वसुबारसेने दिवाळीची सुरुवात, गाय-वासराच्या पूजनाचा सण आणि प्रियजनांसाठी शुभेच्छा संदेश

वसुबारस हा सण दिवाळीच्या आनंदोत्सवाची सुरुवात करणारा पहिला महत्त्वाचा दिवस मानला जातो. दिवाळीतला पहिला सण म्हणून वसुबारसेकडे पाहिले जाते.

हिंदू पंचांगानुसार कार्तिक महिन्यातील कृष्ण पक्षातील द्वादशी तिथीला वसुबारस साजरी केली जाते. याच कारणामुळे या सणाला 'गोवत्स द्वादशी' असेही म्हणतात.

भारतीय संस्कृतीत गाय अत्यंत पूजनीय मानली गेली आहे. या दिवशी गोमातेचे आणि तिच्या वासराचे मनोभावे पूजन केले जाते. पौराणिक मान्यतेनुसार समुद्रमंथनाच्या वेळी देवांना आणि दानवांना सर्व इच्छा पूर्ण करणारी कामधेनू गाय मिळाली होती. तिचे कृतज्ञतापूर्वक स्मरण म्हणून या दिवशी गाय-वासराची पूजा करून त्यांच्याबद्दल आदर आणि प्रेम व्यक्त केले जाते.

वसुबारसेच्या दिवशी महिला सकाळी लवकर उठून अभ्यंगस्नान करतात. संध्याकाळी गोधूलि वेळेत गाय आणि तिच्या वासराला स्वच्छ धुतले जाते. त्यानंतर त्यांच्या पाठीवर आणि कपाळावर हळद-कुंकू आणि गुलालाची उधळण केली जाते. त्यांना फुलांच्या माळा घातल्या जातात. पुरणपोळी किंवा बाजरीची भाकरी आणि गहू यांचा विशेष नैवेद्य, म्हणजे घास, त्यांना भरवला जातो.

घरातील सुख, शांती, समृद्धी आणि निरोगी आयुष्यासाठी या दिवशी गोमातेचे आशीर्वाद घेतले जातात. शेतीप्रधान संस्कृतीत बळीराजाला आणि संपूर्ण मानवजातीला पोषण देणाऱ्या गोधनाला जपणे आणि त्यांचा सन्मान करणे हा या सणाचा मुख्य संदेश आहे.

वसुबारसेच्या निमित्ताने प्रियजनांना खास शुभेच्छा संदेश पाठवले जातात. त्यातले काही संदेश असे आहेत.

गोमातेच्या आशीर्वादाने आपल्या घरात सदा सुख, समृद्धी आणि भरभराट नांदो! वसुबारसच्या हार्दिक शुभेच्छा!

दिन दिन दिवाळी, गाई म्हशी ओवाळी, गाई म्हशी कोणाच्या, प्रिय बळीराजाच्या. वसुबारसेच्या हार्दिक शुभेच्छा!

गोमातेची कृपा सदैव आपल्या कुटुंबावर राहो. प्रत्येक दिवस आनंदाचा आणि प्रत्येक क्षण सुखाचा जावो! वसुबारसच्या हार्दिक शुभेच्छा!

दिवाळीचा पहिला दिवा आणि गाय-वासराची माया, तुम्हाला व तुमच्या परिवाराला मिळो ईश्वराची अखंड छाया. वसुबारस आणि गोवत्स द्वादशीच्या खूप खूप शुभेच्छा!

गोमाता अर्थात कामधेनू, तिच्या आशीर्वादाने तुमच्या सर्व मनोकामना पूर्ण होवोत! वसुबारस आणि गोवत्स द्वादशीच्या खूप खूप शुभेच्छा!

शेतात राब राब राबणाऱ्या बळीराजाला सुख-समृद्धी आणि भरभराट लाभो, हीच ईश्वरचरणी प्रार्थना. वसुबारसेच्या हार्दिक शुभेच्छा!

गोमातेच्या चरणी ठेवून माथा, गाऊया तिच्या वात्सल्याची गाथा! वसुबारसेच्या सर्वांना मंगलमय शुभेच्छा!

गोधूलि वेळेचा हा पावन क्षण, आनंदाने भरून जावो तुमचे मन! सर्वांना वसुबारसेच्या हार्दिक शुभेच्छा!

मांगल्याचा सण, प्रकाशाची पहाट, तुमच्या आयुष्यात येवो यशाची लाट! गोवत्स द्वादशी व वसुबारसच्या हार्दिक शुभेच्छा!