राजुरात वडिलांच्या खुनाच्या आरोपावरून ३१ वर्षांच्या मुलाला पोलिसांनी केली अटक

राजुरा पोलीस स्टेशनच्या हद्दीतील एका खून प्रकरणात पोलिसांनी मृताच्या ३१ वर्षांच्या मुलाला अटक केली आहे. वडिलांचा गळा आवळून त्यांचा खून केल्याचा आरोप त्याच्यावर आहे. पोलिसांनी सांगितल्यानुसार, हा प्रकार आत्महत्या वाटावा म्हणून त्याने मृतदेहाजवळ तणनाशकाची बॉटल ठेवली.

निखील शंकर काळे (वय ३१, रा. धिडसी, ता. राजुरा) असे अटक झालेल्या आरोपीचे नाव आहे. खून झालेल्या वडिलांचे नाव शंकर परशुराम काळे (वय ५९) आहे. पोलिसांच्या माहितीनुसार, २० मे २०२५ रोजी राजुरा पोलीस स्टेशनच्या हद्दीतील चार्ली येथे शेतशिवारात शंकर काळे यांचा मृतदेह संशयास्पद स्थितीत सापडला होता. त्यांच्या तोंडातून रक्त येत होते आणि विषारी औषधाचा वास येत होता. त्यामुळे सुरुवातीला हा अकस्मात मृत्यू असावा, असा संशय व्यक्त झाला.

मृताच्या मुलानेच दिलेल्या प्राथमिक माहितीवरून राजुरा पोलीस स्टेशनमध्ये अकस्मात मृत्यूची नोंद झाली होती. घटनास्थळी फवारणीचे तणनाशक औषध आणि तोंडाजवळ विषारी औषधाचा अंश दिसला. त्यामुळे सुरुवातीच्या तपासात हा आत्महत्येचा किंवा विषबाधेचा प्रकार वाटत होता.

पोलिसांनी मृतदेह ताब्यात घेतला आणि उपजिल्हा रुग्णालय राजुरा येथे शवविच्छेदन झाले. शवविच्छेदन करणाऱ्या वैद्यकीय अधिकाऱ्यांनी व्हिसेरा राखून ठेवला आणि रासायनिक विश्लेषणासाठी पाठवला. व्हिसेरा अहवालात सुरुवातीला शरीरात कोणतेही विष नसल्याचे स्पष्ट झाले. मात्र शवविच्छेदन अहवालातील बारीक निरीक्षणांमध्ये गळ्याच्या स्नायूंना दुखापत झाल्याचे आणि हायॉईड हाड आतल्या बाजूला मोडल्याचे गंभीर निष्कर्ष समोर आले.

यानंतर राजुरा पोलिसांनी प्रकरणाची नव्याने चौकशी सुरू केली आणि वैद्यकीय अधिकाऱ्यांचे मत पुन्हा मागवले. डॉक्टर शुभम श्रीवास्तव यांनी स्पष्ट मत दिले की मृताने विष प्राशन केल्याचे निष्पन्न झालेले नाही. गळा दाबल्यामुळे किंवा फासावर लटकल्यामुळे हायॉईड हाड मोडून मृत्यू झाला, असे त्यांनी सांगितले. या अहवालानंतर पोलिसांनी मृताचा मुलगा निखील काळे याची कसून चौकशी केली. पोलिसांच्या म्हणण्यानुसार, त्याने गुन्ह्याची कबुली दिली.

पोलिसांच्या चौकशीत समोर आलेली माहिती अशी की, ही घटना १९ मे २०२५ रोजी सायंकाळी सातच्या सुमारास सुरू झाली. घरातली सोन्याची गोफ चोरीला गेल्याचा संशय व्यक्त करून आरोपीची आई मंदा काळे यांनी शंकर काळे यांच्यासमोर निखीलवर आरोप केला होता. त्यावरून बाप-लेकात जोरदार वाद झाला आणि दोघांत मारामारी झाली. रात्री वडील शेतात राखण करायला, म्हणजे जागल करायला, निघून गेले. आरोपी गावात ट्रॅक्टर चालवून रात्री अकराला घरी परतला.

वडिलांनी केलेल्या मारहाणीचा राग मनात धरून निखील रात्री एकच्या सुमारास शेतात गेला, असे पोलिसांनी सांगितले. तिथे झोपलेल्या वडिलांशी त्याचा पुन्हा वाद झाला. रागाच्या भरात त्याने वडिलांना खाटेवर पाडले आणि दोन्ही हातांनी त्यांचा गळा दाबला, असा आरोप आहे.

पोलिसांच्या माहितीनुसार, वडिलांचा मृत्यू झाल्यावर आरोपीने पुरावा नष्ट करण्यासाठी मृतदेह सुबाभळीच्या झाडाजवळच्या धुऱ्यावर नेऊन ठेवला. शेतात पडलेली तणनाशकाची बॉटल आणून त्याने वडिलांच्या तोंडाला औषध लावले आणि लोकांची दिशाभूल करण्यासाठी बनाव रचला. आपला गुन्हा झाकला जावा म्हणून त्याने पोलिसांत खोटी तक्रारही दिली, असे पोलिसांचे म्हणणे आहे.

राजुरा पोलीस स्टेशनचे पोलीस निरीक्षक नितीन चिंचोळकर यांच्या मार्गदर्शनाखाली पोलिसांनी वैद्यकीय अहवाल आणि आरोपीचा कबुलीजबाब यानंतर कायदेशीर कारवाई केली आहे. आरोपी निखील शंकर काळे याच्याविरुद्ध भारतीय न्याय संहिता २०२३ च्या कलम १०३(१) म्हणजे खून आणि कलम २४० म्हणजे गुन्हा लपवणे व खोटा पुरावा देणे, या अंतर्गत गुन्हा दाखल झाला आहे. पुढील कायदेशीर कारवाई सुरू आहे. या घटनेमुळे राजुरा तालुक्यात मोठी खळबळ उडाली आहे.