नवरात्रीच्या मुहूर्तावर 'महा देवी आदिशक्ती' ॲनिमेटेड चित्रपटाची पहिली झलक, फेब्रुवारी २०२७ मध्ये रिलीज

नवरात्रीच्या शुभारंभाच्या मुहूर्तावर 'महा देवी आदिशक्ती - द लिजेंड ऑफ माँ दुर्गा' या येऊ घातलेल्या ॲनिमेटेड चित्रपटाची पहिली झलक प्रदर्शित करण्यात आली आहे. भारतीय संस्कृती, अध्यात्म आणि देवीच्या दिव्य शक्तीचा महिमा मोठ्या पडद्यावर उलगडणाऱ्या या चित्रपटाबद्दल प्रेक्षकांना उत्सुकता आहे. हा चित्रपट फेब्रुवारी २०२७ मध्ये जगभरातील चित्रपटगृहांमध्ये प्रदर्शित होणार आहे.

या चित्रपटाचे दिग्दर्शन मिलिंद नंदनवार यांनी केले आहे. लेखन प्रसिद्ध लेखक आणि कादंबरीकार अक्षत गुप्ता यांचे आहे. अर्था एंटरटेनमेंट अँड ॲनिमेशनचे गौरव मल्होत्रा यांनी चित्रपटाची निर्मिती केली असून, श्रेयस पुराणिक यांच्या संगीतामुळे चित्रपटाला विशेष रंगत येणार आहे.

चित्रपटात देवीची विविध दिव्य रूपे आणि तिचे अलौकिक सामर्थ्य पाहायला मिळणार आहे. महिषासुराचा वध करणाऱ्या महिषासुरमर्दिनीपासून अधर्म आणि दुष्ट शक्तींचा नाश करणाऱ्या देवी कालीपर्यंत, आदिशक्तीच्या अनेक गाथा या चित्रपटातून जिवंत केल्या जाणार आहेत. भारतीय पौराणिक कथा आधुनिक ॲनिमेशनच्या माध्यमातून नव्या पिढीपर्यंत पोहोचवण्याचा निर्मात्यांचा प्रयत्न आहे.

सध्या कृत्रिम बुद्धिमत्ता अर्थात AI चा वापर कंटेंट निर्मितीत वेगाने वाढत आहे. अशा काळात 'महा देवी आदिशक्ती'च्या निर्मात्यांनी पारंपरिक आणि हाताने केलेल्या ॲनिमेशनच्या कलेला प्राधान्य दिले आहे. या चित्रपटाच्या निर्मितीत १५० हून अधिक ॲनिमेटर्सनी योगदान दिले आहे. ॲनिमेशन ही केवळ तांत्रिक प्रक्रिया नसून मानवी कौशल्य, मेहनत आणि सर्जनशीलतेतून साकार होणारी कला आहे, हा दृष्टिकोन या निर्णयातून अधोरेखित होतो.

चित्रपटाच्या संकल्पनेबद्दल बोलताना दिग्दर्शक मिलिंद नंदनवार म्हणाले, "भारत ही भूमी कायमच अध्यात्म, भक्ती आणि कालातीत ज्ञानाची भूमी राहिली आहे. सनातन धर्मातील कथांनी आपल्या संस्कृतीला आकार दिला असून, त्यातील संदेश पिढ्यान्‌पिढ्या आजही तितकेच प्रासंगिक आहेत. या कथा आपल्याला आठवण करून देतात की, वाईट शक्ती कितीही सामर्थ्यशाली वाटल्या, तरी शेवटी धर्म आणि सत्याचाच विजय होतो."

ते पुढे म्हणाले, "मातेने तिची कथा तिच्या लेकरांपर्यंत पोहोचवण्यासाठी आम्हाला माध्यम म्हणून निवडले, हे आम्ही आमचे परमभाग्य मानतो. ही आमच्यासाठी एक मोठी संधी असण्यासोबतच एक गंभीर जबाबदारीही आहे, जी आम्ही पूर्ण श्रद्धा आणि समर्पणाने स्वीकारली आहे."

निर्माते गौरव मल्होत्रा यांनीही या प्रकल्पामागील भूमिका स्पष्ट केली. त्यांच्या म्हणण्यानुसार, धार्मिक दूरचित्रवाणी मालिका आणि पुस्तकांनी त्यांच्या पिढीला भारतीय संस्कृती व परंपरा समजून घेण्यासाठी महत्त्वाचे योगदान दिले. मात्र आज मुलांची आशय पाहण्याची पद्धत बदलत आहे. त्यामुळे या कालातीत कथा नव्या पिढीला सहज समजतील आणि त्यांच्याशी जोडल्या जातील, अशा स्वरूपात सांगण्याची गरज जाणवली, असे ते म्हणाले.

'महा देवी आदिशक्ती'च्या माध्यमातून भारतीय आध्यात्मिक वारसा नव्या पिढीच्या जवळ आणण्याचा प्रयत्न असल्याचे त्यांनी सांगितले. त्याच वेळी कथांमधील मूळ भावना आणि पावित्र्य जपण्यावरही भर देण्यात आला आहे. संपूर्ण कुटुंबाने एकत्र बसून पाहावा, असा हा चित्रपट असल्याचे निर्मात्यांनी स्पष्ट केले.

भारतीय संस्कृतीतील पिढ्यान्‌पिढ्या चालत आलेल्या कथा आणि पारंपरिक हस्तनिर्मित ॲनिमेशन यांचा संगम 'महा देवी आदिशक्ती - द लिजेंड ऑफ माँ दुर्गा'मध्ये पाहायला मिळणार आहे. भारतीय परंपरा आणि आधुनिक सिनेमॅटिक अभिव्यक्ती यांची सांगड घालत देवीच्या गाथा मोठ्या पडद्यावर सादर करण्याचा या चित्रपटाचा प्रयत्न आहे. नवरात्रीच्या शुभारंभानिमित्त पहिली झलक समोर आली असून, फेब्रुवारी २०२७ मध्ये हा ॲनिमेटेड चित्रपट जगभरातील चित्रपटगृहांमध्ये प्रदर्शित होणार आहे.