टायगर श्रॉफवरील हल्ल्यानंतर कलाकारांच्या सुरक्षेवरून राजकारण तापलं, सपकाळ यांचा फडणवीस सरकारवर हल्लाबोल

अभिनेता टायगर श्रॉफ याच्यावर प्राणघातक हल्ला झाल्यानंतर मुंबईसारख्या शहरातही सुरक्षेचा प्रश्न पुढे आला आहे. गेल्या काही वर्षांत मुंबईत बॉलिवूड कलाकार आणि राजकीय नेत्यांवर जीवघेणे हल्ले झाले आहेत. त्यामुळे विरोधकांनी राज्य सरकारला धारेवर धरलं आहे. पोलीस यंत्रणा आणि राज्य सरकार नेमकं करतंय काय, असा संतप्त सवाल ते विचारत आहेत. कलाकारांच्या सुरक्षेचा हा प्रश्न आता राजकीय चर्चेचा मोठा विषय बनला आहे.

काँग्रेस प्रदेशाध्यक्ष हर्षवर्धन सपकाळ यांनी या प्रकरणावरून राज्यातील महायुती सरकारवर आणि मुख्यमंत्री देवेंद्र फडणवीस यांच्यावर जोरदार टीका केली. सत्ताधाऱ्यांच्या राजकीय पाठबळाशिवाय गुंडांची एवढी हिंमत वाढणं अशक्य आहे, असा गंभीर आरोप त्यांनी केला.

टिळक भवन येथे प्रसारमाध्यमांशी बोलताना सपकाळ यांनी चित्रपटसृष्टीतील कलाकारांच्या सुरक्षेचा मुद्दा मांडला. ते म्हणाले, "मुंबईची शान असणारे बॉलिवूड आणि चित्रपटसृष्टी आता स्वतःचा जीव वाचवण्यासाठी आणि सुरक्षिततेच्या कारणास्तव मुंबई सोडून इतर राज्यांत किंवा देशाबाहेर स्थलांतर करण्याच्या विचारात आहे, ही महाराष्ट्रासाठी मोठी सांस्कृतिक आणि आर्थिक हानी आहे."

सपकाळ पुढे म्हणाले, "गुजरातमधील साबरमतीच्या तुरुंगात बसून गुंड जर थेट चित्रपटसृष्टीला नियंत्रित करत असतील, तर पोलीस यंत्रणा व भाजपा महायुती सरकार नेमके करतेय तरी काय? सत्ताधाऱ्यांच्या राजकीय पाठबळाशिवाय गुंडांची एवढी हिंमत वाढणे अशक्य आहे." अशा शब्दांत त्यांनी सत्ताधाऱ्यांवर आरोप केले.

मुंबईसह महाराष्ट्रातील कायदा-सुव्यवस्थेवर बोट ठेवत सपकाळ यांनी मुख्यमंत्री आणि गृहमंत्री देवेंद्र फडणवीस यांना लक्ष्य केलं. गुन्हेगारीवर नियंत्रण मिळवता येत नसेल, तर त्यांनी राजीनामा द्यावा, अशी मागणी त्यांनी केली.

ऑल इंडियन सिने वर्कर्स असोसिएशनने कलाकारांच्या सुरक्षेसाठी केंद्रीय गृहमंत्र्यांकडे मागणी केल्याचाही उल्लेख सपकाळ यांनी केला.

याच कार्यक्रमात कल्याणमधील शिवसेना उद्धव बाळासाहेब ठाकरे गटाचे उपविभागप्रमुख नसरु शेख यांनी आपल्या समर्थकांसह काँग्रेसमध्ये प्रवेश केला, असं निवेदनात म्हटलं आहे. अस्लम सोयान यांच्यासह इतर पदाधिकारी आणि कार्यकर्त्यांनीही पक्षप्रवेश केला. प्रदेशाध्यक्ष हर्षवर्धन सपकाळ यांनी या नव्या सदस्यांचं स्वागत केलं.

आता बॉलिवूडच्या सुरक्षेच्या प्रश्नावर सरकार कोणती पावलं उचलतं आणि सपकाळ यांनी केलेल्या आरोपांबाबत अधिकृत पातळीवर काय माहिती समोर येते, हे पाहणं महत्त्वाचं ठरणार आहे.