फोन चोरीला गेला तर लगेच सिम ब्लॉक करा, पोलिसांत तक्रार द्या आणि IMEI ब्लॉक करा

स्मार्टफोन हे आपल्यासाठी सर्वात महत्त्वाचे गॅझेट झाले आहे. त्याच्याशिवाय एक मिनिटही राहणे अनेकांना जमत नाही, कारण स्मार्टफोनच्या मदतीने आपण अनेक कामे चुटकीसरशी करतो. फोटो, बँकिंग ॲप्स, सोशल मीडिया अकाऊंट्स आणि इतर बरीच माहिती फोनमध्ये सेव्ह केलेली असते. महत्त्वाचे डॉक्यूमेंट्सही फोनमध्येच ठेवलेले असतात. त्यामुळे फोन चोरीला गेला तर मोठी समस्या उभी राहू शकते.

फोन चोरीला गेल्यानंतर काय करावे, हे अनेकांना सुचत नाही. योग्य पाऊल लगेच उचलले नाही तर मोठे नुकसान होऊ शकते. फोनमधील डेटाचा गैरवापर केला जाऊ शकतो आणि तुमचे बँक अकाऊंटही रिकामे केले जाऊ शकते. म्हणूनच वेळ वाया न घालवता तीन महत्त्वाची कामे सर्वात आधी करायला हवीत.

पहिले काम म्हणजे तुमचे सिम कार्ड त्वरित ब्लॉक करणे. आजकाल बँक अकाऊंट्स, यूपीआय ॲप्स आणि सोशल मीडिया प्लॅटफॉर्म्स तुमच्या नंबरला लिंक केलेले असतात. सिम कार्ड ब्लॉक केले नाही तर फोन चोरणारी कोणतीही व्यक्ती ओटीपी मिळवू शकते आणि तुमचे बँक अकाऊंट रिकामे करू शकते.

तुमच्या नावाने आणि तुमच्या नंबरवरून फोन किंवा मेसेज करून लोकांची फसवणूकही केली जाऊ शकते. म्हणून एअरटेल, जिओ, वोडाफोन-आयडिया किंवा बीएसएनएल, यापैकी जी कंपनी तुमची सर्व्हिस प्रोव्हायडर असेल, तिच्या कस्टमर केअरला लगेच कॉल करा. सगळी परिस्थिती सांगा आणि तुमचे सिम कार्ड ब्लॉक करण्याची विनंती करा.

सिम कार्ड ब्लॉक केल्यानंतर दुसरे सर्वात महत्त्वाचे काम म्हणजे पोलिसांत तक्रार दाखल करणे. ही तक्रार तुम्ही ऑनलाईन पोर्टलद्वारेही देऊ शकता. फोन चोरीला गेला किंवा हरवला, दोन्ही वेळेस पोलिसांत तक्रार दाखल करा. हा अहवाल सायबर सेल आणि पोलीस नोंदींसाठी अत्यंत महत्त्वाचा आहे. फोन कायमस्वरूपी ब्लॉक करण्यासाठी किंवा त्याचा मागोवा घेण्यासाठी लागणारी सरकारी प्रक्रिया पूर्ण करताना तो उपयोगी पडतो.

अनेक राज्यांमध्ये ऑनलाइन ई-एफआयआर दाखल करण्याची सुविधा उपलब्ध आहे. त्यामुळे घरबसल्या लगेच पोलिसांत तक्रार नोंदवता येते. हा अहवाल कायदेशीर पुरावा म्हणून काम करतो. नंतर CEIR पोर्टलवर विनंती सादर करताना तुम्ही त्याचा वापर करू शकता. तसेच कोणत्याही अनुचित घटनेच्या वेळी तो तुमचे संरक्षणही करतो.

तिसरे काम म्हणजे डिपार्टमेंट ऑफ टेलीकॉमच्या संचार साथी पोर्टल आणि CEIR प्लॅटफॉर्मवर जाऊन IMEI नंबर ब्लॉक करणे. त्यासाठी CEIR च्या ऑफिशियल वेबसाइटला (https://www.ceir.gov.in/Home/index.jsp) भेट द्या. तिथे चोरीला गेलेल्या फोनचा IMEI नंबर, मोबाईल नंबर आणि खरेदीचे बिल किंवा पोलीस तक्रारीची प्रत अपलोड करावी लागेल. त्यानंतर फोन ब्लॉक करण्याची विनंती करावी लागेल.

तुम्ही विनंती सबमिट केल्यानंतर सरकार आणि सर्व टेलिकॉम कंपन्या त्या फोनचा IMEI नंबर देशभरात ब्लॅकलिस्ट करतील. याचा सर्वात मोठा फायदा म्हणजे चोराने कोणतेही नवीन सिम कार्ड घातले तरी तो फोन पूर्णपणे निरुपयोगी ठरतो. म्हणजेच फोन केवळ पेपरवेट होईल आणि कोणत्याही नेटवर्कवर चालणार नाही.

थोडक्यात, फोन चोरीला गेल्यावर सिम कार्ड ब्लॉक करणे, पोलिसांत तक्रार दाखल करणे आणि CEIR पोर्टलवर IMEI नंबर ब्लॉक करणे, ही तीन कामे लगेच करायची आहेत.