मिठी नदी गाळ उपसा प्रकरणात अभिनेता दिनो मोरियावर अटकेची कारवाई, घरातून नेले

मिठी नदीतील गाळ उपशाच्या कथित गैरव्यवहाराच्या प्रकरणात बॉलिवूड अभिनेता दिनो मोरिया यांच्यावर मुंबई पोलिसांनी कारवाई केली आहे. मुंबई पोलिसांच्या आर्थिक गुन्हे शाखेने (EOW) त्यांची सुमारे 8 तास चौकशी केली. त्यानंतर त्यांना राहत्या घरातून ताब्यात घेऊन अटकेची कारवाई करण्यात आली.

अधिक चौकशीसाठी मोरिया यांना मुंबई पोलीस आयुक्तालयात नेण्यात आले.

मिठी नदीच्या गाळ उपशाच्या कामाशी संबंधित सुमारे 65 कोटी रुपयांच्या कथित आर्थिक गैरव्यवहाराचा तपास मुंबई पोलीस करत आहेत. या प्रकरणात BMC चे अधिकारी, कंत्राटदार आणि खासगी व्यक्ती यांच्याविरोधात आरोप आहेत. तपासात दिनो मोरिया आणि त्यांचा भाऊ सॅन्टिनो मोरिया यांची नावे पुढे आली होती. दोघांचा या प्रकरणातील मुख्य आरोपी केतन कदम यांच्याशी फोनवर वारंवार संपर्क झाल्याचे तपास यंत्रणांच्या लक्षात आले होते.

मुंबईत पावसाळ्यात पाण्याचा निचरा होण्यासाठी मिठी नदी महत्त्वाची मानली जाते. नदीतील गाळ काढण्यासाठी BMC ने वेगवेगळी यंत्रसामग्री वापरली. त्यात कोचीतील Matprop Technical Services Private Limited या कंपनीशी संबंधित यंत्रसामग्रीचा वापर झाल्याचे तपासात दिसून आले.

EOW च्या तपासानुसार, गाळ उपशाच्या कंत्राटांमध्ये कथित अनियमितता झाली आणि BMC चे 65 कोटी रुपयांपेक्षा जास्त आर्थिक नुकसान झाले, असा आरोप आहे. निविदांच्या अटी ठराविक यंत्रसामग्रीला सोयीच्या ठरतील अशा पद्धतीने तयार केल्या गेल्या आणि गाळाच्या वाहतुकीसाठी कथित बनावट किंवा फुगवलेली बिले वापरली गेली, असा तपास यंत्रणांचा आरोप आहे.

केतन कदम आणि जय जोशी यांच्यासह अनेक जण तपासाच्या केंद्रस्थानी आहेत. केतन कदम यांच्या कॉल रेकॉर्डची तपासणी झाली, तेव्हा त्यात दिनो मोरिया आणि सॅन्टिनो यांच्याशी अनेकदा संपर्क झाल्याचे आढळले, असे पोलिसांनी सांगितले होते. त्यामुळे या दोघांचा प्रकरणाशी नेमका काय संबंध आहे, पैशांचे व्यवहार झाले का आणि त्या व्यवहारांची त्यांना माहिती होती का, याची चौकशी करण्यात आली.

या प्रकरणाचा तपास फक्त मुंबई पोलिसांपुरता मर्यादित नाही. जून 2025 मध्ये अंमलबजावणी संचालनालयाने (ED) मुंबई, कोची आणि त्रिशूर इथे अनेक ठिकाणी छापे घातले होते. त्यात दिनो मोरिया आणि सॅन्टिनो यांच्या मुंबईतील निवासस्थानांचाही समावेश होता. 65 कोटी रुपयांपेक्षा जास्त नुकसानीच्या आरोपांवरून ED ने PMLA अंतर्गत तपास सुरू केला होता.

ED च्या माहितीनुसार, तपासादरम्यान रोख रक्कम, बँक खाती आणि इतर आर्थिक मालमत्ता यांच्याबाबतही कारवाई झाली होती. कागदपत्रे आणि डिजिटल उपकरणे जप्त केल्याचे एजन्सीने सांगितले होते.

आता मिठी नदी गाळ उपसा प्रकरणात दिनो मोरिया यांची भूमिका नेमकी काय होती, याचा तपास यंत्रणा करत आहेत. केतन कदम यांच्याशी असलेला संपर्क, कथित आर्थिक व्यवहार आणि इतर आरोपींशी असलेले संबंध हे सगळे तपासाचा भाग आहेत.

दिनो मोरिया यांचे नाव यापूर्वी दिशा सालियान प्रकरणाच्या संदर्भातही चर्चेत आले होते. मात्र मिठी नदी प्रकरणातील आरोप आणि तपास हा वेगळा विषय आहे. पुढच्या चौकशीतून काय समोर येते आणि पोलिसांच्या तपासाची दिशा काय राहते, याकडे आता सगळ्यांचे लक्ष लागले आहे.