राजुऱ्यात चितळाच्या शिकारीचा आरोप; तिघे ताब्यात, १९ किलो मांस जप्त

राजुरा वन विभागाच्या पथकाने मंगळवारी, २७ ऑक्टोबर रोजी संध्याकाळी चुनाला परिसरात धाड टाकली आणि चितळाच्या शिकारीचा आरोप असलेल्या तीन जणांना ताब्यात घेतले. राजुरा वनपरिक्षेत्रांतर्गत येणाऱ्या चुनाला नियत वनक्षेत्रात नर चितळाची शिकार करून त्याच्या मांसाची विल्हेवाट लावल्याचा हा प्रकार उघडकीस आल्याचे सांगण्यात आले. या कारवाईत वन विभागाने एकूण १९ किलो मांस जप्त केले आहे.

राजुरा शहरापासून अवघ्या चार किलोमीटर अंतरावर असलेल्या चुनाला परिसरात एका नर चितळाची शिकार करून त्याचे मांस विक्रीसाठी आणि खाण्यासाठी लपवून ठेवण्यात आले आहे, अशी गोपनीय माहिती वन विभागाला मिळाली होती. या माहितीच्या आधारे वन कर्मचाऱ्यांनी तातडीने त्या ठिकाणी छापा टाकला. कारवाईच्या वेळी आरोपी चितळाचे मांस शिजवत असल्याचे निष्पन्न झाले, तर उरलेले मांस विक्रीच्या उद्देशाने कापून ठेवलेले होते. पथकाने तिघांना रंगेहात ताब्यात घेतले.

वन विभागाच्या माहितीनुसार, ताब्यात घेतलेल्यांमध्ये पिंटू गणपती राधी (५०), सुरेश चिलमवार आणि रायमलू लिंगमवार यांचा समावेश आहे. हे तिघेही चुनाला येथील रहिवासी आहेत. झडतीदरम्यान घटनास्थळावरून १५ किलो कच्चे मांस आणि ४ किलो शिजवलेले मांस मिळाले, म्हणजेच एकूण १९ किलो मांस जप्त झाले. शिकारीसाठी वापरल्याचा संशय असलेली कुऱ्हाडही पथकाने ताब्यात घेतली आणि हा सगळा मुद्देमाल जप्त करण्यात आला.

या प्रकरणी तिन्ही आरोपींविरुद्ध वन्यजीव संरक्षण कायद्यान्वये (Wildlife Protection Act) गुन्हा दाखल करण्यात आला आहे. पुढील कायदेशीर कारवाई सुरू असल्याची माहिती देण्यात आली आहे. आरोपींना सध्या ताब्यात घेण्यात आले आहे.

ही कारवाई उपविभागीय वनाधिकारी मंगेश गिरडकर आणि वनपरिक्षेत्र अधिकारी गजानन इंगले यांच्या मार्गदर्शनाखाली पार पडली. कारवाईत क्षेत्र सहायक संजय गरमडे, वनरक्षक अंकिता नेवारे, गीता चव्हाण, मीनाक्षी सातपुते, तानाजी कामले, भोजराज दांडेकर, पवन मांदुलवार आणि मारोती चापले यांनी सहभाग घेतला. तसेच वनमजूर गंगाधर मोहितकर, संतोष किनाके, बलदेव मेश्राम, नरेश निखाडे आणि गंगाधर सोपनकर हेही या पथकात होते. या कारवाईमुळे वन्यजीव तस्करांचे धाबे दणाणले आहेत.