नेतन्याहू यांचे शिक्षण कुठे झाले? राजकारणात येण्यापूर्वी ते काय करायचे?

इस्रायलचे पंतप्रधान बेंजामिन नेतन्याहू हे जगातील सर्वाधिक चर्चेत असलेल्या नेत्यांपैकी एक आहेत. गाझामधील सुरू असलेला संघर्ष, इराणसोबतचा तणाव आणि इस्रायलच्या धोरणांमुळे ते सतत चर्चेत असतात. त्यांचे राजकारण आणि त्यांचे निर्णय यांच्याबरोबरच त्यांचे वैयक्तिक आयुष्य आणि शिक्षण याबद्दलही लोकांमध्ये उत्सुकता असते. म्हणूनच नेतन्याहू किती शिकलेले आहेत, त्यांनी कुठे शिक्षण घेतले आणि राजकारणात येण्यापूर्वी त्यांचे करिअर कसे होते, हे पाहूया.

नेतन्याहू यांनी आपले सुरुवातीचे शिक्षण जेरुसलेममध्ये घेतले. हायस्कूलचे शिक्षण त्यांनी अमेरिकेतील पेनसिल्व्हेनिया येथील 'चेल्टेनहॅम हायस्कूल'मधून पूर्ण केले. पुढील शिक्षणासाठी त्यांनी अमेरिकेतील प्रसिद्ध 'मॅसेच्युसेट्स इन्स्टिट्यूट ऑफ टेक्नॉलॉजी'मध्ये (MIT) प्रवेश घेतला. ही संस्था जगातील नामांकित शिक्षण संस्थांपैकी एक आहे.

एमआयटीमधून त्यांनी आर्किटेक्चर (वास्तुकला) म्हणजेच इमारतींची रचना आणि बांधकामाशी संबंधित विषयात बॅचलर पदवी मिळवली. त्यानंतर त्यांनी एमआयटीमधूनच मॅनेजमेंटमध्ये पुढील शिक्षण पूर्ण केले. एमआयटीमध्ये शिकत असतानाच त्यांनी राज्यशास्त्राशी संबंधित विषयांचाही अभ्यास केला.

राज्यशास्त्राचे उच्च दर्जाचे शिक्षण त्यांनी एमआयटी आणि हार्वर्ड युनिव्हर्सिटी या दोन्ही ठिकाणी घेतले होते. या विषयात पीएच.डी.साठीचे संशोधन आणि कोर्सवर्कही त्यांनी पूर्ण केले होते. मात्र १९७६ मध्ये त्यांचे मोठे भाऊ जोनाथन यांचे निधन झाले आणि त्यानंतर ते शिक्षण सोडून इस्रायलला परतले. यामुळे त्यांची पीएच.डी. पूर्ण होऊ शकली नाही.

राजकारणात येण्यापूर्वी नेतन्याहू यांनी इस्रायली सैन्यात काम केले आहे. इस्रायली लष्कराच्या विशेष कमांडो युनिट 'सायरेट मतकल'मध्ये (Sayeret Matkal) त्यांनी सेवा बजावली होती. या काळात त्यांनी अनेक लष्करी मोहिमांमध्ये भाग घेतला. लष्करातील कामाच्या अनुभवाचा त्यांच्या आयुष्यावर आणि पुढील करिअरवर मोठा प्रभाव पडला. लष्करातील सेवेनंतर त्यांनी आंतरराष्ट्रीय पातळीवरही काम केले. अमेरिकेतील इस्रायलच्या मुत्सद्दी मिशनमध्ये त्यांनी महत्त्वाची भूमिका बजावली आणि नंतर संयुक्त राष्ट्रांमध्ये इस्रायलचे राजदूत म्हणूनही काम केले.

पंतप्रधानपदाबद्दल सांगायचे तर, बेंजामिन नेतन्याहू १९९६ मध्ये पहिल्यांदा इस्रायलचे पंतप्रधान झाले. त्यानंतर २००९ मध्ये ते पुन्हा या पदावर आले आणि प्रदीर्घ काळ सरकारचे नेतृत्व केले. डिसेंबर २०२२ मध्ये त्यांनी पुन्हा एकदा पंतप्रधानपदाची सूत्रे हाती घेतली. इस्रायलमध्ये सर्वाधिक काळ पंतप्रधान राहिलेल्या नेत्यांमध्ये त्यांचा समावेश होतो.