नवरात्रीत देवीच्या नैवेद्यासाठी मिल्क पावडरचे केशर-वेलची पेढे घरीच बनवा

शारदीय नवरात्र उत्सवाला लवकरच सुरुवात होणार आहे. यंदा नवरात्री ११ ते १९ ऑक्टोबर या कालावधीत साजरी केली जाणार आहे. या नऊ दिवसांमध्ये देवीच्या नऊ वेगवेगळ्या रूपांची पूजा केली जाते. नऊ दिवसांच्या उत्सवातील प्रत्येक दिवस अतिशय खास आणि आनंदाचा असतो.

उत्सवाच्या या नऊ दिवसांत देवीला रोज वेगवेगळ्या पदार्थांचा नैवेद्य बनवून दाखवला जातो, म्हणजे नऊ दिवसांसाठी नऊ वेगवेगळे पदार्थ. त्यामुळे उत्सवाच्या पहिल्याच दिवशी देवीच्या नैवेद्यासाठी मिल्क पावडर वापरून केशर-वेलची पेढे बनवता येतात.

गोड पदार्थ सगळ्यांनाच खायला खूप आवडतात. नैवेद्यासाठी नेहमीच दुकानातून विकतचे पदार्थ आणण्यापेक्षा हे केशर-वेलची पेढे घरच्या घरी कमी साहित्यात बनवता येतात. तुम्ही बनवलेले पेढे घरातल्या सगळ्यांना खूप आवडतील आणि त्यांची चवही मस्त लागेल.

सणावारांच्या दिवसांत बाजारात मोठ्या प्रमाणावर भेसळ केली जाते. त्यामुळे भेसळयुक्त पदार्थ खाण्याऐवजी दुधाचा वापर करून घरीच चविष्ट पदार्थ बनवावेत. चला तर मग, मिल्क पावडर वापरून केशर-वेलची पेढे बनवण्याची कृती जाणून घेऊया.

या पेढ्यांसाठी मिल्क पावडर, दूध, तूप, पिठीसाखर, वेलची पावडर, केशर आणि पिस्त्याचे काप एवढे साहित्य लागते.

कृतीची सुरुवात अशी करावी की सर्वात आधी कढईत दूध, तूप आणि मिल्क पावडर एकत्र करून घ्यावी. त्यानंतर गॅस सुरू करून सगळे मिश्रण व्यवस्थित एकजीव करावे.

चमच्याच्या मदतीने मिश्रण सतत हलवत राहावे, म्हणजे ते कढईला चिकटणार नाही. दोन ते तीन मिनिटे झाल्यानंतर मिश्रण घट्ट होण्यास सुरुवात होईल.

त्यानंतर त्यात केशर दूध घालून ते नीट मिसळावे. मग गॅस बंद करून दुधाचे हे मिश्रण थंड होण्यासाठी बाजूला ठेवावे. थंड झालेल्या मिश्रणात पिठीसाखर आणि वेलची पावडर घालून ते हाताने मळून घ्यावे.

मिश्रण मऊ झाल्यावर हातांना तूप लावून तुम्हाला हव्या त्या आकारात पेढे वळून घ्यावेत. पेढ्याला आकार दिल्यानंतर मधोमध अंगठ्याने हलका दाब द्यावा आणि वरून सजावटीसाठी पिस्त्याचे काप लावावेत.

अशा प्रकारे देवीच्या नैवेद्यासाठी मऊ आणि स्वादिष्ट केशर पेढे तयार होतात. नवरात्रीच्या पहिल्या दिवशी हे पेढे करून पाहता येतील.