मुंबईत २५ ऑक्टोबरपर्यंत जमावबंदीचा आदेश, पाच किंवा अधिक जणांच्या जमावावर निर्बंध

मुंबईकरांसाठी महत्त्वाची बातमी आहे. बृहन्मुंबई पोलीस आयुक्तालयाच्या हद्दीत शांतता आणि कायदा-सुव्यवस्था कायम राखण्यासाठी जमावबंदीचा आदेश जारी करण्यात आला आहे. हा आदेश 25 ऑक्टोबर 2026 पर्यंत लागू राहील. मुंबई पोलिसांनी हा आदेश जारी केला आहे.

महाराष्ट्र पोलीस अधिनियम, 1951 अंतर्गत मिळालेल्या अधिकारांचा वापर करून पोलीस उपआयुक्त (अभियान) यांनी हा आदेश लागू केला आहे. या आदेशामुळे सार्वजनिक ठिकाणी एकत्र येताना नागरिकांना काही नियम पाळावे लागणार आहेत.

आदेशानुसार पाच किंवा त्यापेक्षा जास्त लोकांनी एकत्र जमण्यावर निर्बंध घालण्यात आले आहेत. याशिवाय मिरवणूक काढणे, जमाव करून ध्वनीवर्धक किंवा सांगितीय बँड वाजवणे आणि फटाके फोडणे यांवरही बंदी आहे. त्यामुळे सार्वजनिक कार्यक्रम किंवा मिरवणुकीचे नियोजन करणाऱ्यांनी लागू असलेल्या नियमांची माहिती करून घेणे आवश्यक आहे.

मात्र काही कार्यक्रमांना या जमावबंदी आदेशातून वगळण्यात आले आहे. विवाह समारंभ, विवाहाशी संबंधित इतर विधी आणि अंत्यविधी यांना या आदेशातून सूट देण्यात आली आहे. तसेच कंपन्या, सहकारी संस्था आणि इतर संघटनांच्या कायदेशीर बैठका, क्लबमधील कार्यक्रम, सामाजिक मेळावे आणि संस्थांच्या नियमित कामकाजाचा भाग म्हणून होणारे कार्यक्रम यांनाही सूट आहे.

चित्रपटगृहे, नाट्यगृहे आणि सार्वजनिक मनोरंजनाची इतर ठिकाणे, न्यायालये, सरकारी व निमसरकारी कार्यालये, शाळा, कॉलेज आणि इतर शैक्षणिक संस्था यांचे नियमित कामकाज सुरू राहील. कंपन्या, कारखाने, दुकाने आणि इतर आस्थापनांमध्ये नियमित व्यापार व व्यवसायासाठी होणाऱ्या जमावालाही आदेशातून सूट देण्यात आली आहे.

शांततापूर्ण मार्गाने निघणाऱ्या मोर्चाला पोलिसांनी परवानगी दिली असेल, तर त्या मोर्चालाही जमावबंदी आदेशातून सूट असेल, म्हणजेच अशा मोर्चाला या आदेशाचा अडथळा येणार नाही.

पोलीस उपायुक्त (अभियान) अकबर पठाण यांनी आदेशाद्वारे ही माहिती दिली आहे. नागरिकांनी सार्वजनिक ठिकाणी एकत्र येताना लागू असलेल्या निर्बंधांची नोंद घ्यावी आणि पोलिसांच्या सूचनांचे पालन करावे, असे आदेशात म्हटले आहे.