नागपूरला उपचारासाठी गेले, इकडे चुनाळ्यात बंद घर फोडून १७ हजार २०० रुपयांचा ऐवज लंपास

चंद्रपूर जिल्ह्याच्या राजुरा पोलीस ठाण्याच्या हद्दीत येणाऱ्या चुनाळा वॉर्ड क्रमांक २ मध्ये घरफोडीची घटना उघडकीस आली आहे. घर बंद असल्याचा फायदा घेऊन अज्ञात चोरट्यांनी कुलूप कुऱ्हाडीने आणि हत्याराने तोडले आणि आत शिरून लाकडी अलमारीतली रोख रक्कम व चांदीचे दागिने लंपास केले. एकूण १७ हजार २०० रुपयांचा ऐवज चोरीला गेला आहे. या प्रकरणी राजुरा पोलिसांनी अज्ञात चोरट्यांविरुद्ध भारतीय न्याय संहितेच्या (बीएनएस) विविध कलमांखाली गुन्हा दाखल केला असून परिसरात मोठी खळबळ उडाली आहे.

पोलिसांनी दिलेल्या माहितीनुसार आणि फिर्यादीच्या तक्रारीनुसार, फिर्यादी सुरेश हरिचंद्र वांढरे (वय ६३, रा. चुनाळा वॉर्ड नं. २, राजुरा) हे वेकोलिमधून (W.C.L.) सेवानिवृत्त झाले आहेत आणि पत्नीसह राहतात. ५ ऑक्टोबर २०२६ रोजी त्यांचे आणि त्यांच्या पत्नीचे दोन्ही डोळ्यांचे ऑपरेशन होणार होते. म्हणून ते उपचारासाठी नागपूरला मुलीच्या घरी गेले होते. जाताना त्यांनी घराला कुलूप लावले आणि घराकडे लक्ष ठेवण्यासाठी लहान भाऊ दीपक हरिचंद्र वांढरे यांना सांगितले होते.

ही चोरी २५ ऑक्टोबर २०२६ रोजी रात्री ११ वाजता ते २६ ऑक्टोबर २०२६ रोजी पहाटे ५ वाजण्याच्या दरम्यान झाली. सोमवारी, २६ ऑक्टोबर २०२६ रोजी सकाळी सुमारे ६:२० वाजता शेजारी राहणारे आशिष भोंगळे यांनी सुरेश वांढरे यांना फोन केला. घराच्या कंपाऊंडचे आणि मुख्य दरवाजाचे गेट उघडे दिसत असल्याचे त्यांनी कळवले. तुम्ही घरी परत आला आहात का, असे त्यांनी विचारले असता वांढरे यांनी आपण नागपूरलाच असल्याचे सांगितले. घरात कोणी नसताना गेट उघडे असल्याने चोरीचा संशय आला आणि त्यांनी भाऊ दीपक यांना लगेच घरी पाठवले.

दीपक वांढरे यांनी घरी जाऊन पाहणी केली. अज्ञात चोरट्यांनी घराच्या आणि वॉलकंपाऊंडच्या गेटचे कुलूप तोडून आत प्रवेश केल्याचे व चोरी झाल्याचे त्यांनी सांगितले. त्यानंतर सुरेश वांढरे आणि त्यांची पत्नी नागपूरहून तातडीने राजुऱ्यातल्या घरी परतले. घरात तपासणी केली तेव्हा बेडरूममधल्या शोकेसच्या लाकडी अलमारीतले कपडे अस्ताव्यस्त पडलेले दिसले. अलमारीच्या लॉकरमध्ये ५०० रुपयांच्या नोटांची २० पत्ती, म्हणजे एकूण १० हजार रुपयांची रोकड ठेवली होती, ती तसेच चांदीचे जुने दागिने चोरट्यांनी नेले होते.

चोरीला गेलेल्या चांदीच्या वस्तूंची यादी अशी आहे: तीन जुने करडे (५० ग्रॅम, किंमत १५०० रुपये), तीन जुनी चांदीची नाणी (४० ग्रॅम, १२०० रुपये), दोन जुने चमचे (१० ग्रॅम, ३०० रुपये), एक जुनी प्लेट (२० ग्रॅम, ६०० रुपये), एक जुना पेला (२० ग्रॅम, ६०० रुपये), पायातले चार जुने जोडवे (४० ग्रॅम, १२०० रुपये), एक जोड जुनी चांदीची चाळ (४० ग्रॅम, १२०० रुपये) आणि दोन जुने चांदीचे दिवे (२० ग्रॅम, ६०० रुपये). रोख १० हजार रुपये आणि या वस्तूंचे मिळून एकूण १७ हजार २०० रुपयांचा ऐवज चोरट्यांनी नेला.

सुरेश हरिचंद्र वांढरे यांनी राजुरा पोलीस ठाण्यात येऊन तोंडी तक्रार दिली. त्यावरून अज्ञात आरोपींविरुद्ध भारतीय न्याय संहिता (बीएनएस) २०२३ च्या कलम ३०५ आणि ३३१(४) अन्वये गुन्हा नोंदवण्यात आला आहे. या प्रकरणाचा पुढील तपास पोलीस उपनिरीक्षक लक्ष्मण सुभाष लोकरे करत असून पोलीस चोरट्यांचा कसून शोध घेत आहेत.