना आहे.

या प्रकल्पामुळे प्रवासाच्या वेळेत मोठी बचत होईल, असा दावा रेल्वेमंत्र्यांनी केला आहे. प्रस्तावित वेळापत्रकानुसार दिल्ली ते आग्रा हे अंतर 59 मिनिटांत, दिल्ली ते कानपूर 1 तास 45 मिनिटांत आणि दिल्ली ते लखनौ 2 तास 12 मिनिटांत पार करता येईल. दिल्ली ते वाराणसी प्रवास 3 तास 33 मिनिटांत होईल, तर लखनौ ते वाराणसी हे अंतर अवघ्या 1 तास 21 मिनिटांत पूर्ण होईल, असेही त्यांनी सांगितले.

बुलेट ट्रेन फक्त श्रीमंतांसाठीच असेल, असा आरोप विरोधकांकडून केला जातो. रेल्वेमंत्री वैष्णव यांनी तो फेटाळला. विमान प्रवासाच्या तुलनेत बुलेट ट्रेनचे तिकीटदर कमी असतील आणि सर्वसामान्यांनाही या सेवेचा लाभ घेता येईल, असे त्यांनी स्पष्ट केले. वेगवान, आधुनिक आणि सर्वसामान्यांना परवडणारी परिवहन व्यवस्था उभी करणे हे सरकारचे उद्दिष्ट आहे, असेही रेल्वेमंत्र्यांनी सांगितले.