नवरात्रीआधी तांब्याचा कलश चमकवा: घरातील साहित्याने काळा थर निघण्याची सोपी ट्रिक

शारदीय नवरात्रीला ११ ऑक्टोबरपासून सुरुवात होणार आहे. नवरात्रीचा शेवटचा दिवस १९ ऑक्टोबरला असणार आहे, तर २० ऑक्टोबरला दसरा हा सण साजरा केला जाणार आहे.

नवरात्रीची सुरुवात घरात कलशाची घटस्थापना करून केली जाते. या पूजेत अनेकजण तांब्याचा कलश वापरतात. तांब्याचे कलश रोजच्या वापरात नसतात. त्यामुळे सणासुदीच्या वेळी तो अचानक बाहेर काढला की त्यावर बरीच घाण साचलेली दिसते.

काळा पडलेला हा तांब्याचा कलश पुन्हा नव्यासारखा चमकवायचा तर बरीच मेहनत घ्यावी लागते. पण योग्य आणि सोपी घरगुती ट्रिक वापरली, तर कोणत्याही मेहनतीशिवाय कलशाला आरशासारखी चमक मिळवून देता येते. @ashuscookingmagic नावाच्या यूट्यूब अकाऊंटवर ही ट्रिक शेअर करण्यात आली आहे.

यासाठी लागणारे साहित्य घरात सहज उपलब्ध असते. त्यात एक ते दोन कप व्हिनेगर, दोन ते तीन चमचे मीठ, लिंबाचा रस, लिंबाची साल, क्लीनिंग सॉल्यूशन किंवा भांडी घासण्याचे लिक्विड आणि पाणी एवढ्या गोष्टी लागतात.

क्लिनिंग लिक्विड तयार करण्यासाठी सर्वप्रथम एका वाटीत पाणी घ्या. त्यात योग्य प्रमाणात व्हिनेगर घाला. त्यानंतर दोन ते तीन चमचे मीठ आणि एका लिंबाचा रस पिळून मिसळा. सगळे साहित्य नीट मिसळल्यावर त्यात क्लीनिंग सॉल्यूशन किंवा भांडी घासण्याचे लिक्विड घालून पुन्हा मिक्स करा. अशा प्रकारे द्रावण तयार होते, आणि याच्या मदतीने तांब्याचा कलश स्वच्छ करायचा आहे.

तांब्याच्या भांड्यावर खूप हट्टी डाग जमा झाले असतील, तर भांडी किंवा कलश या द्रावणात तासभर भिजवत ठेवा. त्यानंतर स्क्रॅचच्या मदतीने हलक्या हाताने रगडून भांड्यांवर जमलेली सगळी घाण स्वच्छ करा. या द्रावणामुळे भांड्यांवरचा काळा थर आपोआप निघायला लागतो, त्यामुळे फार मेहनत घेण्याची गरज भासणार नाही.

तांब्याची चमक टिकवून ठेवण्यासाठीही एक खास टिप सांगण्यात आली आहे. तांब्याची भांडी घासल्यानंतर त्यांना लगेच सुती कापडाने नीट पुसून घ्या. भांड्यांवर पाण्याचा एक थेंबही राहायला नको, हे लक्षात ठेवा. तांब्याच्या भांड्यांवर जास्त वेळ पाणी राहिले, तर त्यावर हिरवा थर तयार होतो. याउलट भांडी लगेच सुकवून, पुसून ठेवली तर ती लवकर काळी पडत नाहीत.