नागपुरात तूर्तास पाणी कपात नाही, बचत आणि गळती रोखण्यावर महापालिकेचा भर

नागपूरकरांसाठी दिलासा देणारी बातमी आहे. शहरात तूर्तास घरगुती पाणीपुरवठ्यात कोणतीही कपात केली जाणार नाही, असे पालकमंत्री चंद्रशेखर बावनकुळे यांनी स्पष्ट केले. पाण्याची बचत करणे, जलवाहिन्यांमधील गळती रोखणे आणि प्रक्रिया केलेल्या सांडपाण्याचा पुनर्वापर करणे यावर भर द्यावा, असे निर्देश त्यांनी नागपूर महापालिकेच्या प्रशासनाला दिले.

शहरावर पाणीटंचाईचे संकट येण्याची शक्यता असल्याने शनिवारी बचत भवन येथे आढावा बैठक झाली. या बैठकीत ग्रामीण तसेच शहरी भागातील पाणीपुरवठ्याच्या परिस्थितीचा सविस्तर आढावा घेण्यात आला. पेंच जलाशयातील पाणीसाठा कमी झाल्यामुळे शहरात पाणी कपात होण्याची शक्यता निर्माण झाली होती.

राज्य सरकारने १६ ऑक्टोबरपासून महापालिका क्षेत्रात १० टक्के पाणी कपात लागू करण्याचे निर्देश दिले होते. पण सणासुदीचा काळ आणि जलसाठ्याची स्थिती लक्षात घेऊन नागपूर महापालिकेने हा निर्णय पुढे ढकलला होता. आता घरगुती पाणीपुरवठ्यावर निर्बंध न घालता उपलब्ध पाणी काटकसरीने वापरण्यावर प्रशासनाने लक्ष केंद्रित केले आहे.

पाण्याची बचत व्हावी म्हणून महापालिका वेगवेगळ्या उपाययोजना राबवणार आहे. शहरात १० नवीन हायड्रंट उभारले जातील. जलवाहिन्यांमधील गळती शोधून ती तातडीने दुरुस्त करण्याचेही निर्देश देण्यात आले आहेत. याशिवाय सुमारे ४०० विहिरींवर सौरऊर्जा यंत्रणा उभारण्याची तयारी केली जाणार आहे.

प्रक्रिया केलेल्या सांडपाण्याचा पुनर्वापर वाढवण्यावरही विशेष भर दिला जाणार आहे. जलतरण तलाव, उद्याने आणि पिण्याव्यतिरिक्त इतर कामांसाठी पुन्हा प्रक्रिया केलेले पाणी वापरण्याचे नियोजन आहे. त्यामुळे पिण्याच्या पाण्यावरील अतिरिक्त ताण कमी होण्यास मदत होणार आहे.

नागपूरच्या भविष्यातील पाणीपुरवठ्याच्या दृष्टीने कन्हान-कोलार बॅरेज प्रकल्प महत्त्वाचा मानला जात आहे. या प्रकल्पाचा अंदाजित खर्च ९५२ कोटी रुपये आहे. त्याचा सविस्तर प्रकल्प अहवाल मुख्यमंत्र्यांकडे सादर करण्यात आला असून, याबाबतचा प्रस्ताव राज्य सरकारकडेही पाठवण्यात आला आहे.

दरम्यान, ऑगस्ट २०२७ पर्यंत पेंचमधून १९० एमसीएम पाणी मिळण्यास मान्यता देण्यात आली आहे. त्यामुळे शहराच्या दीर्घकालीन पाणीपुरवठ्याला स्थैर्य मिळेल, अशी अपेक्षा आहे.

या बैठकीला आमदार प्रवीण दटके, आमदार कृष्णा खोपडे, महापौर नीता ठाकरे, महापालिका आयुक्त डॉ. विपीन इटनकर यांच्यासह वरिष्ठ अधिकारी उपस्थित होते. ग्रामीण भागाचा आढावा दुपारी २ ते ४ आणि शहरी भागाचा आढावा सायंकाळी ४ ते ६ या वेळेत घेण्यात आला.