नवरात्रीच्या नैवेद्यासाठी घरीच करा सफरचंदाची खीर, सोपी आणि चविष्ट रेसिपी

नवरात्रीचा उत्सव सुरू झाला की सगळीकडे आनंदाचे आणि उत्साहाचे वातावरण असते. या आनंदाच्या दिवसांत घरोघरी गोडाचे वेगवेगळे पदार्थ केले जातात. कधी शेवयांची खीर केली जाते, कधी तांदळाची खीर, तर कधी पुरणपोळीही केली जाते. पण देवीच्या नैवेद्यासाठी दरवेळी तेच ठरलेले पदार्थ करण्याऐवजी यंदा सोप्या पद्धतीने सफरचंदाची खीर करून पाहता येईल.

सफरचंद बाजारात कायमच मिळतात. कमी साहित्यात झटपट तयार होणारा पदार्थ करायला सगळ्यांनाच आवडतो, आणि ही खीर तशीच आहे. त्यामुळे नवरात्रीच्या नऊ दिवसांत देवीच्या नैवेद्यासाठी ही खीर नक्की करून बघा. एक गोष्ट मात्र लक्षात ठेवायची आहे. दुधात सफरचंद घातले की दूध बऱ्याचदा लगेच फुटते. म्हणून खीर करताना सफरचंद सगळ्यात शेवटी मिश्रणात घालावे.

आता ही खीर करण्याची सोपी रेसिपी पाहूया. त्यासाठी सफरचंद, दूध, वेलची पावडर, काजू, बदाम, साखर, तूप, केशर आणि पिस्ता एवढे साहित्य लागते.

कृतीची सुरुवात सफरचंदापासून करा. दाटसर आणि चविष्ट खीर हवी असेल तर सर्वात आधी सफरचंदाची साल काढा आणि ते बारीक किसून घ्या. मग कढईत एक लिटर दूध गरम करायला ठेवा. दुधाला उकळी आली की गॅस मंद आचेवर करून ठेवा. दूध कढईला चिकटू नये म्हणून ते चमच्याने सतत ढवळत राहा.

दूध आटल्यानंतर त्यात वेलची पावडर आणि केशराच्या काड्या घालून नीट मिसळा. आता दुसरी कढई घ्या. त्यात तूप गरम करा आणि किसून घेतलेले सफरचंद व साखर घालून एकत्र करा. साखर पूर्णपणे विरघळली की शिजवलेले हे मिश्रण थंड होण्यासाठी बाजूला ठेवा. सफरचंदातले पाणी पूर्णपणे आटवून टाकावे.

शेवटी, तयार केलेल्या घट्टसर दुधात सफरचंदाचे मिश्रण घालून व्यवस्थित ढवळा. त्यानंतर वरून बारीक चिरून घेतलेले काजू, बदाम आणि पिस्त्याचे तुकडे घालून पुन्हा एकदा मिसळा. अशा प्रकारे झटपट बनवलेली चविष्ट सफरचंद खीर तयार आहे. लहान मुलांसह घरातले सगळेच ती आवडीने खातील.