रमा एकादशी आज: कोणत्या राशीने काय दान करावे, त्याची यादी

आज 5 नोव्हेंबर रोजी रमा एकादशी आहे. या दिवशी भगवान विष्णूंची पूजा करण्याला आणि दानधर्म करण्याला विशेष महत्त्व आहे. कोणत्या राशीच्या लोकांनी काय दान करावे किंवा अर्पण करावे, ते खाली दिले आहे.

हिंदू धर्मात प्रत्येक तिथीला आणि वाराला महत्त्व आहे. प्रत्येक महिन्यात दोन एकादशी येतात, एक शुक्ल पक्षात आणि दुसरी कृष्ण पक्षात. प्रत्येक एकादशीचे स्वतःचे महत्त्व असले, तरी वर्षभरात येणाऱ्या २४ एकादशींपैकी रमा एकादशीला महत्त्व आहे. ही एकादशी कार्तिक महिन्यातील कृष्ण पक्षातील तिथीला येते.

असे मानले जाते की या एकादशीचा उपवास केल्यास भगवान विष्णू प्रसन्न होतात आणि भक्ताच्या मनातील सर्व इच्छा पूर्ण करतात.

मेष राशीच्या लोकांनी भगवान विष्णूंना प्रसन्न करण्यासाठी रमा एकादशीच्या दिवशी लाल रंगाचे फूल अर्पण करावे. वृषभ राशीच्या लोकांनी या दिवशी पांढऱ्या वस्तूंचे दान करावे. पांढऱ्या वस्तू दान केल्याने सुख आणि समृद्धी येते, असे मानले जाते.

मिथुन राशीच्या लोकांनी भगवान विष्णूंना हिरव्या रंगाचे वस्त्र अर्पण करावे. त्यामुळे विष्णू प्रसन्न होतील. कर्क राशीच्या लोकांनी भगवान विष्णू आणि देवी लक्ष्मी यांना प्रसन्न करण्यासाठी खिरीचा नैवेद्य दाखवावा. खिरीचा नैवेद्य दाखवल्याने घरात आनंदाचे वातावरण येते, असे मानले जाते.

सिंह राशीच्या लोकांनी रमा एकादशीला भगवान विष्णूंना पिवळ्या रंगाचे वस्त्र अर्पण करावे आणि स्वतःही पिवळे वस्त्र परिधान करावे. यामुळे भगवान विष्णू प्रसन्न होतात. कन्या राशीच्या लोकांना आर्थिक समस्या जाणवत असतील, तर त्यांनी या दिवशी भगवान विष्णूंना पांढऱ्या मिठाईसोबत केसर अर्पण करावे. असे केल्याने घरात वर्षभर सुख आणि शांती लाभेल.

तूळ राशीच्या लोकांनी पांढऱ्या वस्तूंचे दान करावे, म्हणजे वैवाहिक जीवन चांगले राहील. वृश्चिक राशीच्या लोकांनी नोकरी आणि व्यवसायात अपेक्षित यश मिळावे म्हणून गुळाचे दान करावे. त्यामुळे त्यांच्यावर भगवान विष्णूंची कृपा राहील.

धनु राशीच्या लोकांनी भगवान विष्णूंचा आशीर्वाद मिळावा म्हणून पिवळे वस्त्र आणि चंदन दान करावे. त्यासोबत पिवळे फळही दान करावे. मकर राशीच्या लोकांनी दही आणि वेलचीचे दान करावे, त्यामुळे भगवान विष्णूंचा आशीर्वाद मिळतो.

कुंभ राशीच्या लोकांनी रमा एकादशीच्या दिवशी पिंपळाच्या झाडाखाली तिळाचा दिवा लावावा. यामुळे भगवान विष्णू प्रसन्न होतील. मीन राशीच्या लोकांनी या दिवशी गरिबांची सेवा करावी आणि गरिबांना दान द्यावे. तसेच भगवान श्रीहरींना मिश्रित नैवेद्य अर्पण करावा.

धर्म, ज्योतिष, वास्तु अशा विषयांवरील ही माहिती केवळ वाचकांच्या माहितीसाठी आहे. यासंबंधी कोणताही प्रयोग करण्यापूर्वी तज्ज्ञांचा सल्ला घेणे आवश्यक आहे.